Мартла 8 — хIебла, ванадешла, малхIямдешла ва дигила байрам саби. Илгъуна бархIи имцIаливан нешани мубаракбарес, илдас ванати гъай дурес чебиркур, сенахIенну нушала гIямрулизир бегIла хIяжатси адам сари – неш. Илини нушаб гIямру пешкешдарили, дунъяличир дакIударилра, илис саби бегI гьалаб нушани нешанас халаси баркалла багьахъес хIяжатсира.
ДиштIахIейчирад неш мурталра мякьлар рируси сари: илини нуша гIердурцулра, селичи-биалра бурсидирулра, гIямрулизир къияндешуни диалли – чараагарли кумекбиру, цархIилти хIечи къаршили кабизаллира – неш хIела шайчир рирар. Эгер къардухъадли, хIу кахIейкахъес лерилра цIакьани дяхIчииу.
Нушани гIямрулизир сархибдешуни диахъахIелли, неш саригу бегI гьалар разирируси ва гьатIира халати сархибдешуни диахъес уркIичердирура.
Илкьяйда биалра леб цацабехIти нешанала сегъуналра хIурматхIебирути, бегIтани ибси аргъес хIейгути. Севан малхIямли гъайрикIули риалра неш, иличи къаршили гъайбикIули, саби абикьнилис баркалла эс хIебалути. Рахли неш зягIиприкалли – иличи хIерудибарес хIейгути. Илдигъунти авараагартала баркьудлуми сеналра аргъес хIейгахъаси яра уркIили кьабулхIедиру. БегIла гьалаб вегI варкьибси нешла хIурматбирес гIягIнили саби. Илини нуша гIямрулизир ункъли хIердиубли ва гьарил секIайчи бурсидиубли дигни багьандан сари нушаб гIякьлуми дурутира. Илди хIедакьибтала гIердирес сеналра асухIебирар. «Хъатлаб хайнига барили хьаллира», нушани нешла гьалаб чебла ахъес хIедирехIе. Иличила хъуммартидая, хIурматла газета бучIанти.
Неш лерси хъали – шаласи бирар, нешличил беркIибси бархIи – разиси бирар.
Халаси баркалла багьахъес ва чесабиуси халкьани-ургабси хьунул адамла БархIиличил мубаракрарес дигулра дила ахIерси неш ва лебилра нешани. ХIушани бируси халаси ва къиянси хIянчи саби: азирна баркалла хIушала къайгънас! ХIушаб чIумаси арадеш, талихI дулгулра, мурталра гъамтала дигили алавдуцили калабая!

Ханум ГIялиева