Къистаман ГIябдуллаевала у Хядягъила шилизиб, ва гьарахъли шила дураб бахъли балуси саби. Даршдуслихъла байхъала дусмала гIямру илини шила школалис, сунела дурхIнас ва кьисматли бетаурси бузерилис харждариб.
Къистаман СултIановна ГIябдуллаева 1940 ибил дусла майла 10-личир ЧебяхIси ВатIа дергъла бутIакьянчи ГIябдулла СултIановла хъалибарглизир акIубси сари. Илдала хъалибарглизиб биштIахIейчибад бузери ахъли кьиматлабирусири, дурхIнани чули бирусилис жавабкардеш дихутири, мурталра халатала хIурматбирусири. РиштIахIели касибси бяркъ илини сунела мугIяллимла бузерилис хьулчили кабихьибсири.
Илала бузерила маргь, Буйнакъсклизибси педагогическое училище таманаили, бехIбихьудла классунала мугIяллимла санигIят касибхIейчибад бехIбихьибсири. Багьуди бедлугнилизи Къистаман СултIановна 1968 ибил дуслизир ракIиб — ГъярацIанила урга даражала школализир бехIбихьудла классунала мугIяллимли рузес рехIрихьиб ва 2025 ибил дусла сентябрьла 8-личиб Хадагила бекIлибиубси багьуди бедлугуси школализиб сунела бузери таманбариб. МугIяллимла цахIнабси бузерила манзил 57 дусличи абикиб.
2007–2013-ибти дусмазир Къистаман СултIанова цаибил категорияла учительница сарри. Илини бегIлара ахъси даражала мугIяллим сарливан сунела бузери тIашбатур. Илини бехIбихьудла классуназиб багьуди бедлугнила даража бегIлара ахъси кьиматличи балбикибсири. Барх бузутани ва дурхIнала бегIтани, бахъли дагьес хIебирути дурхIнала хасиятуни, илини гьамадли далули риъниличила бурусири. Ил дурхIнала имканти сегъунти сарил, илдас сегъуна кумек хIяжатлил бусягIят шакриркусири ва бучIантас хIяжатсигъуна кумек бирусири.
«Бузерилизиб наб мурталра дурусси бетуц мягIничебсири. Сен-биалра ахIи, пикридарили гьаладяхI кайцIути гунзри: дурхIни бучIуси иргъес, сабицун бузахъес, жавабкардеш дихахъес бурсибирутири. Илкьяйдали мягIничебси саби барх биахъес, цали цала хIурматбирахъес, юлдашуначил цабалгахъес, гIяхIти адамтили биахъес. Лерилра нуни далути, дарес рирути барх бузутазира гIердурира. Школа – ил лебталалра бархси бузери саби, цархIилван ил нуни гьачамалра кьабулхIебарира», — бурули сари Къистаман СултIановнани.
2023 ибил дуслизир дахъал дусмазибси сабухъчебси бузери багьандан, ва чеалкIуси наслулис багьудира бяркъра бедлугнилизи кабихьибси халаси пай багьандан республикала багьуди тIинтIирнила ва гIилмула шайчивси министр Я.Бучаевла Баркаллала кагъарличил шабагъатларарибсири. Илкьяйдали Хайдакьла районна администрацияла шайзирад ХIурматла Грамоталичи лайикьрикибсири. Илала шабагъатунала ургар лер чумал орденра, илдала ургаб «Нешла асилдешла» 2-ибил даражала орденра.
Камси ахIен школала дураб бируси бузерилизи илини кабихьибси пайра. Къистаман СултIановна бахъал дурхIнала неш сари. Сунела муруйчил илини 10 дурхIя халабаахъиб, илдала уркIбази бузериличи диги, адамтала хIурматбирни, чули бирусилис жавабкардеш дихни кабихьиб. Лебилра дурхIни школализиб ункъли бучIутири ва санигIятла урга даражала, чебяхIси даражала багьуди бедлугути мераначиб чула белчIуди даимбариб. Илала гехIелра уршили Россияла гIярмиялизиб къуллукъбариб. ХIябал уршили дявила тяхIяр-кьяйдализир бутIакьяндеш дариб, ца урши СВО-ла бутIакьянчи сай.
Ишди бурхIназиб илала лебилра дурхIни чула хъалибаргуначил хIербирули саби. Къистаман ГIябдуллаева, илдас ва илдала дурхIнас, лебилра сари-алавтасра гIямрула пасихIдешла урунж, паргъатдешла хьулчи, цIакь бедлугуси хъарихъли ретаурли сари.
Ил тамашала хьунул адамлис арати гIямру, дулгулра, гьарил сунени беркIибси бархIили акIахъубси, сунечи лайикьси хIурматличил алавруцили дигулра.
Х.Кьурбанова,
Хядягъила ши
