Сунела башри барсхIебиру
Иш гьакIлис наб макьала белкIес дигулра «Замана» газета 105 бирнилис хасбарили.
Хъярхъли шалгIердулхъули сари бурхIни, бузри, дусми. ИшбархIиван гьанбиркур ну хIянчила ракIибси цаибси бархIи. ИтхIейчирад гIяхIцад манзилра арбякьи саби. Газетализир дахъал дарсдешунира кадикили сари.
«Замана» газетала редакция 8-ибил дерхIличиб мерлабиубли саби. Ну хIянчила руцибхIели, редакциялизиб халабетаибти, гьести гIямрула адамтира, ургабти дусмалара, жагьилтира хIянчизарти бири. Лебил 8-ибил дерхIличиб гьар кабинетлаб кIикIел хIянчизар сабри. Гьарилли сунечицун хасси хIянчира барили, чис-биалра кумек хIяжатли биаллири, кумекбаресра гьалаклири. Редакциялизиб бахъхIиличибад бузути тамашала адамти бири: Запир Харбилов, ГIябдулкьагьир МяхIяев, ГъазимяхIяммад Юсупов, Ражаб Адамадзиев, Раисат Гиреева, Калимат ГIябдуллаева, НурулхIият ХIусейнова ва цархIилтира. Илди лебтачилалра лукIалли, газетала бяхIянира хIедиур. Нуни буриливан, илдала гьарилла чучицун хасти хIянчи дири. Халабетаибтани сагали бакIибти жагьилти хIянчизарти гIеббурцули бири, илди къелгIеббики, насихIятуни дури.
Ну хIянчила руцибсира, гьалабванра дила макьалализиб гьанбушили кьяйда, ГъазимяхIяммад Юсуповли сарри. КIинайс газетала бекI редакторла къуллукъличи Арсен Юсупов катур. Ил сунела санигIят ункъли бяркъурси, чеветаибси, сунечи ва алавчартачи тIалабкарси, бурибси гъай бетурхахъуси, къияна-шилтахъ хIейгахъуси руководитель сайри. Илини савли конференц-заллизи лебилра хIянчизарти халаси стол-алав цалабирхъи. Газетала бузерила чебкад ихтилат дураберкIили, чяйла бержили, разиси гьавличил сунела хIянчилизи ихъи. БархIилис хIяйна учидиркутири нуша илар.
Арсен Юсупов коллектив уржахъес, газетала бузери гьалабяхI арбукес, бучIантас тамашабизесли, гьарил газетала бяхIяназир чус пайдаласи баргесили бетаахъес даим гъазализив вири. Илини бекIдеш дируси манзил наб редакция мирхъила тIакьаличи мешубирки. Даим башути-арбашути гIяхIли, шимазирад адамтани дурхьути кагъурти, гьар байрамлис хIянчизартани дурадуркIути разити ихтилатуни-гьунибаъниби. Нушала редакциялизиб даргантицун ахIенри бузути. Нушачиб кIарахъан ГIяхIмад МяхIяммаев, лезгинти Мафизат ГIялибекова, Анжела Бакшалиева, Диана ГIябдулкеримова, Муфрижат Эминова бузули бири. БусягIятла манзил ГIяхIмад МяхIяммаевли нушара дархли 13 миллатла газета цаладяхъили, акIахъубси «Дагъистан» бикIуси Этномедиахолдинглис бекIдеш дирули сай. Иличил барх бузули саби Дианара Мафизатра. ГIяхIмадли компьютертала мез сунела нешла мезван дали рикIаслира, хатIахIериркус. Илини лебилра редакциялизирти компьютертала бузери къелгIеббикули вири. Анжела бусягIятла манзилра нушачил рарх, газетала жагати куц-кабиз алкIахъули, рузули сари.
Гьанбиркур савли хIянчила адицIухIели, жагати макьамти лебил редакциякад гIер-гIералгьули. Илди диндаличир зайдулхъахъули дири дила дудеш МяхIяммадмухтар МуртузагIялиевли ва дибгашан мухбир МяхIяммад Рабадановли. ХIейгеси биалра, илди ва цархIилти хIянчизартира нуша-ургаб мицIирли агара, чула бунагь-хатIа уркадуцабну. Амма илдала шаласи сипат нушала уркIбазиб даимлис кавлан.
Иш пергер коллективличил тянишриъниличи, редакциялизи рузес ракIниличи гьачамалра пашманхIериубра. «Замана» газетали 105 дусла ганзухъ ихъули саби. Ил гIяхIцад гьуни саби газетали ахъибси. БусягIятла манзил Арсен Юсупов нушала къушумлизив узули ахIен, амма ца минутлисалра нуша сунела коллективличила хъумхIертур, гIеббурци. СанигIятлашалти устадешличил ил жигарчевли гьалавяхI вашули сай, ахъти къуллукъуначив узули сай. Нушала газетала юбилейличил барх илалара юбилей саби. «Замана» газета бучIутира къулбасбирутира бархIиличи-бархIи имцIабикIаб ва сунела бузери дунъя бузули лебай тIашмабизаб. Арсен Юсуповлис биалли, гIямрулизир ва бузерилизир гьарбизунира сархибдешуни каммадиаб, хъулиб баракат имцIабиаб!
Кьаламла узби-рузби
Цалабиркуси гIевдухь,
Мухбирти дебшлабирул
Сабригу устахана.
Бири хIезиб бузули
Машгьурти девла устни,
Адам хIяйранвиэсти
ХIядурдири белкIани.
Наб рузес игъбарбиуб
Илдазибад кIиличил,
Юсуповхъала кьамла
Дудеш ва уршиличил.
«Замана»-ла бузери
Илдани къелгIеббики,
Гьар жумягIли газета
Даргантачи биахъи.
105 дусла ганзухъ
Ахъилри гьанна хIуни,
Тарихлизир мурхьти къел
Даимлис калахъунри.
Бургьаби, ахъбикIаби,
ГьалабяхIцун башаби,
Бихули гIяхIла хабар
Юртлизи абицIаби.