Ишди бурхIназиб Сем­га­махьила урга да­ра­жала школализир геог­ра­фия­ла дурсри кадирхьули рузуси Салимат ХIяжиевани буриб:
— Ахъушала шилизивси Украинализиб бетурхуси дявила хасси балбуцла бутIакьянчи Шамил ГIябдуллаев вяхъили гIергъи отпускличи вакIили, илдачи дукьес дигулрану, хIура раши нушачил рарх.
Семгамахьила урга даражала школала директор ХIясан Мя­хIям­мадовра, Салимат ХIя­жиевара 7-ибил классла бучIан­тира, илдачил рарх нура Шамил ГIяб­дул­лаевла хъалибаргличи дякьунра.
Шамилличил ихтилат бетаур, «Гьанна ца дусра байхъалара виублира СВО-лизир бутIа­кьян­деш дирули. Донецкла Республикала мер-мусаличив сайра ургъуси», — буриб илини. Семгамахьила школала бучIанти иштяхIличил лехIирхъулри ургъанни дурути хабуртачи. Шамилли гIямрула рархкья Сакинатличил барх абилкьули урши-рурси леб. Уршили програм­мистла курсанира тамандарили, гьанна учIули сай Каспийск шагьарлизибси медицинала коллед­ж­лизив, рурси ручIули сари школализир. Сакинат Урганила шилизир акIубли илар халараибси сари, гIур биалли Шамилличил кьисмат цабарили, Ахъушала шилизир хIеррирули сари. Жагали гъайрикIуси, малхIямти хIял-тIабигIятла регI Сакинат Ахъушала шилизибти халкьличил, сунела гIямрула вархкьяла бегIтачил, узи-рузичил, тухумтачил дигиличил хIеррирули сари.
Шамилла узи МяхIяммадли СВО-лизив ВатIа хъар­хIерагардеш ба­­лтахъули, сунела гIямру кьур­бан­дарибтири. Илала леб цIуръа­биубли хIябал дурхIяра.
МяхIяммадла ва Шамилла мал­­хIямси, гIяхIти уркIи-хIялла регI неш Рукьиятли авал урши-рурси абикьурси сари. Ца уршила анцIкьира чедуркъили, кIиэсил уршира СВО-лизив ургъули сай. Рукьиятли бурули сари сунела рурси ПатIиматла урши ГIялихIяжира мобилизироватьварили, СВО-лизи арукибсири, вяхъили гIергъи хъули чарухъунсири, гьанна биалли сагали арякьи жумягI дикибхIейс, душмантала дронни гIурра вяхъили госпитальлизив тев или.
Сакинатли сахаватли баршибси стол лебри хIядурбарили, ардукьес дигули хьалли, хIеруили, лебилра гIяхIли стол-алав жибариб.
Салимат ХIяжиевани илдигъунти гьунибаъниби дурадуркIули сари. ЧебяхIси ВатIа дергъла бу­тIа­кьянчибала гъамтачил гьунириули, илдачила белкIани хIядур­ди­рули сари.
— ХIушаб сегъуна-биалра кумек гIягIнили биалли, хIушани багьахъадалли, нуша кумекбарес ляркьехIе. Гьачамлис арадешлизиб нукьсандеш лебни багьандан хIед, Шамил, селра хIянчи барили вяшикIес пайдахIебирар! – буриб Салимат МирзахIяжиевнани.
МяхIяммадов ХIясан Мирза­хIя­жиевичра дахъал дусмазив шко­лалис бекIдеш дирули, сунечи хъарси хIянчи жавабкардешличил даимбирули узули сай. Сунела коллективла ургаб балгундеш ва бархьдеш дихIули, мугIяллимти устадешличил бузахъули, гIяхIси, балгунси коллектив бетаахъурли сай. Ил гьунибаъниличивра ХIясан МяхIяммадовли Шамиллизи суалти хьардаиб, сай ургъуси мер-мусаличирти тяхIяр-кьяйдаличила. Илдигъунти далдуцуни ва гьунибаъниби дурадуркIнира цар­хIилтас гIибратли детарули сари.
Аллагьли жяв-жявли дергъра ахирличи бикахъаб, нушала улкала бургъантани чедибдешра сархили, Шамилра илала рузила урши ГIялихIяжира, илди кьяйдали лебилра бургъантира ара-сагъли чула хъули, бегIтачи, гъамтачи, дурхI­начи чарбухъахъес кьадарбиахъаб!

С.ГIябдуллаева