Ахъушала урга даражала цаибил школализир Англияла мезла дурсри кадирхьули рузули сари Рашидова Кумсият Юнусовна бикIуси жагьил, къугъати чарх-бекIла, гIяхIти хIял-тIабигIятла регI, пагьмучерси мугIяллим. Кумсият Рашидовани КургIимахьила урга даражала школа таманба­ри­ли, сунела белчIуди даимбирули чебяхI­си даражала багьуди касес кьасбарили, институтлизи карерхур. Кумсият Юнусовнани чебяхIси даражала кIел багьуди касили сари, Ставропольлизиб педагогический институт белчIи, бехI­би­хьуд­­ла классунала педагогла ва изоб­ра­зительное ис­кус­ст­вола шайчибси му­гIял­­лимла сани­гIят­­личи регI­риубли са­ри. КIиэсил касибси багьуди саби Мя­хIяч­къала шагьарлизибси Дагъиста пачалихъла педагогичес­кий институтла Англияла мезла факультетра таманбарили.
Кумсият Юнусовнани сунела бузерила гьуни бехIбихьибсири Кавкамахьила урга даражала школализир Англияла мезла дурсри кадирхьули. Илар авал дус рузули калун.
Кумсият сунела неш Кумсият Булатова кьяйдали халкьличил ралгунси, дигичерси, дурхIнази багьуди касахъес, сунени кабирхьуси предметличи иштяхI акIахъес, ил аргъахъес, дурхIнас гIяхIси бяркъ бедес къайгъилизирси адам сари.
Чинаб бузули биаллира, кIелра – нешлира рурсилира хIурмат сархили, баркаллаличи лайикьбиркули саби.
Англияла диаб яра цархIилти диаб дурала улкнала мез гьарил адамлис дагьес, илди гIерасес, илди мезличил гъай­икIес гьамадси ахIен. Ил багьандан дурхI­нази аргъесли дурала улкала мезла дарс кабирхьесра гьамадли хIе­бур­гар. Биаллира, Кумсият Юнусовнани сабурличил, гьарил учIанничи балбиркуси хIе­руди баргили, Англияла мезла дурсри ка­дирхьули сари.
Аллагьли шаласи, игъбарла ва даршуси челябкьла кьадарбараб Кумсиятлис ва илкьяйдали лебилра мугIяллимтасра, чеабиуси наслулисра!
Лебилра педагогунала сархибдешуни имцIадикIаб чула гIямрулизир ва бузерилизир!