Нушала республика спортлизиб Россияла Федерациялизиб цаибси мерличиб саби викIес вирар. Кавказла дурхIнас спорт, абз, физкультура дебали дигахъу.
Дубуртала мер-мусаличиб хIербирути дурхIнас се барес кавлули иш къиянси манзил? Гьалаб улкализиб багьуди бедлугусири, чус дигуси санигIят сархили, бузес имканбикIусири. Гьанна аги барсбиубли саби. Гьарли-марси багьуди касес гьамадли ахIен. Базригантала манзил гьарил секIа сунела багьа лебли саби. Тамаша саби, нушала республикала шимазир матъал спортла ва физкультурала школаби дузули лерни, чузибра дурхIни, багьа хIебедили, спортла чус дигуси журализиб тренировкабачи башес бирути. Леб илгъуна кIялгIя нушала МикIхIила шилизибра. Гьалаб нушала шилизибад дурабухъунти бахъал машгьурти спортсменти бири, хаслира азадли мушулбашнила журализиб. Гьанна дакIудиубли сари бирхIнила дахъал сагати жураби. ИмцIаливан востокла ва азияла улкназирад дакIибти. Сен-биалра, гьачамлис республикализиб азадли мушулбашнила журала бирхIни цаибси мерличиб саби. Ну виштIаси замана, гьанбиркусири ил жура нушала республикализиб пикрибарибси саби или, сенкIун бахъал дурхIнас ил дебали дигахъуси сабхIели. КIинайс багьурра ил США-лизиб пикрибарибси бирхIнила жура биъни. Илаб ил колледжуназиб ва дахъалгъунти школабазиб белчIудила программализи каберхахъурси биънира якьинбиуб.
Леб нушала республикализиб машгьурси спортла цагьатIи жура — ил саби някъ бирхIяхънила спортла абз. Нушала спортла школализир ил жура хIясибли тренировкаби дирули сай тренер МяхIяммад Гугуевич ГIябдуллагIялиевли. Илала бекIдешлиуб нушала дурхIнала кьукьяли декIар-декIарти абзаначир команда хIясибли цаибти мерани сархули дирар. Саби спортсментанира чуйнара цаибти мерани сархиб.
Нушала шилис дебали разиси ва пахручебси хабарли бетаур Рустам ХIясановли Россияла Чемпионатличиб цаибси мер сархни. Мартла 9-14-ибти бурхIназиб Орел бикIуси шагьарлизиб бетерхурсири някъ бирхIяхъантала абз. Нушала улкала 80 мер-мусаличирад дакIибти командабала вакилтани бутIакьяндеш дарибтири. МикIхIила школализив 9-ибил класслизив учIуси дурхIяли сунела къаршикартачибад ташмишдеш агарли чедибдеш сархиб. Илис цалра спортсмен чедивикес хIейуб. ХIеблизиб дурабуркIуси дунъяла Чемпионатлизир бутIакьяндеш дарес хIядурвикIес хIяжатли саби гьанна илис. Бирхауди бирхьулра иларра илини гIяхIти устадеш чедиахъниличи.
«Спортлизиб чедибдеш сархес багьандан тIашагарли узес хIяжатси саби. Ишаб биэс хIебирар жагIял яра гIур ибси мягIна, мурталра узес, къияндешунас мутIигIхIейкIес, сунечиб сунени чедибдеш сархес, сенкIун чIянкIли вегIла нафс («ну») саби вегIлис диргалабулхъуси. Вируду иличибад чедибдеш сархес, гIурилти лерилра унза хIед гьаргти сари», — викIар тренер МяхIяммад сунела спортсментази. Рустамла халаси узи Мажидлира ил спортла журализир гIяхIти устадеш чедиахъутири. Илинира Россияла Чемпионатличиб хIябэсил мер сархибсири. Гьанна илала узини — цаибси.
Нушаб хIяжатли саби илдигъунти пагьмучебти дурхIни гIеббурцес ва гьатIира гьалабяхI башахъес кумекбарес. ИшбархIи гьамадли ахIен, дахъал дарес хIяжатти секIал лер, ва заманаличиб, халакайухIели дурхIнани спорт кIиибил мерличиб балтули саби. СенкIун гьарил спортла журализир арц дарес вирули ахIен. ГIе, някъ бирхIяхънилизиб давлачеввиэс хIейрар. ИшбархIи бирхIянти саби хIяжатти, яра футбол. Спортлизиб вегIла гьуни даимбаресра дахъал харжани хIяжатли сари. Агарав илди арц — хIейруд. Чарулхъан Рустам хъули, вашар школализи, дирар хъулир дарес хIяжатти. ГIяхIси тренер лев илала, иличир бархIехъ тренировкаби даимдирар. Секьяйда хIядурбикIара илала къаршикарти? ХIердизирая, дурала пачахълизиб секьяйда хIядурбирулил спортсменти халкьани-ургарти абзаначи? Интернетлизир ил журала видеоби дебали дахъал сари. Нушала дурхIни чIянкIли чула иштяхIличил ва хьулличил саби чедибиркути.
Руслан Ражабов
