Гьанна гIяхIцад замана ДГУ-ла профессор ХIя­са­нова Узлипат ГIусмановнани, Хай­дакьла район­на шайзирадси ДР-ла Халкьла Соб­ра­ниела депутат сарливан, гIядатла адамтала масъулти гьу­­нчидиркахънилизир жигарла бутIакьяндеш дирули са­ри. Иличи дугьабилзути адамтала лугIира дебали халаси са­би. Гьарилличи лехIяхъили, илала мурад аргъили, ма­съала гьунчибикахъес халаси къайгъибирули ру­зули са­ри ил.
У.ХIясановани чуйнара адамти кьабулбирнила далдуцуни, мягIничерти гьунибаъниби дурадеркIиб. Илдани ахъдуцибти масъулти илини сунела хIерудилиур дихIули сари. Адамтала гьарли-марси хъарихъли ретаурси илини, ишхIели бегIлара аргъбаибсили бетаурси Украинала мер-мусаличиб бетурхуси дявила хасси балбуцла бутIакьянчиби ва илдала хъалибаргуни гIердурцнила масъалара Узлипат ГIусмановнала гьар бархIиласи бузерила дайлаб саби. Гьаман СВО-ла бутIакьянчибала гъамтачил гьунириули рирар. Ихтилатлизиб илини илди гIеббуцести дугьбира имкантира дургули сари. Илкьяйдали илала сипталичибли «ВИП Кулинария» бикIуси берклумала устни хIядурбируси Центрла хьулчиличиб абхьили леб бургъантас дигIянбиркахъес хасдарибти (маскировочные) сетани далкьарахъуси мерра. Илдачил дарх депутатли бургъантас хIяжатдиркути цархIилти секIултира, берк-бержла масанира цаладяхъили, гьаман кумек башахъулира рирар.
Депутатли дурадуркIути лерилра хIянчи пикрилизи касили, ил парламентла спикер Заур Аскендеровли ХIурматла Грамоталичил шабагъатларарибсири. Газетала редакцияла хIянчизартанира ил шабагъатличил уркIи-уркIиларад мубаракрирули, дагъистанлантала гIяхIдешуначи дяхIчиаибти къайгъни, имканти ва цIакьани кIиркадиубли дигни иргъахъули саби.
Илкьяйдали нушани Узлипат ГIусмановна гъамли че­сабиуси юбилейличилра мубаракрирулра. ГIям­ру­ли­зир ва бузерилизир халати сархибдешуни, хъалибарглизиб уржибдеш, балгундеш, баракат, даршудеш, бекI­ла чедиб умуси зак, къаркъаван чIумаси арадеш дул­гулра!