Дагъиста жагасигъуна мерличиб саби Дахадаевла районна КьярбачIимахьила ши. Альпила сагнази гIяйкабиубси илала мякьлар хамти дубуртира тIашли сари. Шила чедир биалли хабарла чIакни урцули дирар мурталра.
Ил шилизиб, гьайгьайрагу, гьарли-марти гIяхIгъубзнира алкIути саби. Илдигъунти патриотуназивадли ца сай ТIагьир Хаттаевра. Илини ишхIелла манзиллизир игитдешла черяхIти мисалти чедиахъули сай чеалкIуси наслулис.
Дубурла шурми-ургарадли, хIурхъла кьяцни дашути гьундурачивадли сунела зилантачил варх дуцIикIули, дубурла ахъти мер-мусаличив хIязтавиркьули, халаваибси сай ТIагьир. Илкьяйдали уркIи чIумати багьадурти халабиути саби СирхIяла шимазиб. ВатIай жиибхIели, ТIагьир гIела витIхIекIиб ва Россияла оборонала Министерстволичил вягIда бигьи, сай гIяхIъулали СВО-лизи арякьун.
Илкьяйдали ахIерси ВатIайс къуллукъбарес хIяжатбикибхIели, ТIагьир улкала хъархIерагардеш батахъес дураухъун. Илини ункъли балулри ВатIа гьалабси чебла дурхъаси ва чебяхIси биъни, ва сунела улкала халкьла, сунела хъалибаргла челябкьла, илдала бекIла чедиб даршуси зак биахъес багьандан дявила майдайчи дураухъес кьасбариб. Илала пикри сунела гъамти-тухумтаницунра ахIи, лебилра шантанира гIеббуциб. Илди илкьяйдали нушала улкала бургъантачи пахрули бицIибти саби.
«ТIагьир КьярбачIимахьила бахъалгъунти шан­тас гъабзадешла ва кабизалачебдешла мисалли ветаурли сай. Ил багьадурла игитси баркьудили цархIилти жагьилтира уркIичеббирахъули саби. КьярбачIимахьиланти ил ара-сагъли хъули че­диб­дешличил чарулхъниличи, илала игитти бар­кьуд­лумира пикрила дурар кахIелниличи бирхули саби», — бурули сай КьярбачIимахьила шила бекI МяхIяммад ХIяжиевли.
Шила библиотекализир рузуси илала неш Шагьанназли дудешлизибадли мяхIрумбиубти дурхIни адаб-хIяяла бегIтили, бяркъличи бикибтили, ВатIайчи дигичебтили халабаахъиб. Илинира сунела уршиличи пахрубирули сари, ва гъамси манзиллизив ил чедибдешличил чарулхъниличи рирхули сари.
Чула узичила гъайбикIухIели, ТIагьирла рузбалара ВатIайчи диги, илис мардеш лерни аргъесли саби. ТIагьирла кIел рузи саби лебти. Ца тухтур сари, кIиэсил — мугIяллим.
«ВатIайс къуллукъбирули, ТIагьир СВО-лизив­хIели, хъулиб ил уркIи-уркIиларадти дигиличил гIе­вурцанти леб. Илгъуна гъамтала кумекли ургъан ур­кIи­чеввирахъулира сай. БегIтала кагибти ва игит­дешла баркьудлумани дебшлаварибси ил сирхIян уршили гъабзадешла баркьудлуми дурадуркIулира сай. Илкьяйдали Дахадаевла районна шимазиб адаб­чебти ва саберхурти ВатIан балтахъанти алкIути саби.
ТIагьирла хъалибарг гьарбизунани ва талихIли хIул­­буркIахъаб, илала урши дудеш жявли чарухъи, шад­виахъаб. Илала шантира сабурагарли хIерли саби ил вахъхIиагарли, чедибдешличил ара-сагъли чарулхъниличи. ТI.Хаттаев – гьарли-марси игит сай, илала гIямрула гьуни биалли черяхI­ти ганзухъуначи умутчебси бехIбихьуд саби. Ил гьуни патриотизмала ва игитдешла баркьуд­лумани ша­ла­ба­рибсира саби», — бурули саби кьярба­чIи­ма­хьи­лан­тани.
ГIяхIгъабза ТIагьир чедибдешличил ва хIулкIули чарухъаб сунела хъалибаргличи!

Дахадаевла районна администрацияла пресс-служба