ДурхIнас багьуди бед­лугни чула гIям­ру дуркIнила бетуц­ли бетаахъурти мугIял­лим­ти­цун бирар санигIятлис марли кав­­лути. Тяп илдигъунти педагогунала къяйлизирадси сари Э.Темирхановла уличилси Мажалисла школала мугIяллим ва дурхIнала жамигIятла цалабяхъуначил бархбас кабилзахънилизир школала директорла насихIятчи Луиза Сулайбановна Мускаева.
Гьаларван ил, «Объединённый союз ополчения Дагестана» ДРОО-ли тасдикьбарибси «Дявила асилдеш багьандан» би­­кIуси медальличил шаба­гъат­ларариб. Дявила хасси бал­­буцла бутIакьянчиби гIеб­бурц­нилизи кабихьибси халаси пай багьандан, бедибсири илис ил шабагъат.
Медаль бедлугнила балбуц ДР-ла Жа­мигIятла Палатала ва ВатIа бургъантала хъалибаргунала комитетла член Гулизат Мурадхановани дураберкIиб.
Шабагъат, бургъантала игит­­­­дешличил бархбасунси биалра, иш гьакIлис илала мягI­­­на гьарзали бетаурлири. Л.Мускаевас шабагъат даимси, сари-гIяхIъуласи бургъантала ку­мекчила бузерилис, бургъантас кумекбирути далдуцуни ду­ра­дуркIнилис ва илди гIеб­бурц­ни багьандан, школала дурхI­ни гьарил бирусилис жавабкардеш дихахъес бурсибирнилис бедибсири.

СВО бехIбихьибси цаибси бар­­хIиличирад рехIрихьили пе­дагог шайчир кахIелун. ХIе­рили илини дурсри кадирхьули сари, бархIехъуназир ва акьути бурхIназир бургъантас кумек бурчули сари. Илала бекIдешлиур районнизир ва школализир даим кумекла масани, ваяхI дучили, цаладяхъили бургъантачи дурхьули сари, маскировочный сетани думхули сари, хандакьуназир хIяжатдиркути шямани далкьарахъули сари. Украинала дазуличибти бургъантачил даимси бархбас ка­бизахъурли, бучIантани ил­дачи кагъурти дурхьули сари, сав­гъатунала посылкаби хIя­дурдирули, бургъантала ва ветерантала хъалибаргуни гIер­дур­цути далдуцуназир бу­тIа­кьян­деш дирули сари.
«Иш медаль набцун ахIен гибси. Ил нушала бучIантала, дурхIнала бегIтала, бархкьябала далдуцунала хьарахъуд саби. ЦабехIли ваяхI дихутири, цархIилтани арц лугутири, чили-биалра нушани бируси гIеббурцусири», — сунела пикри бурули сари Л.Мускаевани.
Илала бузери жявлил школализибси класслизибад дурабухъи саби. Педагогла бекIдешлиуб школала азбарлизиб ЧебяхIси ВатIа дергъла бутIакьянчибас тIашбатурси памятник къулайси агиличи бушили, алавти мер-муса жагадарили, галгуби,вавни удатурли сари. Илини тIашбатурси бяркъ бедлугнила бузерили бирхаудичерти сархибдешуни дирахъули сари. Школала бучIантани мурталра улкала, респуб­ли­кала ва районна ВатIан ди­гахъутала далдуцуназир бу­тIакьяндеш дирули сари, чедибиркули савгъатуни, цаибти мерани сархули саби. Бахълис илди диахъубти сархибдешуни ахIенну халкьла тарихлизирти, гIядатуназирти бу­тIакьяндеш сари.
ДекIарси бузери тIаш­ба­турли сари илини дурхIнала юртанази рашули. Илди гьунибаънибани, педагогла гъай хIясибли, дурхIни алавчартас кумекбирахъес, гIеб­­бурцахъес, илдала пикруми дагьес бурсибирули саби.
«Наб дигулра мицIирти рухI­личилти дурхIни халабаахъес. ДурхIяли, сунени бу­чили посылка, дурхIнала юртлизи архули виалли ил бекIлибиубсиличи – адамдешличи бурсиирули сай. Касибси шабагъат набцун ахIенну илдасра саби», — рикIи Луиза Мускаева.
Медаль бедни школалис мягI­ничебси лишанни бе­таур: игит­деш ишбархIи дя­вила ав­лахъличирцун ахIен дакIу­ди­рути, илди гьар бархIила бузерилизирра даргес вирули сай, цархIилтачила къайгъназир, кумеклизир, цархIилти багьандан жавабкардеш дихни­ли­зир.