Лебтанилра балуливан, ишдуслизиб улкализиб ЧебяхIси ВатIа дергълизиб Чедибдеш сархибхIейчирад 80 дус дикнила байрам ахъси даражаличиб бетерхур. Илдазир нуша-ургаб мицIирли лебалти ветерантанира бутIакьяндеш дариб, пикри агарли кахIелун итди къиянти дусмазир дахъал хIянчи дарибти адамтира, сабира тылла ветерантили бетаурти.

Амма дебали дигесили уббухъун республикала гьарил районнизирти, шимазирти ЧебяхIси ВатIа дергъла бутIакьянчибас хасдарибти памятникуни къулайси агиличи дикахъни. Нушаб даршудеш ва паргъатдеш биахъес багьандан, халаси багьа бедили, чула гIямру кьурбандарили, чедибдеш сархибти нушала дагъистанлантачила, даргантачила хъумартес нушаб сеналра асухIебирар. Памятникуни биалли, илдачила нушани даим гьанбиркахънила бикьрумира сари.

Къулайдарибти памятникуначи гьаннала гIергъира хIеруди бузахъниличи, илди лайикьси даражаличир дихIниличи дирхехIе. Гьайгьайрагу, илдачи делкIунти уми чеалкIуси наслула дагьрилизир калахъес, нушала хала дудешунала гъабзадешла гьунартачила гьанбиркахъули, илдала гьалаб икрамбирехIе.

Ризван МяхIяммадов