Гьалабван наб, арадеш нукьсанбикили, ГъурбукIла центральная больницала гинекологияла отделениелизи карихьес кьадарбиуб. Ил отделениелис бекIдеш дирули сари сунела санигIят дебали ункъли балуси тухтур ГIяйсаева Жамиля Мухтаровнани.
Илала шалати дяхI-някъли, ванаси хIерли, малхIямси дугьабизли дила уркIи цаэсти бурхIназибал паргъатбиахъуб. ХIязлис ахIен урусла чевяхIси поэт, писатель В.С.Шефнер викIуси: «Девли адам кавшесра бирар, девли верцахъесра бирар, девли гIярмияра гIелабад бикес бирар». Илгъуна цIакьси секIал саби дев, хаслира — малхIямси дев! ЗягIипсиличи тухтурла малхIямти дугьбани халаси асар бируси саби. Жамиля Мухтаровнала малхIямти дугьбани зягIиптачи халаси асар бирулри. Гьар бархIи зягIиптачи разити дяхIличил гьаррикIулри, илди гIягIниси тяхIярли ахтардибирулри, кумекбирулри, гIяхIси лечение бирулри. Лебилра зягIипти сагъбиубли, разили чула хъулрази чарбулхъулри.
Дебали тIалабкарси, жавабкарси тухтур сари Жамиля Мухтаровна. Илини бекIдеш дируси отделениела хIянчизартира чула санигIят балути, адамдешла гIяхIти къиликъуни лерти, зягIиптачи уркIецIичебти хIянчизарти саби: Нажават Мусакаева, ПатIимат ХIясанова, ХIялимат Женбулатова ва цархIилти. ХIянчизартани илала халаси хIурмат бирулри, багьеслири илдас чула отделениела заведующая дигахъули риъни. Жамиля Мухтаровнани бекIдеш дируси отделениелизир зягIиптас гIягIнити лерилра шуртIри лерри: умудеш, ванадеш, бизиси беркала. ГIягIнити дармунтала шайзибадра зягIипти ункъли гIеббуцилри.
Халадеш агархIели, лебилра хIянчизарти, зягIипти цаван чебиухIели сари Жамиля Мухтаровнани илгъуна хIурмат сархибси.
Жамиля ГIяйсаева медицинализирцун ахIенну сабухъчерли рузуси, илини районна, Дагъиста жамигIятла гIямрулизирра жигарла бутIакьяндеш дирули сари. 2005-ибил дусличирад илини Сергокъалала районна хьунул адамтала Советлис бекIдешдирули сари.
ГIяхIси, гьар секIайчи чекаризурси хIянчизар сарливан, ил чуйнара грамотабачил, медальтачил шабагъатларариб: Миллатла политикала шайчибси Министерствола, Дагъиста хьунул адамтала Союзла ва «ВатIайчи диги багьандан» медальти лер. Илкьяйдали ил ДР-ла арадеш бихIнила отличникра сари.
Нуша къиянси манзиллизир хIердирулра. Дургъбани гьарилла уркIби цIумдикIахъули сари. ВатIан дигахъуси патриот сарливан, Жамиля Мухтаровналара нушала улкаличи, бургъантачи уркIи изули саби. Илини СВО-ла мер-мусаличибти нушала уршбас кумекбаресра халаси къайгъи дакIубирули рирар. Илала сипта хIясибли чумра посылка дархьибтири бургъантас. Бахъбааб нушала Жамиля Мухтаровнагъунти патриотуни!
Ж.ГIяйсаева санигIят ункъли балуси тухтурцунра ахIенну, пергер хъалибарг къелгIеббикуси, духуси нешра сари. Илини сунела гIямрула вархкья ГIяйса ГIяйсаевличил 3 дурхIя абикьур, илдас гIяхIси бяркъ бедиб, белчIуди касахъиб. Халалгъуна рурси Бахуни гIяхIти кьиматуначил ДГМУ таманбариб. Ил Избербаш шагьарлизир диагностический центрлизир тухтурли рузули сари. Урши МяхIяммадли ДГУ-ла юридический факультет белчIун. ВиштIасигъуна Зубайру экономический техникумлизив учIули сай.
Жамиля Мухтаровна халкь-ургаб халаси хIурмат сархибти бегIтала рурсира сари. Илала неш физико-математикала гIилмуртала кандидат сари (ДР-ла гIилмуртала Академияла гIилмула халасигъуна хIянчизар). Илини ДГУ-ла физико-математикала факультет таманбарибсири, Ленинна уличилси стипендия кайсусири. Илкьяйдали нешлис имканбакIибсири Санкт-Петербурглизиб музыкала училищера таманбарес.
Дудешли Москвала автодорожный институт белчIунсири. Ил МяхIячкъалала аэропортлизив бекI инженерли узули калун, кIинайс биалли — ДР-ла бузерила охранализив бекI специалистли. ХIязлис ахIен бикIути, бегIти сегъунти биалра, дурхIнира илдигъунти бирар или. Дила пикрили, пасихIти, гIяхIти бегIтани арикьурхIели сари Жамиля Мухтаровнара духуси, халаси хIурматла хьунул адам, черетаибси тухтур ретаурси. Илини бегIтала дякь даимбирули сари.
Медицинализирра улкала жамигIятла гIямрулизирра жигарчерли рузахъес чIумаси арадеш, хъалибарглизиб талихI, уржибдеш, даршудеш, хIянчилизир сархибдешуни дулгулра Жамиля Мухтаровнас.
ИмцIабикIаб хIугъунти Гиппократла хъялис марти тухтурти!
З.Арсланова,
Сергокъалала 1-ибил школала мугIяллим
