Республика сентябрьла 1-личиб сагаси бел­чIу­дила дуслизиб бучIантас школабази унза абхьес хIя­дур­бикIули саби. БекIлибиубси пикри бяхIчииули саби тIабигIятла мусибат бетаурли, зараллизи дикибти багьудила объектуначи. ХIянчи дурадуркIули сари 130 багьудила объектличир. Илдазирад цацадехIти сагадан тIашдатурли сари, дебали дукьдуунхIели. 5 объект къалабаси тяхIярли тIашдалтути мегьла конструкциябазирад дарибти сари. Илди сари ЧIярадала районна Ирибла шилизиб, Дербентла районна Араблинское ва Рукель бикIути шимазир, Хасавюртла районна Адильотарла ва Бабаюртла районна Новоцилитлила школаби.
Сагати школаби ишбархIила манзилла тIала­бу­на­чи далдикахъили дарибти сари ва къулайти шуртI­ри акIахъубли сари дурхIнази чула пагьмурти гьаргдарахъес ва гIяхIил бучIахъес. Илкьяйдали лерилра шуртIри алкIахъути сари шикьбикIес къиянбулхъути бучIантази лайикьси багьуди касахъес багьандан. План хIясибли спортла майдунти ва бамс­риихъути меранира далкьарахъу.
Школаби сагадирнила бетуц ДР -ла БекIла къул­лукъуни заманалис дузахъуси Ф. Щукинни къел­гIеб­би­куси саби. Илди дирнила даража сунени министртачил барх чуйнара ахтардибарибсири. Илала гъай хIясибли, бекIлибиубси школаби къалабали тIаш­далтницун ахIенну, дурхIнас урехихIебирахъни ва школаби тIалабуначи мешутили диъни саби. Гьан­бир­­кахъехIе, республикализир шин ахъдиубли зараллизи дикибти школаби ункъдарес хIейэсти даражаличи дикибтири. Специалистунани хIердарибхIели, илди сагадарес хIебирниличила багьахъурсири ва илдала мерличи къалабаси тяхIярли мегьла конструкциябазирад чедир гьандушибти школаби тIашдатур. Сентябрьла 1- личир илди школабани цаибил класслизибад бехIбихьили 11 ибилличи бикайчи 1200 учIаннис унза гьаргдирути сари. Ил дебали дигеси анцIбукь саби, сенахIенну жагьти дурхIнала гIямрулизиб бекIлибиубси багьуди кайсни саби. Гьаларти дусмазирра нушала республикализир дахъал сагати школаби тIашдатуртири ва ункъдарибтири. Иличибли нушала республика ил шайчиб улкала лерилра регионтазибад гьаларти къяяназиб саби.