Нушани балуливан, июльла 8 хъалибаргла, мардешла ва дигайла БархIи сабливан кабизахъурси саби. Ил бархIи лебил улкализир дахъал жура-журала далдуцуни дурадуркIули дирар.

Хъалибарг ибси дев бакьибхIели, гьалаб-гьалаб нушаб бегIти гьанбиркур. Сен? СенахIенну, гьарил адамла гIямрулизиб цаэсил ва бегIлара мягIничебси мер бурцуси саби бегIтани. БегIтани сай дурхIя гIямруличил тянишвируси.

Гьарил адамла рухIла кабиз, хIял-тIабигIят, хасиятуни, бяркъ хъалибарглизир лушути сари.  Камли ахIен халати узби-рузбалара асар биштIатала гIямрулизиб.

Гьарил хъалибаргла наслубачирад букьурли даибти гIядатунала дурарад, чули дузахъути диштIати гIядатунира дирути сари.

ВатIан, нешла мез, улка дигахъес, биштIатала ва халатала хIурматбирахъес, цархIилтачи уркIецIибирахъес виштIахIейчивад бурсиварибси дурхIя,  цархIилтазивад декIарулхъан. Сахаватдеш, диги, хIурмат дузахъуси хъалибарглизиб халабаибти дурхIни жамигIятлизиб мер буцибтили халабиур.

«Гьаланачи хIушани мисал чебаахъая» бикIуси бегIтас буруси халкьла бурала лебси саби. Илди дархьти дугьби сари, сенахIенну имцIаливан бегIтачибад саби дурхIнани мисал кайсуси. Адамдешла къиликъуни дуунти, хасти тяхIяр-кьяйда хIедузахъути хъалибаргуназиб халабаибти дурхIни, селичилра игьдибар агартили, васваскабикIутили бетарар. Или хIебиахъес, халатани къайгъибарес хIяжатли саби. Дигахъеная хIуша-алавси дунъя, тIабигIятла жагадешуни хIисабдирули, гьарил кабикибси анцIбукьлизиб гIяхIдеш чебиули, дунъяла тамашалати лигIматунани пайдаладикIули, разили хIердиабая!

П.Шахова