«Къакъла гIелар дурибти гъайличи бекIлил пикри бяхIчимайид. Кьяшмачи дасунти нясличи някъ гачхIебиркахъу, илди гьакIдарили, чердиркахъу». ХIера, сегъуна гIякьлу сабил. Адам вахъ кьакьавикIули вираргу вегIличила тIягIямагарти гъай дурули сари или аргъалли. ИлхIелира сегъуналра сабаб агаркъира. ПасихIкарла пикри лебгIеб кумекбирулигу илдигъунти далагардешуначи пикри бяхIчихIеахъес багьандан.
«Къакъла гIелаб хIечила гъайбикIулив, хIебиалли хIу илдас гьалаври».
«ХIела гIямруличила шутIни-къунби дурулив, багьи, хIела гIямру илдалайчир тамашала сари».
«ХIезир вайти шалуби даргес къайгъибирулри, хIечи хIясратти адамтала гъай диъни аргъесли саби». Илдигъунти далилтанира пикриулхъахъули сай ва чила-биалра шутIни-къунбачи пикри бяхIчихIеахъес бурсивирули сай.
Адам душмай яра къакъличибси махли улкIахъуси ахIен. Адам каршу гъамти адамтани диахъубти рухIлашалти дяхъурбани. Бархьси саби, вегIлис дебали гъамси адам виубцад илала гъайли имцIали децIигахъули бирар. Амма гьарилли буруси девли уркIи бирхъули адам хIериэсра хIейрар. Сеннира вайсиличила хъумуртули, гIяхIсиличила гьанбиркахъули, уэс чебиркур.
«Замана — гъум, гIямру — шин, гъай — дягI сари. Илдачил сахъли вии чярт детхIеахъес багьандан». Сецад мурхьси мягIнала дугьби сарил. Гьарил секIал пикридирули, гIямру бархьдешличил деркIес хIяжатли биъниличила ахIену илди гъайла мягIна.
Авал секIал лерти сари бекIлил чардарес хIейрути: гъай, сарира муртрил дурибти, имкан, хIуни пайдалахIебарибси, Замана – арбякьунси, бирхауди – беткахъахъибси. Илди пикрилизи касили, гьаннала гIергъи гьалавяхI вашен. Замана заяли хIеберкIили, пикриухъи гъай бурес, адамтала бирхауди бетхIехъахъесли шикькайкIес, кьисматли гьаладихьибти лерилра имканти пайдаладарили, хIериахъес гIеббурули ахIену илди пасихIти дугьбани.
ВиштIахIейчивадли адамли пикри бяхIчихIейули хьалли, вегIла бегIтани дурути гIякьлумира насихIятунира гIямрулизир багаладиэсти ва пасихIти сари. БегIтачи лехIизурли ва илдани бурибси гьарил секIал ламусличил таманбиралли, чилра гIямрула дякьличив чевхIелкIан. ИлданикIун чули диахъубти хатIаби дурхIнази тикрархIедирахъес багьандан ва чучибра илди ункъли хIербиубли дигули, гъайкабикIути саби.
Амма гIергъиси замана пасихIкартала ва бегIтала гIякьлумачи лехIбизес хIейгути дурхIни имцIабикIули саби. Илдигъунтас гьанбиркули бургар саби бегIлара духути ва гIякьлучебтира или. Илкьяйда пикриикIусилакIун бекIлизиб дягI бумхIули бирар. Ванзалис ряхIмула маркаван ва адамлис гьигьикIес гьававан хIяжатсигу гьарил инсайс кагибси гIякьлу. Иличила мурт пикрибулхъути чеалкIуси наслула вакилти?
ПатIимат Кьурбанова
