Ишдус нушала улкализиб дебали мягIничебси, тарихлизир сунечила мурхьти къел калахъунси, ЧебяхIси ВатIа дергълизиб Чедибдеш сархибхIейчирад 80 дус дикнилис хасбарибси, халаси байрам дураберкIиб. Россияла Президент Владимир Владимирович Путинни 2025 ибил дус ВатIан балтахъантала Дуслизира халбарибси саби. Майла урчIемличиб Москвала бекIлибиубси майдайчиб — ХIунтIена площадьличиб дявила парад бетерхур. Иличи бахъал гIяхIлира бакIибтири. ДурадуркIули сари гьар мераначир далдуцуни нушала адамтази итди кахти дусмала игитуначила хъумхIертахъес ва илдани сегъуна багьа бедили Чедибдеш сархибсирил лебтазилра аргъахъес.
1945 ибил дусла февральла урегличив Иосиф Сталинни США-ла президент Франклин Рузвельтлизи ва Великобританияла премьер-министрлизи дугьаилзули, ишдигъунти дугьби дурибтири: «…ГIе, нуша мицIирли лералцадхIи, урухкIес хIяжатдеш агара. Нушани нуша-ургар далагардешуни кахIедиркахъехIе. Нушани нушала улкначи сагали чизилра чябхъин барахъес хIебалтехIе. Амма аркьян вецIал дус, яра камли, нуша деткайхъехIе. Лябкьян сагаси наслу, нушани чедаибти ва ахъибти хIедалути, сабира алкIути масъултачи цархIил тяхIярли хIербикIути, нушаван ахIи. ИлхIели се бирара? Нушани пикрибарибсигъуна саби челяркьути 50 дусалра даршудеш калахъес». ХIябилра вархьли викIулри Иосиф Сталин. БакIили саби сагаси наслу.
МикIхIила шилизиб, гьалабван, Чедибдешла бархIилис ва СВО-лизиб бутIакьяндеш дирути МикIхIила дурхIнала хIурматлис хасбарили някъби дирхIяхънила шайчибси Лавашала районна чемпионат дураберкIибсири. Илизир бутIакьяндеш дарибтири 2007-2012-ибти дусмазиб акIубти дурхIнани.
Абзани ибхьули МикIхIила шила спортивный школала директор Чамкур ХIябибовичли лебилра цалабикибти мубаракбариб нушала халкьлис илцадра мягIничебси бархIиличил. «Нушала улкала жиличи лебилра адамти музабухъунтири. Цаибси бархIилизибал адамти саби гIяхIъулали дергълизи букьес военкоматунази дугьабилзутири. МикIхIила шилизибад 750 адам арбякьунтири, илдазибад 350 даимлис дявила майдунтачиб калун. ИшбархIира нушала улкалис вайнукьабани урехи алкIахъули саби. Чула хала дудешуниван, нушала дурхIнира ВатIан багьанданси гъазализиб саби. Сецадла хIейгеси биалра, вецIани нушала шилизибадти дурхIнанира чула гIямру кьурбандариб. БусягIятра нушала дурхIни Украинализиб бургъули саби. Илдас кумек (поддержка) хIяжатли саби. Спортсментас гьарбизуни диаб», — викIи ил.
Абзани дебали жигарчерли детерхур. МикIхIила шилизир ил журала абзани дурадуркIни гIядатли бетаурли саби. Шилизибад някъ бирхIяхънила чумал Россияла чемпион дурабухъи саби.
«Нушани халаси хIянчи бирулра чеалкIуси наслулизир спортличи ва ара-сагъти гIямру дуркIниличи диги адикьес. Школализир гьунибаъниби дурадуркIулра дурхIначил, спортла журабачила илдала дигIяндешуначила бурути ихтилатуни детерхурли сари. ДурхIни нушала челябкьла саби, урхIла лебти ахIен, илди лебилра нушала дурхIни саби», — буриб тренер ГIябдуллагIялиев МяхIяммад Гугуевичли.
Чедибдеш сархибти дурхIнас савгъатунира дедиб.
Руслан Ражабов
