Хайдакьла районна Хъирхъила шилизивадси Ислам Рабазанович Арбахов акIубси сай 1984 ибил дусла ноябрьла 10-личив. 2023 ибил дусла мартличиб илини кьасбариб сай гIяхIъулали дявила хасси балбуцлизир бутIакьяндеш дарес укьес.

И.Арбаховли дявила дебш касибтири Запорожская областьлизир. 2023 ибил дусла майла 20-личив ил Гуляйполе шагьарла мер-мусаличив гарчкайубсири. Мерличибси азарханализиб (лазаретлизиб) арадеш къулайбарили гIергъи, заманалис ил Москвализи вархьибсири. Ил дусла сентябрьличив Херсонская областьлизи вархьибсири.

2023 ибил дусла ноябрьла 2-личиб, дявила хъарбаркь таманбирухIели, И.Арбахов вяхъибсири. Вертолетличив ил Симферопольлизи ваахъиб. Арадеш къулайбарили гIергъи, ноябрьла 25-личив ил гIяскурти мерладарибси (дислокация) частьлизи, Каспийск шагьарлизи чарухъун.

Сунес диубти дяхъурбачи хIерхIеили, декабрьла 10-личив Ислам Арбахов сагадан СВО-ла мер-мусаличи арякьун, иш яргализив – Донецкла Халкьла Республикализи. 2024 ибил дусла февральличив, дрон-камикадзели чябхъин дураберкIибхIели, ил декIли вяхъибсири ва дявила анцIбукьуни кадиркути мер-мусаличивад гечварибсири. Чумал декIти операция чекасиб, кIел баз арадеш къулайбирули калун, илала гIергъи, Каспийсклизибси сунела дявила частьлизи чарухъун.

Дявила-медицинала комиссияла баянти хIясибли, илис гIяскуртазиб къуллукъбарес вирнила «В» даража (категория) кабизахъурли саби – «дявила дяхъи-хъас» ибси лишанничил, дявила къуллукъуни тамандирес къадагъабируси кьяйда. БусягIятла замана Ислам Арбахов дявила къуллукълизивад акьувалтнила хIекьлизибси хIукмуличи хIерли сай. Илини бигьунси вягIда 2026 ибил дусла июньничи бикайчи бузуси саби.

Дявила хъарбаркьуни тамандирухIели гъабзадеш дакIударни багьандан, Ислам Арбахов «Гъабзадеш багьандан» медаль, илкьяйдали ведомстволашалти цархIилти шабагъатуначира лайикьикиб. Ил гьалаихьибси сай Святой Георгийла IV-ибил даражала орденничира.

Хайдакьла администрацияла пресс-служба