Дубурла бяхIлизиб, кахси мерличиб, ца биштIаси ши  лебли буили саби. Ил дебали жагасири. Авлахъла гьавали уркIила гьав ахъбурци, шарабла шинни излуми черарки, дучIути арцантала тIамрани вайти пикруми деткайхъахъи. КъантIли буралли, тамашала мер сабри. Ил мерличиб биштIаси юртлизиб хIеркабирули лебри Муслимхъала хъалибарг. Илдала лебри авал дурхIя: Рашидра, Муршидра, Аминатра, Маликатра. Шилизиб бегIлара хIурматличил пайдалабикIути хъалибаргуназибадли ца сабри илдала. Сен? Дебали давлачебти сабни багьандан? Яра пачала кьамларив? Юх, ахIенри. Ил гIядатла хъалибарг сабри. Илди цархIилти кьяйдали хIербирутири. БегIти колхозла хIянчизартири, дурхIни школализи башутири. Илдас гIягIнили ахIенри дурхъати палтар, тамашала ваяхI, урхIагарти кьям-кIуцIул. Иилдас чIянкIли чархла арадешцун сабри гIягIниси. Къияндикибси мерличиб илди душмайсра бархли, кумекла някъ гьабатес хIядурлири. Се-биалра бетхIерули биалри, узи-рузини цалис цали кумекбири, гIеббурци. Чисалра диргалахIебулхъули, гьими-кьяс агарли, хIеркабируси хъалибарг сабри илдала.

Шилизиб цали ца балутири. Муслимла хьунул Муъминат лебтачилра ралрикибси, ралгунси хьунул адам сарри. Чис-биалра кумек хIяжатбикибхIели, илини кумекхIебарибси анцIбукь биубси ахIенри, гIягIнибикалри сунени беркала хIеберки цархIиллис бедлугусири илини. Муслим иличил ургъули вири: «ХIу ванзаличи карихьи, халкь хIечибадли башахъадлира (ганзбикIахъадлира) илди хIечи кьабулбиркути ахIен. Ил багьандан лебтасалра гIяхIси ретаэс гьалакмарикIуд, гьариллизи уркIи мабурид, мяхIкамдеш бирен». ГIяхIси дила мурул или, иличил кьабулрирки, амма ил сунела къиликълизирад гьамадли рухъес рирули ахIенри.

Гьачам чумал хьунул адам шичи бякьи, чарбирулри. Илдачил Муъминатра лерри. Илдала чула муйлачила гъай детаур: чили се бирулил, чили се хIебирулил, секьяйдали вяшкабикIулил. БегIлара рурибси халаси уркIила регI Раисат рикIар:

— Шагьарлизи хIянчила арякьи сай дила мурул. Шилизирти хIянчи илини хIянчилизи халдирули ахIен. Илав ца давлачевси адамла машиналичив узули сай. Ишар хIябал бархIили дирути арц илини ца бархIили дирули сай. ЛявкьухIели наб бриллиантла къаркъубачилси мургьила тIулека лебхуси саби. Илала багьалис колхозла машина асес вирар.

— Агь, Раисат хIелагъуна мурул хIейкиб кьалли чисалра, — или дукарбяхIиб цархIилти. Илдазирадли ца, къунбани ругьес хIерумсуси Хадижат сунела юртлизирти ваяхIличила хамли гъайрикIес рехIрихьиб. Арцли кабуцибси тах, мургьила стол-утни, шагьарлизир кIел тукен ва гIуррара дахъал секIал дуриб илини. Мякьлабтани балулри илдазибад цалра мар агни, или биалра, лехIкахъили кьабулкабиркулри, сенахIенну  сунела дурути тамандарахъес хIераталри, ил жанивар кьяйдали черулхъусири.

Дурути тамандарили гIергъи Муъминатлизира хьарбикIес бехIбихьиб.

— ХIелара мискинсилагъунти юрт-муса ахIенгу, хIу сен лехIкахъибсири?

Муъминат дукарряхIиб.

— ГъайбикIутала ургав лехIкахъес дагьри диусира виэс гIягIнили сай. Лебилра гъайбикIалли, чили се саби гьатIи иргъуси? ГъайрикIулира гьатIи, се буриша? ХIушани чебиуси ца дерхIла юртра, машинара тер, нушани чеббикIибси — колхозла хIянчира.

— Илди лерилра нушани чедиутачила бурес гIягIнили ахIен. ХIуни бура, хIед Муслимли се исусил, – рикIар Раисат.

— Тамашала суал саби хIела. Селра се дариша наб, ну ребкIили, гIелар кавлути? Лерилра тер дила. Ну селра аса рикIуси ахIенра. Се-биалра хIяжатбикалли, дархдикили нушани исуси саби.

— Нушани ца хьарбиэхIе, сунени цархIил буру, – кьабулхIебикиб иличи хьунри.

Илдигъунти ихтилатуначил илди чула мер-мусаличи баиб.

ГIебшнила манзил сабри. Шила халкь яниличи хIядуркабикIулри, напакьа бурчулри. Дугила акбар бучIуси манзил вацIализирад гIяжаибти тIама-гьама чедихулри. Гьар акбар бучIухIели, хIявбуцIи авдикIутири, амма гьанналис дикьути тIама-гьама селарил декIардарес вирули  ахIенри. Азбарлавси урцул гечдируси Муслимли илди аргъиб, ва хьунуй илди тIама-гьама чиларил декIардарес рирар или гьанбикили, ил жирариб.

— Байхъала сягIяталра тIамаличи лехIирхъулира, сегъуналра жаниварличи мешубиркули ахIен. ЛехIризи ца гьари, Муъминат.

— Жан Аллагь, урухиэсти тер кьалли. Я адамлайчи мешути ахIен, я мицIираглайчи мешути ахIен. ХIяйван-къача хIедакIиб викIусира ишбархIи шукру Аллагьлизи, аги. ГIяяркьянабани -мага, бяхъибси дугIла жанивар бургар.

— Валлагь багьесра хIейрар, – иб Муслимли. Гечдарили урцулра сабира, хъули абацIиб. Беркала хIядурбирули рархибси хьунул, начурбазиб хIязтабиркьути кIел къуймур рурси, ихтилатбикIули кабиибти уршби хIясиббирули, Муслим пикривикIулри: «Дила игъбар – дила хъалибарг. Шукру АлхIямдулиллагь».

Сен илдигъунти пикруми дакIибара илала? Ил анцIбукьлис бикьрили детарулри алавчарли чедихути гIергъити хабурти. Илдазибад цалра гIяхIси аги. Гьачамличиб-гьачам бубкIутира, изайзи биркутира бахъбикIулри. Разидешличил хъали-цIа дуцес гьариллис кьадарли ахIенри. КъантIли буралли, халкь-ургар гьими-кьяс имцIадиублири.

ХIера, Муслимхъала хъалибарг буки, кабихьес хIядурбикIулри. Муслим биалли,  кайхьес гьалав камси заманалис дура гьаваличи кайрусири. Илис паргъатдеш дигахъи, цIурцIбала тIамаличи лехIирхъи, улкути зубартачи хIерикIи, ЧевяхIсилис цагьатIи бархIи ункъли шалгIеббухънилис баркалла викIи, жагIяйчила пикривикIи. ИшбархIира ил дуравхъи къапула гьалабси уркьуйчи кайиб. ЛехIяхъиб. Бара гIяшдиубли, итди гIяжаибти тIамри чедихули лералри. Дугила паргъатдеш илдани булъулри. «Се сабира ит?» — пикривикIулри Муслим. Улкьайла гьалаб вачавархибси мура куц чебаили, Муъминатра иличи гъамриуб.

— ТIамрачила пикривикIулрив?

— ГIе. Гьалар агарти илди гьанна чинад дакIибтил балули ахIенра. Бархьаначи бурасли, наб илди гIяхIдилзули ахIен. ШаладикибхIели багьес дураулхъас.

— Нура хIечил ляркьяс.

Муслим дигиличил Муъминатличи хIеризур, хъуцIарличи някъ кабихьили, — гIягIнили ахIен, — иб.

БерхIи гьаббакIиб. БерхIила нуранани биштIаси ши шалабариб. Мякьлаб кабухъунси хIеркI тамашали рурхIулри. Ранг-рангла вавни датдухъун. Арцантала далуйти чедихулри. Авлахъличир хIяйван-къача гIяйдиуб. Чисрил шала жявли дикилри, чисрил бахъ бухъянси дуги бакIилри. БерхIила хIунтIендешличил Муслимра чеваргъилри, гIяярличи укьес хIядурикIулри, дуравхъи лехIизурхIели, дагла тIамри аги, или биалра, уркIилабси паргъатдеш буири. ХIядуркайахъубли халасигъуна урши Рашидра сайра вацIализи арбукьес дурабухъун. Се-дигара бирар или илдани тапанчабира, беркалара дарх касиб. Зумаси вацIализибси биштIаси дякькад дудешра уршира гьайкабиублири. Рашидлис шятIикIес яра далуйта учIес дебали дигахъусири. Гьанналисра гIяш-гIяшли макьамти дучIулри.

— Рашид, нуни гьар даим хIела цIумъала, шятIла тIамала иргъулра, амма се дучIулрил багьес вирули ахIенра. ХIела челукьуси-мага лебу, яра къуймурли хIяйранварилрив?

— Челукьуси-декIар агара дудеш. Челукьес-декIар се бирара вегIла хъалибарг арали биалли? Къуймурра къаршихIерикиб, къарширикесра гьачам жявли саби, — дукарвяхIиб ил.

—  ГIур сен дигIянали далайикIулри?

— Назмурти хъумхIертес макьамличил тикрардирулра. ГIягIнибикибхIели зайдикIахъули дучIес.

— ВяхI, хIера гьатIи, сен гIяхIси пикрил. Бархьли викIулри, бархьли, — разивиуб дудеш. СенахIенну илини балулри, сяхIбатличиб ахIи, далай хIебучIни.

Рашид вецIну гехIра дус виубси, кегIебти чарх-бекIла вегI, цIудара хIулбала вегI, хIянчилизивад уруххIекIуси жагьилси урши сайри. Ишдус октябрь базличив ил гIярмиялизиб къуллукъбарес аркьусири. Илала цIумикIесра сабаб лебсири. Илис унрашан жагьси рурси гIяхIризурлири. Амма гIярмия ахъайчи чизилра багьахъес дигули ахIенри.

— ХIебиалли, урши, набзира дакьахъа хIуни тикрардирути. Сегъунти сарил багьес дигулрану, – иб Муслимли бара дукаркIули.

Жагаси макьамличил Рашид вехIихьиб:

— Ахъушан шунгъарливан,

Дайдяхъира хIела ши,

Шиниш кьар маркаливан,

ДирцIахъули хIулби ши!

Урчи чулан даркьибил

Чаргасла газа бебкIаб.

ХIу исбагьи раркьибил

ХIела аба маребкIаб!

ЖумягIла бухIнаб арбягI,

БиштIал шила къугъал жан.

Рурсбала рухIнар жайран

Ирмайрабагу хIяйран.

— ГIяй тIама бат! – хъатIикIулри Муслим. Гьанна илини чIумали багьур абдал дигайли ил мутIигIварни.

ВацIала дайла баилри, сегъуналра чебихуси тIама аги. Тамаша. Шилизи дикьути, ишар сен агартири? КьацIла беркес или, илди мигла галгала уди кабииб. Тапанчаби уркасес алавбакIибси замана вяшла тIама. Мякьларти гIинтIла кьадуби шикьдухъун. Илди хIякбизур. Багьлали гъамбирули кьадуби алавдариб. ШикьатIала тIашдизур. Кьадубазибад биштIаси кецIала гъямла дурабикиб. Гъамиубли Муслимли кьадуби гьаргдариб, илав кецIара буцили, хIябал дуслагъуна виштIаси уршира леври. Уршира дудешра цаличи ца хIербизур, гьигь абатур. Муслимлис виштIасини някъ гьабатур, кецIа къайбикиб, Муслимли ил уркIецIиличил хIерварили ахъуциб.

Урши дебали кегIебсири, дяхI-някъ дясири, палтар гъярдердилри. Някълизибси хъула кецIа илини батиули ахIенри. Рашидра Муслимра хIяйранбиублири. Чинад вакIибси, чили вархькатурсив, сен-сен вацIализив жанивартани ил ватурси? Дахъал суалти лерри. ДяхI умударес ил катурхIели, вебшиб. Илис гIергъи Муслимхъалира гьайбиуб. ХIеръалли, берубси галгала биштIаси тIярхъилаб илди дигIянбикили. ЦIуцIвиили Рашидли ил тIярхъилавад сайтIун, иличил барх кецIара бакIиб. Илдас кьацIла кесек гьабатур. Букесбииб.

— Гьанна багьлахIебарили иш хъули аркехIе. Умуварили, кьацIли укахъи, чила-саял хьархъарбиэхIе, – иб Муслимли.

Илди хъули чарбухъун.

Азбарлизир палтар диршуси Муъминатли илдала къаралди чебаиб. Чихъали сабира итдала някъбазибти, или пикририкIулри. Мякьла гъамбиубхIели, чебаиб. ХIулби халадаахъили иб: «Ахърила ВегI, вацIализиб биштIати дурхIни бирни хIебагьурра!»

— УркIмарулхъад хьунул, иш дугIла жанивар ахIен. Секьяйда вацIализи иш вагьариубсил нушани балехIе. Гьанна ишичи хIуни хIеруди бара.

Муслимли ил ванзаличи катур. Муъминат чераибмад виштIасини кецIа баткаиб, илала хIевала хьар буцили, барх хъули гьайбиуб. Муъминат дукарряхIиб. Муслим шила сельсоветличи арякьун.

ВиштIаси шинничи дебали разивиуб. Ил дукаркIули тIасла ухIнав шиннизив тIяхIикIулри. Иличи разили хIеррикIуси Муъминатла хIулбазир биса дагьардиуб. Секьяйдали их мизла чатIа веткайхъахъусил балули ахIенри. УмуварибхIели ил вахъ жагасиригу. Сунела дурхIнала палтарли вегIварили, ил вахес катур. Ил замана Муслим чарухъун.

Ил дебали хумарлири, сенахIенну сельсоветли бурни хIясибли, цIуръабиубти, бегIтани балтути биштIати гьанна къаршибиркулри. Илра илдазивад виэс асубири. Сельсоветли алавти шимази хьархъардаиб. Чила-биалра виштIаси веткахъили виалли, илдачи бакIахъес буриб.

Шилизи чедихути тIама-гьама илдала урдухъун. Уршиличи чедухъес алавдикIути хIявбуцIазивад кецIали ил валтахъулри. Урухвиубси виштIасила, гъямбикIуси кецIала, чIярдикIути хIявбуцIала тIамри гъудуркайубли, се-сабил багьес бирули ахIенри. Гьанна илди тIамри деткахъиб. Гьалабси паргъатдеш чарбиуб.

ХIера, шел бархIи дикиб, иргъуси селра агара. Ил заманала ухIнав Муъминатлис ва Муслимлис ил чула уршиван дигахъулри, рурсбира ничализибван илизиб биркьулри. КецIа, дебали гIяхIси пукьара барили сабира, азбарла бигьири. Гьанна илис дурхIнани «Серх» ибси ура бедилри. Ил ура саберхурси кецIачи дебали балбикилри.

Ца бархIи шила сельсовет илдачи вакIиб. Куц хIясибли багьеслири гIяхIси хабарла агни. Илини багьахъур, мякьларти шимазив чилалра веткахъибси дурхIя агниличила, хIебиалли, ил цархIилти шимазибти бегIтани вархьватурли виэс гIягIнили сай.

Ил анцIбукь дебали хIейгибизеслири, сенахIенну ил халкьла адамдеш деткахънила лишан сабри. Азирла ухIнав ца адам сайри цархIилличи уркIи изули къаршивиркуси. Гьай-гIяйиб гьай, вегIла дурхIначира се хIерлил балули ахIенри.

Заманала барсдеш или бугьулри. Иличиб гIяйиб агни хIебалули. Замана чинабалра ца сабри, амма халкь барскабиублири.

Сельсовет чеваибхIели, хумарбиубти Муслимла рурсби гъайла аргъибхIели разикабиуб. Гьанна муртлисалра СягIид нушала сай или чIумали байдариб. ДурхIначи хIербизурти бегIтира иш нушаб кьадарли урги или паргъаткабиуб.

(Хабар)

Анжела Мутазова