Ишди бурхIназиб Ахъушала вацIализибси «Варъала шури» бикIуси арадеш къулайбируси туристунала базализиб «Фольклорла цаси бархIи» бикIуси Дагъиста миллатла культуралис ва дуббатунас хасбарибси шадлихъ бетерхур.
Балбуцлизир бутIакьяндеш дариб Ахъушала район­на культурала управлениела пагьмучебти ва машгьур­ти хIянчизартани. Илди-ургаб лебри Пирдаус ХIя­жимяхIяммадова, Кумсият ГIяхIмадова, ЖумягI ГIялиева, Ха­мис Мусаева, БяхIмуд Булатов, Зульфия Рабаданова, ХIя­­жи Алжанов, Бутрила, СирхIяла шимала фольклорла кол­­лективти, «Пагьму» бикIуси халкьла музыкала гIягI­н­и­ахълуми дирхъуси ансамбль ва гIурра цархIилтира гIяхI­ли.
Шадлихъличир гьарилли декIар-декIарти миллатунала палтарличил, дуббатуни гьаладихьиб. Культурала управлениела хIянчизартани жагати далуйти зайдухъахъун. ВацIализибси диркьаличир Бутрила фольклорный коллективла бутIакьянчибани къугъати миллатла делхъ дарили, лебилра хIяйранбиахъуб, миллатла гIядатунала сценкаби гьаладихьиб.
Пирдаус ХIяжимяхIяммадовани гидгарила чудни-хинкIи секьяйдали дирутил чебаахъиб. Бутрила шила культурала хIянчизарти Зубайдат ГIялиевани, ХалалпатIимат ИсмягIиловани ва ХIялимат Ражабовани мурити сир-хинкIи бикIути бизити деркести дариб. ЖумягI ГIялиевани – дерубти курегализирад бизити нергъ далкьаахъур. БяхIмуд Булатовли Дагъистайзиб гьалабла заманала халкьли чедакIибти анкIилизибад бируси, «бамжа-кьацI» бикIуси кьацI секьяйдали балкьарахъусил буриб.
Ил шадлихъ гIяхIти тяхIяр-кьяйдаличил, халаси разидешличил, балгундешличил бетерхур. Балбуцличи жибарибти гIяхIли миллатла дуббатуначи иштяхIличил хIербикIулри, илдала тIем балулри.
Илдигъунти далдуцунала мурад— гьарил миллатла культура ва хала бегIтала гIядатуни гIердуцес, дуббатуни дирес, илдачила чеабиуси наслулизи хъумхIертахъес.
Культурала управлениела хIянчизартас чула бузе­рилизир сархибдешуни диаб! Гьаннала гIергъира рази­деш­личи цалабиркули хIербиэс кьадарбиаб лебтасалра!

С.ГIябдуллаева