Басират ХIяжимурадова

БяргIибси яни шалгIеббулхъули, хIеб­ла ванадеш гъам­бикIуси замана —март баз­ла 8 — хьунул адамтала Бар­хIили ца ити чеб­би­кIибси хIебургар. ХIеб­ли­чил хьунул адамла хIял-тIабигIят мешудурцули, бяр­гIибси ванза хIебла бер­хIиливан, хьунул адамли анкъи ванабирни пикрилизи касили, чеббикIибси бургар ил бархIи. Хьунул адамла ди­гили, малхIямдешли, ва­на­дешли саби анкъи вана­бирахъуси. Нешла мал­хIямси хIерличил, кIан­тIити някъ­бачил, ду­цIарти диги­ли­чил дурути дугьбачил селра цугбуцес хIейрар. Не­шанала кьадри балути ил Бар­хIиличил хьунул адамти, рурсби, рузби мубаракбарес къалабали бирар.
Хьар МахIаргила биб­лиотекала заведующая Сул­­тIанат Халимбековани нешанала хIурматлис жагаси балбуц дураберкIиб. Цала­би­кибтачил гьунириули гъай­рухъун:
«АхIерти нешани, рурсби, рузби ишбархIи нуша хьунул адамтала БархIила хIурматлис цаладикилра. Нушала хьунул адамтани чула ихтиюрти пайдаладарили гIилмулизиб, бузерилизиб гьалабяхI башули машгьурбирули саби. Ил­дани машинаби дикни, халати организациябас бекI­деш дирни гьанна чисалра тамашабилзули ахIен. Иш­бар­хIи биалли, нушала хьунул адамтани дургъбазирра бутIакьяндеш дирули сари. Нушала шан Дагъиста игит Украинализибси дявила хасси балбуцла бутIакьянчи Зайнаб МяхIяммадовас, СВО-лизивси гIяхIгъабза Тимур Эль­даровла неш ПатIимат Кьур­бангIялиевани бел­кIун­си назму хIушабра бу­чIул­ра:

Дагъистайзир хабарла,
Халкьла рухIнар хIурматла,
Дергъла цIала дайлизир
Сар шанда баругъуна.

Чумра бяхъиб солдатла
ХIуни жан дерцахъири,
Дармунтачил гьалакли
Дяхъи гьакабирули.
Чумра жайзиб бургъути
Някъбани ахъбуцири,
Милигли цIумбикIути
ХIуни шинни бахунри.

Зайнаб, хIу къакъбяхъ сарри
Дергълизиб бургъантала.
Зайнаб, хIу пахру сарри
Гьанна Сергокъалала.

Малаикла дукайур
Аллагьли хIеррараби!
Сархили Чедибдешра
ХIу хъули чаррухъаби!».
Балбуцличир бутIакьян­деш дирули, хьунул адамтала Бар­хIи­личил цалаби­кибти мубарак­бирули гъай­­бухъун: дурхIнас бяркъ бед­­лугули дахъал дусмазир школализир рузули калунси На­жибат ХIябибовна, шко­­лала завуч Мариям ГIи­саевна, Дагъиста игит СВО-ла бутIакьянчи ГIяли ГIя­либековла неш Аминат ГIя­лиева, 35 дус дурхIнала анхъ­лизир воспитательницали ру­зули калунси Нурият Бя­хIям­ма­дова.
Н.БяхIяммадовани неш­­лис белчIунси наз­му, газета бучIантасра гьа­ла­бир­хьул­­ра:

«Неш»
Нарла духIнар кьумицад
Лер уркIилар пикруми,
БегIла паргъатагарти
Нешличила сар илди.

Иш дунъяла къакъличир
Лер диалра чум гьуни,
Нешла унабурхIличи
Гьалакли дирар кьяшми.

Дусми, вегIебшла дусми,
ХIушала къалабадеш,
Сен рухънараахъирав
Илцад жявли дила неш?

Школала бучIантани нешанас, хала нешанас жагати далуйти делчIун.
Пергер макьамтачил балбуц гIеббуцес вакIибси МКДЦ-ла хIянчизар Руслан Мя­хIям­ма­довли цалабикибти мубаракбариб.
Гьунибаъни ахирличи бир­ку­хIели СултIанат Халимбековани байрамличи бакIибти савгъатуначил разибариб.
БиштIаси, амма лебтасалра уркIби ванадарес бажардибиркуси библиотекала юртлизиб иш гьакIлисра гIяхIси гьунибаъни бетерхур.