Адам хабарагарли сегъуна-дигара анцIбукьличил вяхIигули сай. ИшбархIи мицIирли левси адам жагIяйс убкIули сай, арадешлизиб нукьсандеш агарси — пялхъли зягIипиркули сай. ИшбархIи разиси, гIур хIеръибхIейс хумаркайрули сай.

Дебали бархибси манзиллизир хIердирулра нуша. ИшбархIи хъали-цIа лер, жагIяйс пашделхъули сари. СекIайчи бирхауди агара. ХIера, илкьяйдали хабарагарли кадикиб чумра анцIбукь, сарира дебали децIагести.

Илдазибадли ца МяхIячкъалализиб гьалабван бетаурси, лебил халкь уркIаибси, гIяйибагар адамла гIямру къябдердахъибси, хъулиб хъалибаргличил гьуниваэс хIейубси. Иличи мешути анцIбукьуни даим кадиркули сари. Илди дурадуркIути адамти селичила пикрибикIутил балули ахIенра.

Барибсилис танбихI агарли кавлан бикIулив? АхIи нушаб лерилра секIал асудирути сари бикIулив? БегIтачи, чула хъулибтачи сен илдани пикри бяхIчихIейуси? Сен цIахдешла хIянчи хIебирис хIебикIутив? Вайси секIал барес лебилра сен гьалакти? Гьачам вайси баркьуди дураберкIибхIели, илала ахир хайрила хIебирни чебаибхIели, цархIилтанира илгъуна сен тикрарбируси? БиштIаси дунъяличиб даршудеш бузахъули хIербиэс сен хIебирути? ТаманхIейрутив дунъяличир хIиллаби? ГIуррара адамтас сецад биса картIес гIягIнилив? КахIебурхутив вайдеш бихути адамти? ТаманхIейрутив кахти хабурти? Суалти, суалти, суалти!

Анжела Мутазова