Нуша диштIахIейчирад духутили ва гIяхIтили детаахъес руркъулра, амма гIямрулизир талихIчертили диахъес бурсидирули ахIенра. Нушала хала бегIтала гьалаб дурхIни абикьес, илдази багьуди касахъес, гIямрулизиб чула мер буцахъес ибси масъала сабри тIашси.
Нушала бегIти биалли социальный бяхIчибизлизиб гьалабяхI башахънила план бетерхахъурси наслу бетарули саби, сенахIенну лебтанилра-сера багьуди касили саби, хIянчурбачиб бузули саби, хъали-цIа акIахъубли сари. Иличил бархли уркIи-рухIла хIяланачил тамай хIербирес балули ахIен. Илдани чула уркIила хIялани яра сяхIбатуначир яра муръаначир сари дурадалтути. ЦархIилти анцIбукьуназир илди усалдешлизи яра имцIати пишнази халдирули сари.
Нуша биалли – гьаларла наслубала «гъудурмайзи» атIахъунти жагьилти сарра. Нушачи урхIла хьулани-кьасани сари даахъибти. ИшбархIи сагаси наслу пикрумазиб, хIяланазиб хъархIерагарсили бетаэс къайгъилизиб саби.
Халаси наслули гIямру севан деркIес гIягIнисил балули саби ва чула гIямрула бетуцуни нушаб гьаладирхьули сари. Амма, илдала гьундурикадли нушаб дашес бетарули ахIен, сенахIенну гIядатла гIямру гIяхIцадла дарсдиубли сари.
Бахъалгъунти жагьилти челябкьлализиб бирар талихIличила пикрибулхъути: хIянчиличи башухIели, хъали-цIа акIахъубхIели, хъали асибхIели, бузерила ахъанайтачи баибхIели. Амма илдани илхIелира талихI баргес бирули ахIен. Сагаси мурад тIашбалтули саби ва ил бетерхахъес къалабали саби. Адамти се-биалра сархес даим дуцIлизиб саби. ХIясилтачи разили виъни ахIенну, ил бетурхахънилизиб разидеш бургнилизиб саби талихI. Пикриухъалли, школализир нуша севан руркъулра. Кьиматуначи хасси пикри бяхIчииусири, кIинайс – вуз. ГIур – «школализир цархIилти сари дагьахъурти», вузаназир – чула тяхIяр-кьяйда. Вуз хъараахъурли гIергъи – «дузес хIушала устадеш леру?» Илкьяйдали ахирагарси гьуникадли дашулра. ТалихI математикала къиянси мисалличи мешубиркулигу.
Ислам дин хIясибли талихI лебсиличи разили виъни саби. ТалихI сархибдеш ахIен. Ил уркIила гьав, паргъатдеш ва вегIличил валгундеш саби.
Анисат Умалатова, ДГУ-ла филологияла факультетла журналистикала отделениела магистратурала 1-ибил курсла студентка
