Дявила хасси бал­буцла бутIакьянчи ва дявила ветеран Юсуп Расулов гьанна хъулив сай, дяхъи-хъаслизи викили гIергъи аравирули. ХIябал базцадхIи дикили сари ил оборонала Ми­нис­терство­ли­зивад арякьи хъули чарухъи гIергъи. Боль­ницализиб Юсуп­ли ара-сагъвирнила бар­кьуди даим­бирули сай. Амма ил­гъуна акьуси заманара ур­гъан сунела бархкьябачила пик­ри­хIейкIули уэс вирули ахIен. Гьалавван ил нушачил, сунела бархкьябачил, гьуни­ваиб «За­мана» газетала редак­ция­лизив.
Дявила биография Юсуп Расуловла бехIбихьибсири ишди гIергъити анцIбукьунас гьалаб. 1999 ибил дусла августличив Дагъистайчи чябхъинбарибти улкни-ургарти гъармукабас къаршидеш дала­хъули сайра левсири. ИтхIели илис чебуркъуб вайти аги-хIяй­чил тянишиэс. Илдигъунти анцI­букьуназир сари адамли гъаб­задеш ва ВатIайчи диги че­диахъути.
Дахъал дусми ардякьи гIергъира Юсупли пикрибариб гIурра сунела гIямру дявила къуллукъуначил дигьес. 2024 ибил дусла ахирличиб илини Россияла Федерацияла оборонала шайчибси Министерстволичил вягIда бигьун ва Дявила хасси балбуц бетурхуси мер-мусаличи арякьун. Юсуп иш яргализив штурмовикунала кьукьялизи керхур.
Дявила бурхIни ярагъла къяйкличилцун ахIен дархдасунти, илаб гьар мурталра къияндешуни чекайсес хIя­жат­биркуси саби. Бургъантани чус чули гIягIнити шуртIри алкIахъули сари дявила май­дайчир ва цаличи цали хIе­ру­дира бирули. Хаслира къиянсили уббухъунсири яни­ла манзил, бугIярси аргъ ва дя­вила кьяркьти тяхIяр-кьяйда чеимцIаси им­ти­хIян­ни бетаур.
«Нуша дебадарибти хан­дакьуназир ва ванзала духI­нарти къушаназир хIер­дирули, илар лайикьти шуртI­рира алкIахъули калунра», — буриб Юсупли.
Илдигъунти анцIбукьуна­зиб мягIничебсили бетару­ли саби вегIличил барх бур­гъантаc кумек гIеббиахъни. Ца­ли ца гIеббурцули, цалис цали жавабкардеш дихули къиян­дешуни гьамадли ихъу илдани. Ил тяхIярли, дявила узидеш илгъуна къиянси замана къакъбяхъли детарули сари.
Амма дявила къуллу­къуни ихънила баркьуди, «им­тихIянтачил» ва «хIялумцI­ла­бачилцун» ахIен бархбасунси, гIямрулис ва арадешлис урехиласира саби. Юсуп Расулов вяхъни багьандан, дявила къуллукъ бархьбатес чебуркъуб. Гьанна илис бекIлибиубси — арадеш мяхI­камбарни ва гьаларла цIакьа­ни чардарни.
Юсупла дахъал шабагъатунира лер, чулира ВатIан ва миллатуни далтахъни белгидирути. Илдачила гьалабра дила бархкьябани белкIунсири.
ИшбархIи Ю.Расулов, хъу­лив виалра, ил сунела бур­гъанти юлдашуначила пик­ри­хIейкIуси цалра бар­хIи хIе­бакIиб. Дявила аги-кьяй­да­лизив калунси адамлис, ил­ди сунела бархкьябачил бер­кIибси манзил гIямрулизиб бекI­либиубтазибад цали кав­лули саби.
Нушаб Юсуп камси заманала ухIнав аравиубли дигулра. Арадешлизирти нукьсандешуни агардиубли, сунес ва илала гъамтас арати ва разити гIямру дулгулра.