Хъаршала шилизивадси МяхIяммадов МяхIяммад МяхIяммадович акIубси сай хIурматчебси, бахъал дурхI­нала бегI хъалибарглизив. МяхIяммад Мя­хIям­мадов Ахъушала шилизиб машгьурси, цархIилтас гIиб­ратли бетаурси насаблизивадси сай.
МяхIяммад МяхIяммадович чумал организацияли­зив жавабла къуллукъуначив узули калун.
Ишди бурхI­на­зив ил сунела ца къуллукъ лебли «Бархьдешла гьуни» газетала редакциялизи вакIиб ва жагали яхши-хуш дариб.
МяхIяммад Мя­хIям­мадович Ахъу­шала районна бузерила ва адамти хIян­чиличил гIеб­бурц­нила шайчибси Центрлизив «инспектор по трудоустройству» бикIуси къуллукъличив 25 дус узули сай. Илини сунечи хъарси хIянчи чебетаахъили, хIялалли бирули сай. Халкь-ургав валгунси, сунечил барх бузутала ва шила адамти-ургаб хIурмат сархибси, дугьаизурсила къуллукъ ва мурад бетерхахъес къайгъилизив вирар МяхIяммад. Ил Центрлизи гьалаб бахъал адамти дугьабилзутири, гьанна биалли камбиубли саби.
МяхIяммадли сунела гIямрула рархкья, дяхI шаласи, малхIямси НасихIятличил барх хIябал урши-рурси абикьур, гIяхIси бяркъра бедили, гIямрула гьунчи дураиб. Гьанна илдачибад акIубти абикьес, илдас гIяхIси бяркъ бедес къайгъилизиб саби.
МяхIяммадла дудеш МяхIяммад МяхIяммадовли (Хъаршавси Халал-МяхIяммад) ва неш ГIяйшатли (чула бунагь-хатIа урдуцаб) верхIел урши-рурси абикьуртири, гIяхIси бяркъра бедили, бузерила кьиматра ва халкьла хIурматра бирахъес бурсибарили, гIямрула гьунчи дураибтири.
МяхIяммадла дудеш Ахъушала шилизибси «Комбинат Бытового Обслуживания» бикIуси ор­га­низациялизив дахъал дусмазив узиб. Илини су­нела хъалибарг абикьес багьандан, халаси бузери ба­риб, комбинатлизив складла заведующийла къул­лукъличивра, дабрумала усталира узули ка­лунсири. Сунени бируси хIянчилизив чеветаибси, ком­бинатлизиб бузути хIянчизартала-ургаб халаси хIур­мат сархибсири Халал-МяхIяммадли. Совет хIу­куматла манзиллизиб комбинатлизиб бузути ба­хъал адамти бири, районна духIнарти лерилра ши­ма­зибад лебтири илаб хIянчила каберхурти. Гьарил хIянчизарлизи, устази жагали гъайикIусири, илдала къуллукъ бетурхахъусири, илдас сегъуна ваяхI гIягI­нили биаллира складлизибад бедлугусири. Жагаси някъла хIянчира бирусири, къугъали дабрумала ус­та­деш­ра дузахъутири. МяхIяммадла дудеш халкьла баркаллаличи лайикьикибси адам сайри.
МяхIяммадла неш ГIяйшатра малхIямси, гIяхIти хIял-тIабигIятла, сабурла хьунул адам сарри.
Ахъушала шилизибси комбинатлизир дила нешра рузули калунсири.
Нешли мурталра гьанбуршусири ГIяйшатла гIяхIси баркьудиличила:
— Гьар бархIи Хъаршала шилизирад, гьарахъти мер-мусаличирад, хIерила замана баибхIейс сунела гIямрула вархкья МяхIяммадлис дуббат бихули рашусири ил или. — Рахъ жигарчерси, гIяхIти уркIи-хIялла, малхIямли гъайрикIуси, духули гIямру деркIибси хьунул адам сарри ГIяйшат, – бурусири дила нешли.
Гьаннала гIергъира хIурматла МяхIяммадлис ва илала дигутас гIямрулизир ва бузерилизир сархибдешуни имцIадикIаб, чула ахIертани разибирули хIербиэс кьадарбиаб!
М.МяхIяммадовлис Р.МяхIяммадовли багъишлабарибси иш назмура гьалабирхьулра.
Багьадур бекI духуси,
БекI хамли хIебихуси.
ХIела амру бихуси,
Рургьаб гIямрула рархкья.
Вайси секIал хIебиран,
ГIяхIси гIямал гIебисан.
Уммат багьандан умсан,
УркIи умуси инсан.

Cабият ГIябдуллаева