Лебтанилра балули саби умудеш – нушала арадешла чеасла биъни. Амма ил гIеббуцес дакIудирути къайгъни камли сари.
Республикала тах шагьарла кьакьала дураухъалли, гьар-чинаралра гарчли жярга-зекъли ва нясдешунани дицIибти тIакьни чедиур. Нушала Дубуртар Улкала дай уркIили бетаурси шагьарла куц-сипат, гьайгьайрагу, илдани жагадирули сари викIесра хIейрар. Илцадра аргъабиаибси масъала итмаданал хIисаббирули саби нушачи гIяхIладли бакIибти туристунанира. «Республикализир дахъал жагати мер-муса лер, хаслира – дубуртала шимазир: мурхьти къадурби, ахъти дубурти, вава-кьарли дерхъибти авлахъуни, шиниша вацIурби. Илди лигIматуназивад декIарвикесра къиянни саби. Шагьуртазиб дигеси урхьула дуб. Амма республикала тах шагьарлизир лерилра секIал дукьдулъули сари жярга-зекъличил бархбасунси масъалали», — илдигъунти пикруми иргъулра нушани Дагъистайзи бакIибти гIяхIлазирад.
ГIяхIлазибадалра цIахбизахъурли, ил челукьуси масъала гьунчибикахъести къайгъни хIукуматли дакIудирули дигахъаси.
ГьатIира хIебурес хIейрар, нясдешуни лайди­кIа­хъес хасдарибти тIакьни дацIдарили хьалли, илис гьалар авлачарли тIутIудиубти жярга-зекъ сари лертиван кавлули сари. Хасси машиналичиб бакIили нясдешуни ардихухIели, илдачил барх мер-муса умудирути хIянчизартира башес асухIебирусира? ТIутIудиубти жярга-зекълизибад дуцIрумла замана жяргаси гягI тIинтIбирули бирар. Ил мерличивад шулумухъес вархли къиянбулхъан. Дигахъаси ил кьялизиб бузути хIянчизарталала жавабкардеш имцIадиубли, гьайгьайрагу, иличил дарх чула баркьудиличи гъира биахъес илдас лайикьси алапара кабизахъурли.