Школа. МугIяллим. Дурсри. Школализив учIули калунси гьарил адамли ункъли дала илди дугьби. Цаибил мугIяллимли ручка някълизи буцахъили лукIахъес бурсидирути дурсрира дархли гьандиркур.
Гьалаб школализиб бучIутас программа гьамадси бири, мугIяллимтасра бузес къиянни хIебурги. Гьаннала сагадешунас гIевваэс гьамадли ахIен. Дахъал сари мугIяллимличи гIилмула ва багьудила Министерствола хъарбаркьуни. Халати хIякимтани тIалабдирути лерил секIал диралли, дурхIнас дарс баресра замана кахIевлан бургар. КъантIли буралли, гьаннала замана мугIяллимла санигIят – гьамадси хIянчи ахIен. Биалра, нушала игъбарлис, чула санигIятличи, школала бучIантачи дигиличил бузути мугIяллимти нушала районна школабазибра леб. Иш дила белкIра сархибдешуначил рузуси, пагьмучерси мугIяллимличила саби.
МяхIяммадова Сапият ГъазимяхIяммадовна акIубси сари Сергокъалала районна Мурегала шилизир. Шила школа таманбарили гIергъи, Сапият МяхIяммадова Избербашлизибси педучилищелизи карерхур. 1998 ибил дуслизиб хIунтIена дипломличил училище таманбарили, сунела шила школализир нешла мезла ва литературала мугIяллимли рузес рехIрихьиб. Сунела санигIят ункъли балуси Сапият МяхIяммадовани школализир дахъал хIянчи дариб. Заманали дихути сагадешуначира, технологиябачира ил хъярхъли бурсирирули сари.
Макьала белкIес кариасли, дила бекIлизир гIядатла предложениебала мерлар назмурти дирар дагьардирути. Сапият МяхIяммадовани назмурти лукIни багьурхIели, ил дила гъамси адамван ризур. Акьуси замана дарган мезли назмурти лукIнира — гьарли-марли нешла мез дигнила лишан саби.
«Нешла мезличи, литератураличи дигилизирад сари ВатIайчи, акIубти мер-мусаличи дигира алкIути. Нешла мезла дугьбачил сари дурхIнани чула хала бегIтала гIядатуни, культура руркъути. Мез хIедиалли, миллатра хIебирар. Ил багьандан нушала миллатла мез мяхIкамдирес рузулра», – рикIули сари Сапият МяхIяммадова.
МугIяллимла бузери дурхIнала сархибдешуначи хIеръили бирар кьиматлабируси. Сапият МяхIяммадовани бучIахъути дурхIнани районна ва республикала абзаназир мурталра гьаларти мерани дурцули дирар. Сабухъчерли школализир рузуси мугIяллимла сунелара авал дурхIя леб.
Сапият МяхIяммадовалара МяхIяммадхIябиб МяхIяммадовлара хъалибарглизиб 3 уршира 1 рурсира акIуб. Рурси Лаура сунела муруйчил Москвализир хIеррирули сари ва илар клиникализир старшая медсестрали рузули сари. Халал урши ХIямид, ВатIа гьалабси чебла ахъили, гIярмиялизивад чарухъи сай. Уршби ХIяжимурадра ГIяхIмадра биалли, школализиб бучIули саби. Нешла уркIилис дигуливан, Аллагьли мяхIкамли хIербараб саби.
Ишдус февральличиб Сергокъалала 2-ибил школализиб районна мугIяллимти-ургаб «Нешла мезла ва литературала бегIла гIяхIси мугIяллим» бикIуси конкурс бетерхурсири. Ил абзлизиб МяхIяммадова Сапият ГъазимяхIяммадовнани 1-ибил мер буциб.
ХIурматла Сапият ГъазимяхIяммадовна, нуни хIу мубаракрирулри бузерилизирти сархибдешуначил! Арадеш, разидеш, гIяхIдеш даим хIечил дарх дираб!
Басират ХIяжимурадова
