ЧебяхIси ВатIа дергъла бутIакьянчи МяхIям­мадгIялиев МяхIяммад ГIябдулхIялимович акIубси сай 1916 ибил дуслизив Ахъушала шилизив, хIур­мат­ла хъалибарглизив.
М.МяхIяммадгIялиев 1940 ибил дусла май базличив ВатIайс къуллукъбарахъес ХIунтIена ГIярмияла къяянази живарибсири. 1940 ибил дусла июнь базличивад 1941 ибил дусла июль баз дикайчи Карельский фронтла 7-ибил гIярмияла 86 ибил артиллерийский полкла 54 ибил дивизиялизив курсантли калун. 1941 ибил дусла июнь базличивад август баз бикайчи Ленинградла фронтла 118 ибил стрелковый полкла отделениелизив ургъули калун.
Гъабзадешличил ургъуси М.МяхIям­мад­гIялиев декIли вяхъилира калунсири, сагъвиубмад ил сай ургъуси мерличи чарухъун. Дяви ахирличи бикибхIели, М.МяхIяммадгIялиев халалгъуна сержантла званиеличил отделениела командир ветаурлири.
МяхIяммад МяхIяммадгIялиев ВатIан багьандан гъабзадешличил ургъули хIябъибил даражала «дявила Асилдешла», «цаибил даражала ЧебяхIси ВатIа дергъла» ордентачи, кIина «Гъабзадеш багьандан» бикIуси медальличира лайикьвикибсири.
Илкьяйдали ЧебяхIси ВатIа дергълизиб бургъули калунтири М.МяхIяммадовла кIелра узира. 1920-ибил дуслизив акIубси Кьади ва 1923 ибил дуслизив акIубси Расул МяхIяммадгIялиевхъали. Илдира ВатIа хъархIерагардеш батахъес асилдешличил бургъутири ва шабагъатуначи лайикьбикибтири.
Дергълис гIергъити дусмазивра МяхIяммад Мя­хIям­мадгIялиев Ахъушала район ва Дагъистан гьалабяхI арбукес багьандан дуги-хIери цадарили, узиб. Ил дахъал дусмазив Ахъушала шилизибси Ле­нинна уличилси колхозлис бекIдеш дирули калун. Колхозлизив узули халкь ва ВатIан багьандан хIя­лалси бузери барнилис М.МяхIяммадгIялиев «Ок­тябрьла революцияла», «Бузерила ХIунтIена Байрахъла», «ХIурматла лишан» бикIути ордентачил ша­ба­гъат­лаварибсири.
Илини сунела гIямрула рархкья ГIябидатличил барх 10 урши-рурси абикьур, гIяхIси бяркъра бедили, багьудира касахъили, гIямрула гьунчи дураиб.
Иш белкI хIядурбирухIели баянти касибти сари Ахъушала шила краеведческий музейла архивлизирад.

ХIядурбарибси — С.ГIябдуллаева