Дагъиста халкьанала цадешла байрамла БархIиличил бархбасахъи республикала БекIла някъбазирад, шадлихъла аги-хIяйзир, учительтани, тухтуртани, культурала хIянчизартани, бургъантани гIяхIцад шабагъатуни касиб.

Илдала ургар лерри Дахадаевла районна дурхIнала библиотекала заведующая Магьият МяхIяммадовара. Илис, районна библиотекабала кабизлизиб, дахъал дусмазиб барибси, чебетаибси хIялалси хIянчи багьандан «Дагъистан Республикала культурала рурибси хIянчизар»-ла чихъси у бедили саби.

Магьият МяхIяммадовна 1989 ибил дусличирад рехIрихьили ишбархIира районна дурхIнала библиотекала заведующаяли рузули сари. Илини 1996 ибил дуслизиб ДГУ-ла культурала факультет таманбарили, библиотекала хIянчизарла санигIят касибсири. ХIянчиличи рякьунси бархIиличирад рехIрихьили, ишбархIира, дурхIначира жузачира диги дакIудирули сунела хIянчи бетурхахъули сари, барх бузутала, жузи дучIути дурхIнала, районна халкьла хIурмат-кьиматличил пайдаларикIули сари.
Районна библиотекабала кабизла хIянчизартани, чула ралликьяна чихъси шабагъат касниличил уркIи-уркIиларад мубаракрирули сари, илис чIумаси арадеш, гIямрулизиб талихI, гIурра дахъал сархибдешуни дулгули сари.

«Бузериличи хIела кахIебурхуси дигили, даим сагадешунала гьуни бурцнили, библиотекала бузерилизиб, гьарил бархIи сагаси лямцI дакIубирахъули саби. ГIямрулизир мурталра гьаларяхI рашухIели, хIянчиличи уркIи кабихьили рузухIели, лерилра нушабра хIечи мешули, гъираличил дузес дигулра, хIуни нуша гьаладяхI дашахъулра», – бикIули саби Магьият МяхIяммадовнала балликьянаби.

 

ПатIимат Кьурбанова