Чидил-дигара о­р­ганизацияла яра уч­реждениела ру­ко­­во­дитель сегъуна виал­ли­ра, илгъуна коллек­тив­лизиб бу­зерила сабухъ­чеб­деш, гьа­ла­бяхI башниличи умут­чеб­деш, цабалгундеш, баркь-бацла ка­гибдеш ва гьарил секIал дирар.
Пайдаагарси начальникли бузерила мерличибси низам­­ра булъа. Амма багьудлумачил, гIякьлуличил, сабурличил вегIиубли, нушала хала бегIтала гIядатуначи чекайзурли ва ишхIелла манзилла бетуцуни ункъли дяркъурси руководитель виалли, хIянчила мер, бикIуливан, вавалибирхъур. ИшхIелла манзиллизив «Замана» газетала бекI редакторли узуси жагьси, лайикьти багьудлумачил ве­гIиубси, нешла мез гьаладяхI ардукес къайгъилизивси, са­бур-яхIличил гьар секIайчи гъамируси ГIябдуряхIман Ис­мягIиловличира редакцияла коллективли халаси игьдибар бихьили саби ва чекабизурли бузес къайгъилизиб саби. Илди гьатIира уркIичеббирахъули, жагьти хIянчизартази бахъхIи бузути журналистуначибадли гIибрат кайсахъули ва илдала давлачебси устадеш гIебисахъули, бузахъес бурсибирули сай илини.
Бузерила мерличир сагали вакIибси руководительли сагадешуни дузесаалли, илини чебетаибси хIянчи биру бикIули бирар дубурланти. Нушала редакторгъунтачила бургар илдани илгъуна пикри бурусира. Сабурличил ва малхIямти гъайличил хIянчизартази сунела пикри аргъахъесра устадеш лер илала.
Ишди бурхIназибра бекI редакторли совеща­ние ду­раберкIиб ва насихIят­чи­дешла мягIничеб­дешличила, жа­гьилтас устадешчебти хIян­чи­зартани кумек гIеб­баахъес ва илди гьамадли ахIенси санигIятличи бахъхIи бузути хIянчизартани бурсибарес хIяжатли биъниличила баянти гьаладихьиб. Гьайгьайрагу, чебяхIси даражала багьудила заведениебазиб бучIули калунти жагьилтани редакцияла бузерила, бикIуливан, «алипуни» дяркъес къайгъни дакIудирули сари. Амма илдас насихIятчибани кумек гIеббаахъес чараагарли хIяжатли биъниличилара хъумуртули ахIен ГIябдуряхIман ИсмягIиловли. Илала гIяхIси пикри хIянчизартанира гIеб­буциб, ва ил бетуцличила чула пикрумира дуриб. Руководительли гьалабихьибси программализи кадурхули сари насихIятчидешла баркьудилис хасдарибти цацадехIти далилти. Илдазир чедаахъили сари хьулчидан журналистла санигIят бяркъес багьандан сегъунти бетуцуни пайдаладарес хIяжатлил.
Илкьяйдали къугъаси ихтилатла дазурбазиб дебали мягIничебси масъала баянбариб даргала миллатла культура гьалабяхI башахънилис, мезла давла чебирцIахънилис, даргантачила чедетаибти макьалаби ва аргъбаибти масъулти гьаладирхьнилис хасбарибси «Замана» газетала редакциялизиб.

ПатIимат Кьурбанова