Гвардияла сержант Ражабов ЛигIматуллагь МяхIяммадович Хайдакьла районна Гъулдила шилизив гIядатла хъалибарглизив акIубси сай. БегIтани ил виштIахIейчивад жавабкардеш дихахъес, халатала хIурматбирахъес, гъайлис марсили калахъес, кьуват камти гIеббурцахъес бурсиварибсири. Школализив учIути дусмазив ЛигIматуллагь спортла азадли мушулвашнила журализи ахъибсири ва гIяхIти сархибдешуни дирахъутири. Школализибси белчIудира авла кьиматуначил таманбариб илини. «Сунес дигули виалри, шула кьиматуначилра вири школа таманбарес», — бурули саби илала мугIяллимтани. Амма, жагьил адамла пикруми цархIилтири: дудеш гIяяркьяна вирнили, ЛигIматуллагьли ярагъличи имцIали пикри бяхIчииусири.
Школа таманбарили гIергъи, ЛигIматуллагь ВатIа гьалабси чебла ахъес гIярмияла къяянази арякьун. Дальный Востоклизиб къуллукъбирули, сунела гIямру сегъуна баркьудиличил дигьес дигулил аргъиб. ГIярмия жагьил адамлис кIиэсил хъалили бетаур. ВахъхIи пикрихIейкIули, дявила къуллукъбарес, вягIда бигьун илини.
2022 ибил дуслизив ЛигIматуллагь Украинализиб бетурхуси Россияла дявила хасси балбуцлизир бутIакьяндеш дарес арякьун. Бяхъибти юлдашуни чебиули, илдас кьадин чеббирцIис ибси пикриличил миллатчибачи къаршили ургъулри.
2022 ибил дусла июньничив камси заманалис хъули вакIибси ЛигIматуллагь, лебилра тухумти чебаили ва илди ункъли биъни багьурли, дявила хасси балбуц бетурхуси мер-мусаличи, сунела юлдашуначи укьес гьалаклири. ГIяхIгъабза ургъан сайливан ЛигIматуллагьли лерилра хъарбаркьуни ункъли тамандирулри, сайра уркIиагарвирули хIейри цархIилтира уркIиагарбиахъес балтути ахIенри. «Чедибдеш нушала бирар!» викIусири илдази мурталра. Бяхъибти бургъантас кумек гIеббиахъи, сунела хъуцIрумачиб тухтуртачи биахъи. Сецад къиянни биалра сунени бикIибси санигIят бархьси биъниличи гьачамалра ташмишхIейуб ЛигIматуллагь. Илала пикри хIясибли, гьарил мурул адамла чебла саби неш-ВатIайс къуллукъбарни, илала хъархIерагардеш батахъни.
2022 ибил дусла августличив, дявила хъарбаркь таманбируси ЛигIматуллагь декIли вяхъиб. Ит бархIи ил юлдашличил варсиэс аркьулри ва вайси анцIбукь кабиркниличи уркIи шаклири. Амма ЛигIматуллагьли дявила юлдашуни сабицун батес хIейуб. Лерилра цIакьани дучили, арякьун дергъ бемжурси мерличи. Мина баргбердили, ил декIли вяхъиб, амма итмаданал илис кумек гIеббаахъес юлдашунас имканбакIибси ахIенри. Къяйк-къуйк циила хIярхIдиубхIели, ил урехиагарси мерличи гечвариб ва итмаданал Луганскла больницализи ваахъиб, илавадли – Москвализи. ЛигIматуллагьла кьяшми урасиб. Тухтуртала сегъуналра умут аги ургъан мицIирли калниличи, сенахIенну заманаличиб цаибил кумек гIебхIебаахънили, дахъал хIи деттахъилри.
Реанимациялизив ЛигIматуллагь жайчил ургъулри. Кьудратла ВегIли ил мицIирвиахъес кумекбариб. Ургъанна Альбина бикIуси гелешмеш лерсири, гьалмагъ гIярмиялизивад, гIур – СВО-лизивад чарухъайчи хIерси. Иличил кабикибси анцIбукьличила багьурхIели, Альбина итмаданал Москвализи рякьун. Магьар дихьили, жагьилти хъабиуб. ИлхIейчирад Альбина ЛигIматуллагьла къакъбяхъли ретаур: декIти операциябас гIергъи, кIинайс – реабилитациябазив мурул гьар секIайзив гIевурцули, къияндешуни дарх ихъули.
«ГIе, дила мурул кьяшмазивад ухъун, амма гIяхIси уркIи, гIямруличи иштяхI детхIехъахъиб», — бурули сари Альбинани.
БусягIятла заманара, кьяшми агниличи хIерхIеили, ЛигIматуллагь ВатIа гьалабси чебла ихъес даимвиубли сай. Илала баркьуди ВатIайс мардешла ва гъабзадешла лишанни бетарули саби. РФ-ла Президентла ХIукму хIясибли, гвардияла сержант ЛигIматуллагь Ражабов Гъабзадешла орденничил шабагъатлаварили сай.
Хайдакьла районна администрацияла пресс-служба
