Нушала ВатIай 1945 ибил дуслизиб ряхIмуагар душмайчибад чебяхIси Чедибдеш сархибхIейчирад илцадра дахъал дусми ардякьи ахIен. Амма, нушала мурул адамтас сагали дургъби чIямдарес кьадарбиуб. Сергокъалала районнизибадра ВатIайс къуллукъбирути мурул адамти бахъал саби. Илдазивад цаличила иш белкIлизиб бурес дигулра.

Рабазанов Рабазан МяхIям­мадович акIубси сай Сер­гокъалала районна УбяхI Мулеб­­кIила ад­ми­нист­ра­циялизи кабурхуси ЦIур­лиу­ма­хьилизив, 1984 ибил дуслизив. Шила школа таманбарили гIергъи, Рабазан Волгоградла пачалихъла университетла «философия и социальные технологии» бикIуси факультетлизив учIули калун. Багьудлумачи вегIиубли, ил ВатIа гьалабси чебла ахъес гIяр­мия­ли­зи арякьун.

ВатIайс къуллукъбирнила санигIят мурталра хIурматласи, багаласи, мурул адамличи балбикибси биъни балули, Рабазан МяхIяммадовичлира ил гьуни чеббикIиб. Рабаза дудеш МяхIяммадлис (МяхIям­мад­ся­гIидлис) ва неш Муъминатлис уршили ил санигIят чеббикIни тамашабилзули ахIен. ВиштIали левай, Рабазан хьуликIусири гъабзадешличил, жагаси формаличил, някъ­лизиб ярагъличил улкалис, халкьлис багаласили ветаэс. Ил сунела кьас бе­тер­хахъурли, 2011 ибил дус­личивад вехIихьили Ва­тIайс къуллукъбирули узули сай.

2022 ибил дуслизив Украинализиб дурабуркIуси дявила хасси балбуцлизир взводла командирла заместитель сайливан бутIакьяндеш дирули 5 баз калун. КIинайсра, ­ил­ди мер-мусаличи вякьи, чу­мал баз калун. Илабти халкь, дургъбала замана инжитбирути бухънаби, биштIати гьачам чебаибсини хъумартес хIейрар или викIули вирар гьаман ил. Нушала бургъанти хIербирнила тя­хIяр-кьяйдаличила гъай детаур­хIели, бара дургъби дехIдихьибси манзил нушала арцлис, гривентачил ахIи, селра асес дирули ахIенри, ишарадли дурхьути кумекунани ункъли гIер­дурцира или бурулри Ра­ба­зай. КIинайс вякьунхIели, берк-берж­лашалси аги къула­йбиуб­­ли­ри.

Хъалибаргличивад гьа­рахъти, ряхIятдеш агарти гIям­ру диалра, ургъаннис су­нела санигIят дебали ди­гахъу. Урехи хIебалуси, ур­кIи чIумаси гъабзацун ви­рар, някълизи ярагъра ка­си­ли дургъбази укьес, тяп илгъу­на сай Росгвардиялизив пра­пор­щикли узуси нушала Ра­ба­зан­ра.

ВатIайс кумек хIя­жат­би­кибхIели, улка мяхIкам­барес дурабухъунти мулебкIанти бахъал саби. Илди-ургаб леб Рабаза гъамтира: узи – Руслан Рабазанов, узикьар – Мя­хIям­ма­димин Назирбеков, неш­ла узи – МяхIяммадкамил Мя­хIям­мадхIябибов.

Шантани мяштIбарести кIел урши ва кIел рурси абикьурти, Рабазайс ва Руслайс илгъуна патриот бяркъ бе­дибти МяхIяммадсягIидлис ва Муъ­минатлис баркалла биаб. Неш-дудешла уркIбас ди­гуливан илдала дурхIни чинаб-биалра ара-сагъли Аллагьли хIербараб! Чула гIяхI­гъабза дурхIнала гьар­бизунани хIулбуркIахъули, та­лихIчебли, чIумаси ара­дешличил калаб бегIтира.
Бузрадли хъа вегI хъа­либаргли чехIейухIели, ил уре­хиласи хIянчиличив узу­хIе­ли, хаслира — дургъбазив ургъухIели, илала хьунуйсра пикрумани къагърарибти, зянкъличи хIерли паргъатдеш хIебалути бурхIни дахъал дирар. Илкьяйда хIерли бирар хIян­чилавад дудеш чарухъахъес Рабаза хIябалра дурхIяра, хьунул Салиматра.

МулебкIан яхI уркIила гьар тимхълизир лерси, урехи се сарил хIебалуси гIяхIгъабза Рабазан Рабаза­нов­лис бузерилизир ва гIямрулизир гьарбизуни, сархибдешуни, чIумаси арадеш ва хъалибарглизиб талихI дулгулра.

 

Басират ХIяжимурадова