МухIела шила халкьла тилади хIясибли, акIа­хъуб­ли «Муги» бикIуси фонд лебси саби.
«Муги» фонд акIахъубси саби МухIела шила халкьлис, нукьсандеш лебтас, къияйзи бикибтас, ил шилизир детурхахъути хIян­чила, проектунала, програм­мабала шайчиб ман­па­гIят­биахъес багьандан. Фондла кьас саби шила халкьла гIям­­рула шуртIри гIяхI­ду­хъахъес.
Фондлис бекIдеш дирули сай МухIела шила администрацияла бекI Муртазаев ­Ислам ГIямаровичли.
Украинализиб дя­ви­ла хасси балбуц бехIбихьили гIергъи, «Муги» би­кIу­си Фондли заманалис чула баркьуди СВО-ла бутIа­кьян­чибас кумекбиэсли шурбатурсири.

СВО-лизиб бургъутас кумекбикIули саби Му­хIе­ла шила халкь. Ил шила дураб хIербирути ба­­хъал адамтанира халаси кумек гIеббиахъули саби.
СВО бехIбихьибхIейчирад «Муги» Фондла шайзирад дахъал сари ила дархьибти секIал: ванати палтар, одеялоби, бусес кабилхьути гавлагуни, дабруми, квадрокоптерти, рацияби. УАЗ «буханка», «Нива» машинаби, генераторти, Камазунала хIулруми, метеостанцияби, хIи тIашаэс багьандан пайдаладирути секIал, маскировочный сетани, берк-берж ва гIурра дахъал бургъантас дявила авлахъличир багаладиэсти ваяхI.
МухIела шилизибадра Ахъушала районна цар­хIилти шимазибад кьяйдали, СВО-лизир бу­тIа­кьян­деш дирули бахъал гIяхIгъабза бургъанти леб. Бахъал ордентачил ва медальтачил шабагъатлабарили саби, «Гъабзадеш багьандан» медальтачил, Жуковла ва Гъаб­задешла ордентачил. Илди-ургаб леб Ва­тIан­ра, халкьла челябкьлара багьандан чула гIямру мяштI­хIе­дарибти.
МухIела шила бекI Ислам ГIямарович къайгъилизив сай СВО-ла бутIакьянчибала хъалибаргунас, дурхI­нас, бегIтас пачалихъли чебаахъибси ва фондла шайзибад кумек гIеббурцес.
Ислам Муртазаев СВО-ла бутIакьянчибас кумекуни дурхьнилис чумал шабагъатличи лайикьикили сай.
«ГIямрула гьуни» бикIуси гIяхIбаркьла фондла шайзивад «Гуманитарный кьукьяла бутIакьянчи» бикIуси хIурматла гьанбикунала медальличил шабагъатлаварили сай.
СВО-лизиб бургъути нушала улкала гIяхIгъубзнази чедибдеш сархахъес багьандан, МухIела шила администрацияла бекIли ва ил шила халкьли дахъал кумекуни ва къайгъни дакIудирули сари.
Ислам ГIямаровичла «Ахъушала район» МО-ла администрацияла бекIла шайзирад дедибти ХIурматла Грамотаби, «Дагъиста халкьла игит» бикIуси зубари ва цархIилтира шабагъатуни лер.
Гьаннала гIергъира хIурматла Ислам Муртазаевлис, сунела шилис ва шантас гьатIира дахъал гIяхIдешуни дирули узахъес ЧевяхIсини ахъри бедаб, гIямрулизир сархибдешуни ва марти юлдашуни имцIабикIаб, сунела дигутани разивирули хIериэс кьадарбиаб!

Сабият ГIябдуллаева