Июльла 8-личиб, лебилра Рос­сиялизиб кьяйдали, Ахъушала районнизибра хъалибаргла, дигила ва мардешла БархIи ахъси да­ражаличиб дураберкIиб. Ил шад­лихъличи жибарилри респуб­лика­ли­зибадти бахъал гIяхIлира.
Илди «Ахъушала район» МО-ла администрацияла бекIличил барх МухIела шилизибси СВО-ла бутIа­кьянчибас ба­гъишлабарибси «Гьанбикунала анхъ»-лизи бякьун.
ГIур Ахъушала шилизибси культурала КIялгIялизиб шадлихъ дураберкIиб. Культурала КIялгIяла гьаларти мер-мусаличир лерри «Ахъушала майдунти», сарира культурала управлениела хIянчизартани гIяхIлас хIядурдарибти ва хасти палтарличил гьаладихьили, мил­латла дуббатуни, някъла хIянчурби, Балхъарла шилизибси цехлизир дарибти чяртла тIалхIяна ва гIурра дахъал ваяхI. ГIяхIлани илди ваяхI иштяхIличил хIердариб.
Шадлихълизир бутIакьяндеш дариб Ахъушала районна бекI ГIябдулкаримов МяхIяч Кьадиевичли, ДР-ла миллатла политикала ва динна къуллукъунала министр Муслимов Энрик Селимовичли, ДР-ла Халкьла Собраниела депутат Кьурбанов Нагьбар Ражабкьадиевичли, Дагъиста хьунул адамтала Советла Председатель Мамутаева Интизар Асадуллаевнани, Дагъиста шагьуртала ва районтала хьунул адамтала Советунала Председательтани, Дагъиста хьунул адам журналла бекI редактор, Ахъушала районна МухIела шилизирадси Шамилова Хамис ГIяхIмадхановнани сунела хIянчизартачил рарх, СВО-ла бутIакьянчибала хъалибаргунани, шимала бургани, учреждениебала, организациябала руководительтани, жавабла хIянчизартани ва бахъал цархIилти гIяхIланира.
Шадлихъ ибхьули гъайухъун районна бекI МяхIяч ГIябдулкаримов. Илини лебилра цалабикибти байрамличил мубаракбариб, республикализибад Ахъушала районнизи бакIибти хIурматла гIяхIлас баркалла багьахъур.

– Гьарилла гIямрулизиб бегI­лара мягIничебси хъалибарг саби. Адамла сунела хIянчилавад хъули чарухъунхIели, иличи хIерти хъалибаргуни диаб! Гьарил хъалибарглизир ВатIайчи диги ва илис мардеш диэс хIяжатли сари. Лебтасалра арадеш, сархибдешуни, гьарбизуни дулгулра! — викIи М.ГIябдулкаримов.
Шадлихъличиб гъайбухъунти цар­хIил­танира лебилра байрамличил мубаракбариб ва дахъал гIяхIти дугьби дуриб.
Интизар Мамутаевани районна бекI МяхIяч ГIябдулкаримовлис ва ила­ла заместитель, Ахъушала районна хьунул адамтала Советла предсе­датель Эльвира ХIясанхIусейновас, ДР-ла Халкьла Собраниела депутат Нагьбар Кьурбановлис баркалла багьахъурли ва ДР-ла хьунул адамтала Советла шайзирад Баркаллала кагъурти дедиб, районна халкьла ургаб баркалла сархнилис, халкьличи уркIи изахънилис, район гьалабяхI башахъес къайгъиличил бузнилис, хъалибаргла кьадри ахъбикIахъес кьасличил хIянчи дурабуркIнилис, СВО-ла бутIакьянчибас ва илдала хъалибаргунас халаси кумек гIеббаахъни багьанданра.
Ил шадлихъличи жидарили лерри Ахъушала районна духIнарти цархIилтас гIибратли детаурти хъалибаргуни. Илди сабри: Шукьтила шилизибадси, СВО-ла бутIакьянчила ГIямаровхъала; ХIинтIала шилизибадти Камалутдиновхъала, 60 дусличибра имцIали барх хIербиубти, МухIела шилизибадти Чупановхъала, ЦIуликъянала шилизибадти МяхIмалиевхъала; Ахъушабадти Зугьумовхъала, 57 дус барх хIербиубти МяхIяммадовхъала, СВО-лизир тухтурли рузули калунси, бахъал зягIипти бургъанти сагъбарес къайгъназирси Раисатла ва Казбекла рурси Асият ГIямараевхъала хъалибаргуни шабагъатлабариб.
Илди хъалибаргуназибадти «Ахъушала район» МО-ла администрацияла ва ДР-ла хьунул адамтала Советла шайзибад савгъатуначил, арцла мухчабачил ва вавначил шабагъатлабариб.
Ахъушала шилизибадти БяхIяндгIялиевхъала ва Гъуладтимахьилизибадти Абубакаровхъала хъалибаргуни «Диги ва мардеш багьандан» бикIути медальтачил шабагъатлабариб.
СВО-ла бутIакьянчиби ДР-ла миллатла политикала ва динна къуллукъунала шайчиб бузуси Министерствола шайзибад савгъатуначи лайикьбикиб.
Ахъушала культурала управлениела хIянчизарти ХIузаймат Ибрагьимовани, Пирдаус ХIяжимяхIяммадовани, Зульфия Рабадановани, Шамил Гъуладтинскийли, ЖумягI ГIялиевани, «Ахъуша» ансамбльли, Ахъушала дурхIнала анхълизибти рурсбанира чула пагьмурти чедаахъили, къугъати далуйтира делчIи, жагати делхъ дарили, шадлихъла бутIакьянчиби разибариб.

С.ГIябдуллаева