Дубурла гьарахъти шимазир ишхIелла манзилла сагадешуни имцIадикIни дигеси анцIбукь саби. Гьайгьайрагу, дубурлантала яшавла ва гIямрула шуртIри къулайтили диахъес багьандан газ кибни дебали гIяхIсира саби. Ишди бурхIназиб Дахадаевла районна хабарла мегьла устнала Хъярбукла шилизиб газла лами пархбухъун.
Илкьяйдали, хъярбуканти разибиахъубси илгъуна сагадеш дакIубухъахъес багьандан районна руководстволира гIяхIцад къайгъни дакIударни якьинси саби.
Хъярбукла шилизи 18,5 километрла гIеркъадешличи газла турбаби кадизахъурли сари. Гьанна шилизирти 120 юрт газличил гIердуцес имканти акIахъубли сари. Шилизиб газла лами пархбулхъахънила баркьудилизир, онлайн тяхIярла бетуцличил пайдалавиубли, бутIакьяндеш дариб Дагъистан Республикала БекI С.ГI.Меликовли. Илини илгъуна кьадричебси анцIбукьличил хъярбукантира мубаракбариб, ва Дагъистайзиб машгьурси мегьла устнала ши вавалибяхъили, Хъярбукла шилизибси художественный комбинатла бузери жигарчеббиубли дигниличила багьахъур.
Республикала БекIличил Хъярбукла шилизибадли «бархьаначиси линия»-ла кумекличил бархбасун Дахадаевла районна бекI МяхIяммад ГIябдулкьадиров, Дагъистан Республикала халкьла собраниела депутат МуртазагIяли Рабаданов, ДР-ла ГКУ-ла руководитель ГьитIинамяхIяммад ГIябдуллаев, Хъярбукла шила бекI ва шила шанти.
Объект хIядурбарниличила балахъули, районна бекIли баянбариб «ДР-ла шимала мер-муса гьаладяхI ардукни» ибси пачалихъла программала дазурбазиб Хъярбукла шилизиб газличил юртани гIердурцнила баркьуди ахирличи бикахъили саби или. Объект балкьарахънила баркьуди дураберкIибси саби Россияла шила хозяйствола Министерстволи декIардарибти федеральный арц пайдаладарили.
Муниципалитетла руководительли илкьяйдали баянти гьаладихьиб шимала мер-муса гьаладяхI дашахънила мягIничерти бетуцуначила. «Илдигъунти проектуни кумекли детарар шимала халкьла гIямру къулайдирахънилис ва экономика гьалабяхI башахънилис», — викIи ил.
«ИшбархIи нушани Хъярбукла шантала гIямрулизиб кьадричебси баркьуди кабикнила разиси шадлихъ дурабуркIулра. Гьарил хъярбука хъулиб хьанцIа лами улкуси саби гьаннала гIергъи. Ил анцIбукьли нушазивадли гьарилла гIямрула даража къулайбирахъулира саби. Нушани цахIнарти цIакьаначил хъярбукантала челябкьла къулайсили бетарахъехIе. Ил проект гIямрулизиб дураберкIахъес багьандан бутIакьяндеш дарибти лебтасалра баркалла балахъулра», — буриб МяхIяммад ГIябдулкьадировли.
Сунела яргализиб Дагъистан Республикала халкьла собраниела депутат МуртазагIяли Рабадановлира шилизи газ кибнила мягIничебси анцIбукьличил хъярбуканти мубаракбариб, ва илини илгъуна бетуц шантала гIямрулизиб лебгIеб пайдаласи саби, иличибли гьаннала гIергъи адамтас кункдешра алкIан или багьахъур.
«ХьанцIа цIабикьалала кумекличил Хъярбукла шантани чула хъулри камти харжаначил ва къулайси даражализир ванадарес бирар ва тIабигIятла газла кумекличил чус беркала хIядурбирести имкантира алкIан. Илкьяйдали адамтас гьар бархIилати хIянчи камкадирар.
Нушани кьалли чебиулра газла кумекличил сегъунти къулайдешуни алкIулил. Ну вирхулра цархIилти шимасра ил проект мисалли бетарниличи ва районнизир къулайти бетуцуни гьаладяхI аркьниличи», — буриб илини.
Хъярбукантани республикала ва районна руководстволис баркалла багьахъур чус илгъуна кумек гIеббаахъни багьандан.
Республикала агропромышленный комплекслизир гьаннала гIергъира илдигъунти къулайдешуни имцIадикIниличи вирхес вирар.
Дахадаевла районна администрацияла пресс-служба
