ЛугIурбала манзил хIясилти сархес гьуцIикIнилизив цакьадар тIашизурли, алавчарти аги-кьяйдаличи пикриухъес чебиркур. Замана бархьли буркIулрара? ХIяжатси мерличи къалабаикилрара? Интернетла ва хIякьикьатла ургаб царугдеш севан бургуси?

ЛугIурбала гIягIниахълумани нушала халаси замана билгIули саби. Ил багьандан «лугIурбала диета» бузахъес бурсидиэс чебиркур. Компьютерла гьала сягIятунадли кадиили, гьарли-марси ихтилат дурабуркIес хъумуртулра. ГIяхIцад жагьилтас бекIахъудила цацадехIти тяхIяр-кьяйда дяркъес бархли къиянни саби. ИшбархIила хъалибаргуназиб дурхIни ва бегIти, ца хъулиб хIербирули хьалли, цаличил ца камли ихтилатбикIули саби, сенахIенну илдазивад гьарил Интернетлизив кяйгIули сай.

Интернетла вайси асарлизи хIейкес багьандан, мехIе дузахъни мягIничебси саби: сегъуна-дигара техника пайдалабируси замана камбарая; гъамти адамтачил халаси замана буркIес къайгъибиреная; хъалибаргличил бархIехъла беркала букни гIяхIси гIядатли бетаахъая; арати гIямру дуркIниличи пикри бяхIчиаая, бархьси беркала букеная; ца бархIи бархIехъ лугIурби агарси бетаахъая.

Интернетлизив вахъхIи калалли, чеветхIеибси агиличи виркур. Илгъуна анцIбукьлизиб «Две минуты бездействия» бикIуси сайтли кумекбиру. Сайт бузесаили, кIел минут паргъатли кадиирая, ругертала тIамрачи лехIирхъули. Экранничир замана буйгIуси таймер ва «Не трогать мышь и клавиатуру» ибси белкI дирар. Рахли кнопкабачи къячикалли, «Ты провалился» ибси белкI дакIубулхъан. Илкьяйдали пикри бяхIчииэс бурсикайрар.

  Адиля Махмудова