Нушачиб, Дагъистайзиб, гьачам кабизахъурси села-биалра багьа даимлис кавлуси саби, дурхъаси Рабазан базличиб бархли. Нушала вачар-чакарлизи бархибти адамти бусягIят хужаимти бетаэс дигути саби. Ишдус нушачи бакIибти гIяхIли (туристуни) камбиънила ца сабабра ил биэс гIягIнили саби. 2025 ибил дуслизиб Дагъистайзи бакIибти туристунала лугIи кIел миллионничиб имцIали биубхIели, ишдус цаибил байхъу дуслизиб илди 700 азирцун сабри.
ГIе, нушачиб гьачам кабизахъурси секIа ахъси багьа камбиахъес гьамадли вируси ахIен. Дурути дацIти гъай хIедиъни кабизахъес багьандан, нуни вираси дахъал мисалти кес, амма цацун кили уус.
БусягIят наб бурес дигуси Дагъистайзиб дебали ахъбиубси бензинна багьаличила саби. Ил хабаралра агарли имцIабиуб: 70 къурушлис лугуси Аи-92 бензинна литр 115 къурушличи абикиб, 75 къурушлис лугуси Аи-95 бензинна литр – 120 къурушличи. Чилилра гIячихъли буресра хIейуб, сен ил тяхIярличи бикибсил.
Камси заманала бухIнаб Россияла цархIилти регионтазиб бензинна багьа убла, гьалабла куцличи бакIиб. Нушачиб биалли бегIлара дурхъаси багьа лебал. Иличибли вачар бузахъути адамтани дурхъадирути сари дирцутира, бензин дурхъабиубли саби бикIули.
Халкьла зигаръалаличила бакьили бурги нушала хала хIякимтанира, иш базла 8-личиб ДР-ла духIнарти къуллукъунала министр ГIябдурашид МяхIяммадовли, нушала республикализибти бензин бирцути адамти сунечи жибарили, илдазибад сен ил тяхIяр биубсил бурахъес тIалаббарили сай. Илдани министрлизи ишдигъунти сабабти дурили сари: чусра бензин халаси багьалис саби бирцуси бикIули, литр 46-47 къурушлис; дахъал харжани детарули сари бензин бируси заводлизибад ил чучи баахъес, имцIадиубли сари налогуни ва гIурра дахъал цархIилти. ХIебакIиб илди ца пикриличи…
Амма ну цалра илдани бурусиличи вирхули ахIенра. Къунба бугьути саби нушала вачар-чакар дузахъути адамти. Илдалара, цархIилти нушала базриганталаван, пикри саби гьамадли хужаимбиэс. Илкьяйдали хужаимти бетаэс бирути ахIен. Сен нушала адамтани ил пикрихIебируси? Нушачиб-декIар сен дургIехIебируси бензин?
Советский Союзлизиб бирусигъуна народный контроль бикIуси хIукуматла орган бусягIятла манзил нушачибра хIяжатли саби. Гужли гIейкIути сари нушачирти илдигъунти заправкаби яра илдала бегIти танбихIлабирути саби.