Советский мультикуни суратуназиб гьалабихьибси ­та­рих ахIен, ил­ди культурала арагIебси код саби. ДурхIнани ­«Че­бураш­ка», «Винни-Пух», илкьяйдали цархIилти со­ветс­кий муль­ти­ку­налара мягIна иргъули ахIен ва гьаннала мультикунас хъярхъли дарсдирули сари. Гьайгьайрагу, бегIтас илди гIяхIдилзули ахIен – чинаба илдала мягIнала мурхьдеш, гIяхIдеш бирахъес бурсивир­ни? Къуллукъ секIал балнилизиб ахIенну, иличи пикруми-хIерани дарс­­диъ­нилизиб саби.
Советский мультикуназиб гъайлизиб биаб, баркь-бацлизиб биаб кам­си багьлабирахъули саби: тIама тIашаили, музыка дирхъули, игит пик­риикIахъули. Гьалар дурхIнанира илдачил дарх бутIакьяндеш ди­рутири – пикрибикIули, хIялани иргъахъули. Гьаннала мультикуни биал­ли, анцIбукьунала къалабаси башри саби – мер-муса хъярхъли дарс­ди­кIу­ли, даим масхуртали бугьули, уюнти чедиахъули, музыка чедал­тули. ВиштIаси дурхIяла мехIе хIер­ли­кадирэс бурсидиубли ахIен, илди тик-токлизирти клипунани ясир­ду­цили сари. Илдас мехIе жигарчердирахъути секIал хIяжатли сари, цар­хIил­ван анцIдукьала челяркьян ва дурхIялис гьар секIал дертIур.
Сагати мультикунала игитунани масъулти хъярхъли ирзули сари. ДурхIнани илдачил барх децI буртIули ахIен, илдас хъярхъ­деш­личи саби хIеруди бузахъес гIягIниси. ДурхIни «чихъти» су­ратуначи бурсибиубдешли, илдас гьар секIал гIячихъ­ли ва хIя­кьи­кьатличи далдикибтили детарули сари. Со­ветский муль­ти­­ку­на­ла тяхIяр-кьяйда биалли, илдас гIя­датли ахIентили ва анцI­дукьестили кадилзули сари. Буралли, ил алав­чарли дарсдикIути шуртIрачи кьар­кьа­ла бурсибиънила лишан саби. Дур­хIя­лизи мягIнала мурхьдеш аргъахъес ди­гахIелли, илди лехI­деш­­личи ле­хIир­­хъахъес бурси­ба­­рес чебир­кур. Ил биалли бегI­тала гьалаб­си масъала саби.