Сергокъалала шиличибад гьарахъли ахIенси вацIализив, шаладикес камси замана калунхIели, вайнукьабани жагьси урши — полицияла лейтенант, кавшиб. Илдани тупанг къяйкбарес гьалабси манзиллизир илини бегIла гIеларти, кIел дев дуриб. Илди дугьбани, лебил Россияла ва нушала республикала жамигIятла гIямрула ва пикрумала бетуц барсбиахъуб. Илала «Дузеная, узби!» дахъал миллатунарси Россия ва Дагъистан уржахъес, улкала ва халкьла челябкьла ахIерабарахъес, бузахъес, хIербиахъес калунтас васиятли детаур.
2016 ибил дусла гIебшнилизиб, Кремльлизиб, Россияла Президент В.В.Путинна мякьлаб уршила агрила кьутIкьудешли дарманбарибти игитла нешра дудешра тIашли саби, Президентли уршила нешлизи игитла мургьила зубари бедлугули сай, амма бегIтала уркIби паргъатдиахъес чинаралра, чилилра дугьби даргес бирули ахIен.
Игитла дудеш, уршила васият бетурхахъули узес вехIихьиб. Дунъялизибад уркIи хIебердили хIериэс багьандан узес гIягIнилири, илиникIун урши вебкIили верхIел бархIи диркухIели дудешра хIяриихьиб.
Нуни, Россияла Пачалихъла Думала депутат НурбяхIянд МяхIяммадович НурбяхIяндовла чумал базла бузерилизирад касибти цацадехIти анцIбукьуначила бучIантази бурес пикрибарилра, сенахIенну гьаннала заманала Россиялис ва Дагъистайс мурталра багалавируси, халкьличил варх вируси депутатла бузери дебали мягIничебсили бетаурли саби.
Н.М.НурбяхIяндов 2021 ибил дуслизив «Цаси Россия» партияла шайзивад 8-найс бикIибси Пачалихъла Думала депутатли викIибсири. Ил «Цаси Россия» партияла генеральный советла член, Пачалихъла Думала багьуди бедлугнила шайчибси комитетла Председательла заместитель сай.
Ил Россиялизивра Дагъистайзивра бахъли валуси, дигахъуси, хIурматбируси адам виъниличивад вехIихьес гIягIнили саби. Гьайгьайра ил валули сай дурала улкназивра, илкIун Америкали, Евросоюзли, Канадали, Великобританияли, Австралияли, Японияли ва цархIилтира западла улкнани чула санкциябау кабатуртала сияхIлизи бегIла гьалабтала къяйлизи велкIи сай.
Депутатла бузериличила бурес пикрибарили, наб бегIлара гIяхIдизурти анцIбукьуни, дарибти хIянчи чердикIира, сенахIенну лерилра дарибтачила сеналра бурес хIейрар. Дарибти, детерхурти дебали дахъал сари.
НурбяхIянд НурбяхIяндовли майла 7-личир, Кремльла кIялгIялизив, шадлихъла аги-хIяйзив Россияла Федерацияла Президент В.В.Путин сунела къуллукъуначив тасдикьварнила балбуцлизир бутIакьяндеш дариб.
Майла урчIемличир депутатла хъарбаркь хIясибли, илала кумекчини сунела хъулир ВатIа ЧебяхIси дергъла бутIакьянчи Валентина Георгиевна байрамличил мубаракрариб. Ил 1944 ибил дуслизир югла шайчибси Сахалиннизир эвакогоспитальлизир рузусири. Дергълис гIергъира медицинализир рузули калун, кьанниван хъалибаргличил рарх МяхIячкъалализи гечриубсири. Байрамличил ветеран мубаракрирни гIяхIси гIядатли бетаурли саби.
Н.НурбяхIяндовли Россияла Правительствола Председатель М.В.Мишустин, багьуди бедлугнила министр С.С.Кравцов чула къуллукъуначиб тасдикьбарнилизир бутIакьяндеш дирули сай.
2024 ибил дусла майличиб Пачалихъла Дума халаси къайгъила бузерилизиб саби. Депутатунани лебилра Россияла Федерацияла Правительствола министрти чула къуллукъуначиб тасдикьбариб. Заседание 8 сягIятличибра имцIали бухъянбитIун. Н.НурбяхIяндовли илала бузерилизир жигарла бутIакьяндеш дирули сай, мурталра сунечи тIалабкарли узули сай. ГIур сунела Телеграм каналлизир детаурти анцIбукьунала, детаурти дарсдешунала, сагали кьабулдарибти хIукмуртала мурхьси мягIна иргъахъули сай.
Бурес чебиркур, кабизахъурси график хIясибли депутатуни 3 жумягI Москвализиб Пачалихъла Думализиб, ца жумягI саби бикIибти мер-мусаличиб, регионтазиб бузути саби.
Регионнизив узуси замана Н.НурбяхIяндовли сунела далдуцунала график, мерличирти, лерилра журала, гьуни чебиахъути органтачил балбиркахъули вирар. Иличибли бузери сабухъчебсили бетарахъу.
Майличив, регионнизибси бузерила жумягIлизив, 58 ибил СОШ-ла директор Ш.ГIялиевличил гьуниваиб. Школализиб илис «ванзаличилси бархбаслис», мурталра халкьла ургав вирнилис, уркIи гьаргси ихтилатикнилис, сецад вархили виалра гьуниваэс замана бургнилис баркалла бикIули саби.
«Дузулра, Узби» бикIуси полигонничир депутатла кумекчи Рустам Бидашевла ва Россияла дявила искусствола Союзла Дагъиста регионнизивси руководитель М.Халиловла кумекличил СВО-лизиб дудешуни алхунти 30 дурхIялис хасдарили дявила-тактикала хIязани дурадеркIиб. ХIязани тамандиубли гIергъи дурхIначи хъумхIертнила савгъатунира, байрамлисван балгунси кьумурра хIерлири. Илдигъунти далдуцуни гьаман дурадуркIни, гIядатли бетаурли саби.
Красноярский крайлизир, губернатор Михаил Костюковла сипталичил «Гьаннала заманала урехи хIебирахънила далдуцуни – Антитеррор» бикIуси хасси мажлислизир бутIакьяндеш дариб. ДурхIначил уркIи гьаргси ихтилат дураберкIиб, жагьилтала гIямрулизи бархибдеш бихуси идеологияличи къаршили виэс хIяжатли биъниличила бурули гъайкавхъун.
«Ил МяхIячкъалализи вакIибхIели, нушачи телефоннизибад зянкъбикIути, гьунибиути, кьабулбирути бахъал бирар, дахъал гьунибаъниби детурхар. НурбяхIянд МяхIяммадовичли адамтас кумекбарес багьандан сунезибад лябкьуси биру», — викIули сай ихтилатлизив депутатла кумекчи.
МяхIячкъалализиб «Цаси, Россияла»-ла приёмнаялизи декIар-декIарти шагьуртазибад ва районтазибад 10 адам дугьабизур. Н.НурбяхIяндовли лерилра дугьабизуни хIердариб, пикри бяхIчихIеили цалра дугьабиз хIебатур.
МяхIячкъалализив гIилмула ва багьудила министр Я.Бучаевличил варх 37 ибил, Россияла Игит МяхIяммад НурбяхIяндовла уличилси, гимназиялизи вякьун. Пачалихъла имтихIянничи гимназияла хIядурдеш ахтардибариб, бучIантачил, учительтачил, школалис гьуни чебиахъутачил ихтилатбариб. «Школала гIямрулизибси хIела бутIакьяндеш нушаб дебали мягIничебси саби», — бикIулри учительтира бучIантира. Илдани чула гимназияличи пахрубирулри.
Илини Хайдакьла районнизира архIя дураберкIиб. «Ореховая роща» ва «Огонёк» бикIути дуцIрумлизиб дурхIнани бамсриихъути лагерьтала бузери ахтардибариб, илабси беркала сегъуна сабил, бяркъ секьяйда бедлугулил хIясибдариб. Лагерьти тIабигIятла бегIлара жагати мер-мусаличир мерладиубли сари.
Н.НурбяхIяндовли МяхIячкъалализир детерхурти гIурра чумал балбуцлизир бутIакьяндеш дариб. Сергокъалала шилизибси 2-ибил школализи вякьун. 9-ибил классла бучIанти Пачалихъла имтихIяйчи хIядурбикIулри. Школализиб Н.НурбяхIяндовличи мугIяллимтира бучIантира мурталра хIерли бирар.
Республикалис гьуни чебиахъутачил варх Лавашала районнизи вякьун. «Дубуртала тIама» бикIуси, Госсоветла ХIурматла Председатель М.МяхIяммадов гьаниркахъули дураберкIибси спортла фестивальлизир бутIакьяндеш дариб.
Июньна 16-личиб Кьурбан-Байрам сабри, мурталра бируливан, сунела хъулив сай, бегIлара чеббикIибси бусурман динна байрамличил Телеграм каналлизир жамигIятлис мубаракла дугьби дурхьули сай, гIяхIлира, гъамтира хъулиб кьабулбирули сай.
Илини Дербентла администрацияла бекI ГIяхIмад Кулиевла тилади хIясибли «Цаси Россия»-ла приёмнаялизиб шагьарла халкь кьабулбариб. Илдала дахъалгъунти дугьабизуни, хIербирути мер-муса къулайдарниличил дархдасунтири. Шагьарла халкьла дахъал челукьути суалти лерри, илди арзес багьандан чедирти хIукуматла органтала кумек гIягIнилири. Халкьла дугьабизуни детерхахъести тяхIяр-кьяйда далдурцу.
Дербентлизир, МяхIячкъалализир вайнукьабани дурадеркIибти гуж-зулмула, анцIбукьуназиб бяхъибти полицияла хIянчизарти чебаэс больницализи гьаввакIиб. Илдачил, уркIи гьаргли, гъайкавхъун. Бяхъибти гIягIниси кумекличил гIеббуцилри.
Августла бехIбихьудлизиб Н.НурбяхIяндовли Пачалихъла Думала хIебла сессия таманбиъниличила балахъули сай. Бузерила бурхIназир 331 хIукму кьабулдарили сари. «Цаси Россия» партияла шайчибадти депутатуни, имцIаливан, Президент В.В.Путинна дугьабизлизирти хъарбаркьуни детурхахънилизиб бузули калун. Кьабулдарибти дахъалгъунти хIукмурти дурхIни лебти хъалибаргуни, СВО-ла бутIакьянчиби, пенсияличибти бухънаби гIеббуцниличил дархдасунти сари.
Думализиб бируси, халкьли чехIебиуси хIянчи, депутатла бузерилизиб бекIлибиубсигъуна саби. Н.НурбяхIяндов мурталра сунела мерличи кайили узули сай, гьарил хIукму тасдикьбирухIели, сунела яхI-ламусли кьабулбарибси тяхIярли тIама бедлугули сай.
Республикализиб багьуди бедлугнилизиб бузутала Августла совещаниеличир Н. НурбяхIяндовлира бутIакьяндеш дариб. Пачалихъла Думали, багьуди бедлугнила шайчир сагали кьабулдарибти хIукмуртачила бурули докладличил гъайухъун. «МугIяллим санигIятцун ахIен – дурхIнас багьудира бяркъра бедлугули узусила чихъси у саби», — викIулри Н.НурбяхIяндов жамигIятла ургаб педагогли бурцуси мерличила гъайикIули.
Дахадаевла районнизиб, ахъти дубуртазиб мерлабиубси Кубачила шилизи вякьун. Къиянти шуртIразиб хIербирути хъалибаргуназибти дурхIнас, школала гIягIниахълумачилти тавруми савгъатдариб. Гьар дусла, «Цаси Россия»-ла, «ДурхIя школализи хIядурвара» бикIуси балбуц гIеббуциб. Илкьяйдали, Кубачила художественный комбинат 100 дус биъниличил бархбасунси, лебил Россияла, халкьла някъла устадешла ва пагьмула фестивальлизир бутIакьяндеш дариб. Дубурлантас НурбяхIянд МяхIяммадович хIурматла гIяхIялра, шадлихъла тямадара, марси юлдашра сай. Дубурлантачил касибти суратунани чебиахъули саби, секьяйда дигиличил алавуцилил ил гIядатла дубурлантани.
БутIакьяндеш дариб МяхIячкъалала мугIяллимтала Августла совещаниелизирра. Илавра, багьуди бедлугнилизир Пачалихъла Думали сагали кьабулдарибти хIукмуртачила, гIергъити дусмазир диахъубти сархибдешуначила бурули гъайухъун. Дагъистайзир, багьуди бедлугути хIябал азирличирра имцIали организация дузули сари, миллионничибра имцIали бучIантас, 100-азирцад мугIяллимли багьуди бедлугули саби. ГIергъити дусмазир 190 сагати школа ва дурхIнала анхъ дузескаили сари. Дагъистайзиб, урга даражала санигIятлашалси багьуди бедлугни, гьарил шайчибад гIеббурцули саби, илгъуна санигIятла адамти экономикализиб имцIаливан хIяжатли саби.
Россияла Федерацияла дахъал мер-мусаличиб бузути Дагъиста Правительствола вакилтачил гьуниваиб. Республикали Россияла 52 регионничил экономикала, багьуди бедлугнила, арадеш бихIнила, культурала,туризмала, спортла шайчирти вягIдурти дигьи сари. Ил шайчибси бузери гьалабяхI арбукес гIурра гIяхIцад имканти лерал.
Сентябрьла 12 – адамти кьабулбируси бархIи сабри. ИлхIели имканти алкIули дирар адам кьабулварес, иличи лехIизес, челукьуси аргъес. Ил бархIи, МяхIячкъалализив хIерируси адамлис багьуди бедлугуси организациялизи хIянчиличи керхахъес, «Гъабзадешла орден» касибси СВО-ла бутIакьянчис дявила хасси балбуцла бутIакьянчила удостоверение касахъес, Хайдакьла районнизирадси хьунул адамлис Белгородла областьлизив кавшибси уршилис дедлугути арц касахъес кумекбарес бетаур.
«Халкьличил гьуниваибхIели сихIру дарили лерилра тиладлуми детерхахъес хьулирули вирар, амма лерилра детерхахъес сеналра бетарули ахIен.
70 процентличирра имцIали хъарбаркьуни детурхули дирар, илдазирад гIяхIцадла кьадарлизир, лерси мерличир ва ил манзиллизир, амма гIяхIцад масъулти дирар сеналра детерхахъес хIедирути. ИлхIели НурмяхIяммад МяхIяммадович дугьабизуртачил сабурличил ихтилатикIар, гьар секIал иргъахъу, дугьабизурти гьимхIебуркIахъа. Иличибад адамти разили арбашули бирар», — викIули сай депутатла кумекчи Рустам Бидашев.
«Цаси Россия» партияла руководитель Владимир ГIябдугIялиевич Васильевла хъарбаркь хIясибли, сагали умударибти жярга-зекъли дицIибти мер-муса ахтардидариб. Иларти хIянчи Президентла «Умуси улка» бикIуси проектла дазурбазир дурадеркIибти сари. Каспийскла, Буйнакъскла, Хасавюртла, Южно-Сухокумскла жярга-зекъли дицIибти мер-муса лутIиличи кадаайчи умудариб, илди сагаси гIянжили кIапIдариб, шила хозяйстволизиб бузахъес 35 гектарла ванза чарбариб. ДурадеркIибти хIянчи депутатли разидешличил кьабулдариб.
Илала дурабадра, В.ГI.Васильевли республикалис гьуни чебиахъули хIейалра, экологияла шайчиб нушаб кумекбирули виъниличи разириубра.
«Никамед» бикIуси медицинала центрла директор Аминат МяхIяммадовачил вягIдалавиубли, СВО-ла бутIакьянчибала кIел хъалибарглизибтас, биштIа-халатас арадеш бихIнила шайчирти лерилра хIялумцIлаби дурадеркIахъес кумекбариб. ХIяжатли биалли илдала арадешра къулайбирахъу, медицинала центрла бухIнаб, яра амбулаторияла тяхIярли, хъулир дармунти дирули.
ГI.ГIялиевла уличилси спортла КIялгIялизир, шадлихъла аги хIяйзир детерхурти, 1999 ибил дуслизир Дагъистайчи чедухъунти халкьани-ургарти къачагъунала кьукьни дарбадягъиндарибхIейчирад 25 дус дикнилис хасдарибти ва Дагъиста халкьанала Цадешла бархIиличил цугдикахъибти байрамла далдуцуназир бутIакьяндеш дариб. Азирти адамти кабурцуси комплексла трибуналичиб Россияла Игитуни, дургъбала бутIакьянчиби, хIукуматлис гьуни чебиахъути, СВО-ла бургъанти, халкьла Собраниела депутатуни, Москвализибад, СФО-лизибад, цархIилти мер-мусаличибад бакIибти гIяхIли кабиили саби. Концертла программала гIелаб, ца минут лехIкахъили, лебилра ВатIан багьандан алхунтала хIурматбариб. Илав депутат сунела халкьличил варх сайри.
Москвализи чариубхIели, депутат ГIябдулхIяким ХIяжиевличил варх РФ-ла бусурмантала управлениелизи вякьун, илаб бетерхурси, халкьани-ургабси, ХХ-ибил, бусурмантала мажлислизир бутIакьяндеш дариб. Сунела къуллукъуназив сагали викIибси шайх Равиллизи Пачалихъла Думала Председатель В.В.Володинна саламтала ва мубаракла кагъар бедиб.
Сентябрьла ахирличир, хьунуйчил варх, Москвализир бетерхурси Сергокъалала районнизирадси машгьурси писатель, публицист, жамигIятла хIяракатчи УмуряхIил Шяпиева акIубхIейчирад 100 дус дикнилис хасбарибси юбилейла балбуцлизир бутIакьяндеш дариб. Балбуц Россияла писательтала Союзла ЦIуба заллизиб бетерхур. Илав Россияла писательтала Союзла Председатель Николай Иванов писательтала Союз акIубхIейчирад 90 дус биъниличил мубараквариб.
Николай Ивановли Игитла бегIтачил жагаси ихтилатбариб.
Сунела санигIят ва уркIила пикруми хIясибли математик ва экономист Н.М.НурбяхIяндовли лебилра сунела замана ахIерабирули ва сабухъличил харжбирули вирар. ХIера, октябрь базличиб «Цаси Россия»-ла приёмнаялизиб илини гIурра 8 адам кьабулбариб. Илдала дугьабизуни детерхахъес виубси тяхIярли кумекбарес чесиб.
Халкьла гIямрула шуртIразиб камси биалра къулайдеш акIахъес пикриикIули, гьарил бархIи вамсни хIебалули узули сай. Ил шайчирти хIянчира камдирули ахIен.
Сагаси Хушет ва «Ветеран» бикIути, МяхIячкъалала мякьларти, посёлокуназир сагали тIашдалтути школабазирти аги-кьяйда сунела хIерудилиу касиб. Илар, 604 бучIанти кабурцути, кIел школа тIашдалтули сари. ХIянчи чебаахъибси тяхIярли детурхули сари, амма школаби шинничил гIердуцнила масъала арзили ахIен. Ил шайчив шагьарла бекI Юсуп Умавовличил гъайкалхъан.
НурбяхIянд МяхIяммадовичли лебил халкьличил, шагьуртас, шимас, школабас гьуни чебиахъутачил, дурхIначил, барх бузути депутатуначил ихтилатикIес балули сай. Ил даим гIядатла адамтала ургав сай, иличил гьунибаэс, ихтилатбикIес бахълис дигахъули саби, лебтачилра валиркули сай, мурталра халкьлис, республикалис, улкалис къуллукъличив сай.
Сунела уршиличилгъунти балагьла анцIбукьуни кахIедикахъес сунезибад лябкьуси бирули сай, илкьяйда «Узес» гIягIнили саби, дунъяличир даршудеш, паргъатдеш калахъес, бархьдеш даим чедибиркахъес багьандан.
Муъминат Хаттаева
