ИшбархIи наб бурес дигулра спортлизив гьалавяхI арякьунси ММА-ла мушлукьячила. МяхIяммадзагьир ХIусейновли 32 килограммла битIакIлизив азадли мушулбашутала школализир дурадеркIибти абзаназир кIина хIябъибти мерани дуциб.
35 килограммла битIакIлизив ДЮСШ-ла гьаларти мерани багьандан МяхIячкъалализир дурадеркIибти абзаназир бутIакьяндеш дарили, МяхIяммадзагьирли кIиибил мер сархиб. Ил урчIемал дус виайчи мушлукьяби хIядурбируси школализи вашусири. 10 дус виубси МяхIяммадзагьир гъудурти журабазиб мушулбашутала «Аманат» бикIуси клублизи вакIиб. Клублизив узуси Кахир Кахировли ил разидешличил кьабулвариб. 2014 ибил дуслизир МяхIяммадзагьирли Избербаш шагьарлизир Дагъиста Кубок сархес, 40 килограммла битIакIла бегIти, 10-11 дусла дурхIни-ургар дурадеркIибти абзаназир бутIакьяндеш дариб ва хIябъибил мер сархиб. Ил дуслизир, МяхIячкъала шагьарлизир, дурхIни-ургар «Лига Легион» бикIуси ушу-саньдала абзани дурадеркIибхIели, илини цаибил мер буцибсири. 2015 ибил дуслизир МяхIяммадзагьирли МяхIячкъалализир дурадуркIути 40-42 килограммла ва 45 килограммла битIакIла жура-журала абзаназир бутIакьяндеш дариб ва хIябал цаибти мер сархиб. Тренер К.Кахировли виштIал мушлукья ММА-ла «Каспий» бикIуси спортивный клублизи шурватур. Илав тренер сайри ММА-ла федерацияла президент Бадави ХІясанович. 2015 ибил дусла декабрьличир Кисловодск шагьарлизир Россияла ММА-ла 8-15 дусла дурхIни-ургабси чемпионат дураберкIибхIели, МяхIяммадзагьирли 3-ибил мер буциб. Ил дуслизиб лебил Россияла (Combat grеppling «Комбат греплинг») абзлизирра 45 килограммла битIакIла абзаназир МяхIяммадзагьирли бутIакьяндеш дариб ва цаибил мерличи дуравхъун. 11-12 дус биубти кадетунала ургар МяхIячкъалализир дурадеркIибти ушу-саньдала абзаназир бутIакьяндеш дариб ва умутчебси чедибдеш сархиб. 44 килограммла битIакIла мушулбашутала ургав цаибил ветаур. 2017 ибил дусла февральличир Москвализир СБИ ММА ориентал федерацияла Россияла чемпионат дураберкIибсири. Илди абзаназирра бутIакьяндеш дариб МяхIяммадзагьирли. Абзани детурхуси замана илала кьяш бячи буилри. Амма чизилра хIебагьахъур. Шут Файт журала абзлизив МяхIяммадзагьир кIиибил ветаур, ММА-Сэйф журализив — хІябъибил.
МяхIяммадзагьирлис гIурра Анталия шагьарлизир дурадуркIути дунъяла чемпионатла абзаназир бутIакьяндеш дарес дигулри. Амма тухтуртани ихтияр хIебариб. ХIябал базцадхIи кьяш сагъбирули калун. КIинайс тренировкабачи вашес вехIихьиб. МяхIяммадзагьир 2017 ибил дусла июньничир Анапализир дурадуркIути дунъяла Кубок багьанданти абзаназир бутIакьяндеш дарес Дагъиста командаличил варх арякьун. 54 килограммла битIакIлизив мушулвашес хIядуриублири ил. Ункъли мушулбашути спортсментас 4 журала цаибти мерани ва кубокуни сархес ихтияр лебси буилри. Финалличи дураухъайчи МяхIяммадзагьирли умутчерти чедибдешуни сархули, ММА-ла дунъяла Кубокла хIябал цаибти мер сархиб. 2018 ибил дуслизиб МяхIяммадзагьирли Дагъистайзиб цаэсил мер касиб ва Россияла абзаначи хIядуриуб. Россияла чемпионатра сархиб илини ва хъябличиб мургьила медальличил хъули чариуб. Россияла чемпионатлис гIергъи ил тренерли 2019 дуслизиб Кисловодсклизиб бетурхуси дунъяла чемпионатличи дебали гIяхIил хIядурвариб. Ил чемпионатличиб 36 улкала мушлукьяби лебри. Илдазивадли сунела 55 килограммла битIакIлизивад илини хIябал раунд декIарти улкнала мушлукьябачил дурадеркIиб ва цаэсил мерличи дуравхъун. МяхIяммадзагьир илав спортла мастерла уличи ва бегIлара хъярхъси мушлукьяс бедлугуси кубокличи лайикьикибсири. Ил жагаси уличил Дагъистайзи вакIиб.
БусягIятла замана МяхIяммадзагьир ДГПУ-лизив хIябъибил курслизив учIули сай. Ил жагьилтала Парламентла председатель ГIялигъалбицI ХIусейновла кумекчи сайливан, СВО-ла бутIакьянчиби гIеббурцули сай илини. Сунени бируси хIянчи кьиматлабирули, «Нушала игитуни – шандайзибад картIибти» ибси жагьилтала хIяракатли илис «Дагъиста асилдеш ва хIурмат» бикIуси медаль бедиб.
19 дус виубхIели, ил сай гIяхIъулали гIярмиялизи арякьун. Илини Крымла Севастополь шагьарлизиб къуллукъбариб. Генерал лейтенант Я.Резанцевли МяхIяммадзагьирлис «Дявила асилдешла» бикIуси кIиэсил даражала медаль бедиб. ГIярмиялизив ил цархIилтазивад гьар секIал ункъли далдирниличил декIарулхъулри. Илгъуна медаль бедлугуси саби СВО-ла бутIакьянчибасра. Гьалабван, жагьилтала БархIила байрамличиб МяхIячкъалала мэр Юсуп Умавовли декIарбухъунти жагьилти сунечи жибариб ва илдас Баркаллала кагъурти дедиб. УркIи-уркIиларадти, гьав ахъбурцути дугьби дуриб илини. Ил кьукьялизив леври нушала МяхIяммадзагьир ХIусейновра.
Ну рирхулра, нушала улкализиб илдигъунти жагьилти имцIабикIниличи, чеалкIуси наслулис илди гIибратли бетарниличи. Дунъяличиб гIяхIгъубзни лебалцадхIи, нуша паргъатли диэс дирехIе ва даршудеш кабилзниличи дирхехIе.
