Нана хIуливан ахIерли хIердарахъес
Лебилра гIялам халкь цаличил ца гъайбикIахъути, пикруми иргъахъути, хIялани дурути мезла кумекличил сари.
Мез агарти диаллири, жура-журала мераначиб хIербирути адамтани цаличил ца бархбас бузахъес бирути ахIенри. Лер лебтасалра цати, гьарил адамлис дагьес гIягIнити урусла мез, лер вегI акIубхIейчирад нешли далахъути нешла мезра. Илди кIидехIалра нушала улкализиб хIербирути адамтас гIямрулизир чараагарли гIягIнити сари. Мезли саби адамла миллат кабилзахъуси. Мез хIедалули виалли, чидил миллатла сайра викIара? Илала дурабадра нешла мез хIедалас эсра дебали цIахли саби. Урусла мезра нушаб дебали гIягIнидиркули сари. Илди хIедалути диахIеллири дучIес, лукIесра бекIлил къиянни бири. Багьуди касес университетунази кадурхес, хIянчи барес, цархIилти миллатунала халкьличил яхши-хуш дирес, декIарти мер-мусаличи дашес хIедирехIери.
Лерилра мез дебали хIяжатти сари. Мез агарли —адам агара, адам агарли — мез агара. Илди цIацIали дархдасунти сари.
Россияла халкьла мезанала БархIиличил лебилра гIялам мубаракбирулра. Нешли дагьахъурти мез хъумхIертурли дигулра. Нана хIуливан ахIерли хIердарахъес тиладибирулра. Миллатуни лералцадхIи, мезра дузули калаб!
Анжела Мутазова