Дагъистайзир кIел азирцад шими, махьурби ва шагьурти лер. Илдазибад ца саби – Буйнакъск­ла районнизиб мерлабиубси дила ши Кьарамахьи (Карамахи). Кьарамахьи-алав лер гIяхI­цад шими: Къадар, Чабанмахьи, ЧIzн­кIур­бе, Къачалихъ ва Ванашимахьи. Са­ри-ургар илди декIардирули сари ахъти лусен­тани ва музурби-къадурбани. Илгъуна дебали тамашаласи ва жагаси тIабигIят саби дила шилизибра. Лер илар дахъал жу­ра-журала мицIираг, дугIла жаниварти, ар­цанти….
Хала бегIтани бурни хIясибли, шила у цалабикибси саби «Хъар» ва «махьи» ибти дугьбазибад.
Гьалар шилизирти гIямру дебали къиянтири. ГIянручI дурабухъи, берхIи ахъайчи хъумачиб совхозла хIянчиличиб адамти бузутири. БиштIати дурхIни дурсрачибад чарбухъунхIели, колхозла дацунти хъумачи гIяби далцIахъес башахъутири. Илцад халаси къияйчил бучибси беркалара хъули чарбулхъухIели, къачагъуни чебухъи кебисути анцIбукьунира имцIали къаршидиркутири. Къачагъуназибад адамти дебали урух­кIутири. Ца-гьачам унра шилизирад дегIес анкIи садухес гIягIнибикибхIели, цалра адам ила укьес кьабуликибси ахIенри. ХIера, илцадра урухкIутири адамти илдазибад….
Гьанна адамтала гIямру дебали дарсдиубли ва гьамаддиубли сари. Гьарил хъайзир шинани лер, саби-бегIти унхъри-хъуми, хIяйван-къача, машинаби лер. Шила духIнарти гьундури сагадарили ва къирли дуцили сари. Адамтала кумекличил дахъал жагати мижитуни тIашдатурли сари…
Яшав баресра дахъал имканти лерни багьандан, адамти ил шайчибра гьалабяхI арбякьи саби. Республикализир дурадуркIути берк-бержла ярморкаби ва выставкабачир къадарантани жигарла бутIакьяндеш дирули сари. ИмцIаливан шила халкьли хIяйван-къача адилкьули ва диъби дирцули сари. Цар­хIилти кьялубазибра адамти дебали гьалабяхI арбякьи саби. Кьарамахьи гьанна культурала ва багьудила шайчиб мекелли давлачеббиубли саби. Дила шантас гьатIира сабухъчебси бузери ва хIулкIути гIямру дулгулра.

Жавар Габитова,
ДГУ-ла филологияла факультетла РДО-ла отделениела (заочное) 4-ибил курсла студентка