ХIямшимала ши­ли­зивадси гIяхI­гъаб­за ГIусманов ХIя­сан ГIя­лиевич ЧебяхIси ВатIа дергъла бу­тIакьянчи сайри. Дергъ бехI­бихьайчи ил ВатIайс къул­лукъ­барахъес гIяр­мия­лизи живарибсири. Финский дергълизив ил верхIел дус ургъули ка­лунсири.
Финский дергъ каберхурли гIергъи, 1941 ибил дуслизиб ХIясан ГIусманов ургъуси полк фашистуначи къаршиси дергълизи арбукибсири. Илар бутIакьяндеш дируси замана ил связист вирусири.
ХIясан ГIусмановли хъули чарухъи гIергъи, сунела тухумтази бурули уили сай ишгъуна хабар:
Цагьачам, ил ургъуси полкла штаблизиб кабель къябкабердили, бархбас беткахъили буили саби. Ил багьандан ХIясан ГIялиевич кабельла къяббердибси мер баргахъес вархьибсири. Илини кабельла къяббердибси мерра баргили, илра балбарили, сай ургъуси полклизи чарухъунхIейс, фашистуни чебухъи, лебилра полклизибти кабушили баргибтири. Сай мицIирли калунсири.
ХIясан ГIусманов ургъули калунсири Польшализив, Чехословакиялизив, Венгриялизив. Ил ургъули Германиялизи ветаибсири. Дергъ таманбиубхIели, гIурра байхъала дус Германиялизив калунсири, илар хIянчи дарес багьандан.
Дергълизив гъабзадешличил ургъули кални багьандан, пачалихъли илала гьунарти чихъли кьиматладарибтири. ХIясан «Заполярье батахъни багьандан», «Гъабзадеш багьандан» медальтачил, «ХIунтIена Зубарила» орденничил шабагъатлаварибсири.
ХIясан ГIусманов хъули чарухъунсири 1945 ибил дус­ла декабрь базличив. Хъайчикайили, сунела гIям­ру­ла рархкьячил шел урши-рурси абикьур, гIяхIси бяркъра бедили, гIямрула гьунчи дураиб. ХIясай илдази сунени дергълизир чедаибти къияндешуначила ва анцI­бу­кьуначила хабурти дурутири. ХIясан ГIусмановла шила халкьли халаси хIурмат бируси адам сайри. Дергълис гIергъити дусмазибра илини халаси бузери бариб, хъалибарг абикьес ва район гьалабяхI арбукес багьандан.
Ил 1995 ибил дуслизив гIямрулизивад арякьун, 83 дус виубли, бунагь-хатIа урдуцаб сунелара, илкьяйдали, ВатIан батахъес, халкьла челябкьла багьандан бургъули калунти ЧебяхIси ВатIа дергъла лебилра бутIакьянчибалара!
Иш белкI хIядурбарахъес баянти дархьили, кумекбарибси ХIямшимала шила урга даражала школала учительница ИсмягIилова Марьям Наримановнас баркалла багьахъес дигулра.

С.ГIябдуллаева