Гьаннала заманала сагадеш саби дигусигъуна хурег вегIли хIядур­хIе­барили, телефонна зянкъличил хIяжатси мерличи абухахъес вирули виъни. Илгъуна кунк­дешличил бахъал адамти пайдалабикIули саби, ва илизиб гIяхIси ахIи, селра вайси чебиули ахIен.
Мурул-хьунул абзур жумягI, гьарил бархIи бузули биалли, гьаннала заманала гIядатла адамтала гIямру илдигъунти детаурли сари, гьайгьайрагу илдани хъулиб хурег хIядурбарес замана бургули хIебургар, бамсурли хуреглизи ахъесра хIейгули бургар. Ил багьандан, лерилрара-сера халати тукентазир дайхъала хIядурдарибти (полуфабрикаты), яра дуцIардаресцун кавлути, дарили хIядурти, хIед дигуси журала хурегуни лер. Халкьли илди исра исули сари. Асибти хурегунани букули хъалибаргли гIямалбирули саби.
ГIямру циила гьамаддиахъес илгъуна гIямал бургули саби.
Амма гIямаллара баракатлара мягIна цагъуна ахIен. Наб гьанбиркуливан, уркIи кабихьили вегIла хъулиб барибси хурегли юртлизи, хъалибарглизи ба­ракат кабирхьу.
Давлачебти, бегIлара дурхъати ресторантазиб гьар бархIи букес имканти лерти адамти булан хъулиб хIядурбарибси хурегличи хьулбикIули бирар. Ил багьандан хъулиб хIядурбарибси хурегра багьа агарли дурхъаси саби.
Хурег беркни, кани белкъницун ахIен. Диги кадихьили барибси хурегли чархлизи ряхIятдеш, дунъяличи разидеш, гIяхIсицун барес хьулани алкIахъули сари. Беркунси хурегли адамтала диру-далтутачи, чархла чедила чебаъличи, илдала арадешличи асарбирули бирар.
Нуни пикрибариливан лебилра дунъяла адамтас чула нешли барибси хурег, лерилра бизити хурегуначибра имцIали гIяхIбилзули саби.
Набра дила нешли хала бархIила байрумтас дирути гIяваси нусира, делхьунти картошкара, гидгурира дархаили дерцIибти чудни бегIлара бизити сари или гьанбиркули бири. Нунира тяп илдигъунти чудни дирули рирус, илди гьачамалра дила нешлагъунти детарули ахIен. Нуни дарибти, дила чудни сари, дила уркIила пикрумачил, някъбачил, илдас харжбарибси заманаличил, сабурличил, дигиличил дарибти.
Нуни гьачамцун ахIи бакьибси саби, дила узбала, узбикьуртала дурхIни, дила уршила рурсби: «Нешла хурег бизиси саби бикIули». Дила дурхIнира, хIела хурег бизиси саби бикIули бирар. Или биуб­хIе­ли, наб гьанбиркусири, ну хурегла гIяхIси уста сарра или.
АнцIбукь илкьяйдацун ахIен, чула нешли барибси хурег лебтасалра гIяхIбилзули саби, сенахIенну гьарил нешли, хурегунала уста хIериалра, сунела хъалибарглис хIядурбарибси хуреглизи сунела уркIила диги кадирхьули сари. ХIебиалли, гьарил нешла хурегра, сунела пикрумачи мешули, сунела дурхIнас бизисили бетарули саби.
Наб дигахъира лебилра нешанани уркIи ка­бихьиб­ти хурегуни хIя­дур­ди­рули, дурхIнас биалли, нешли хIя­дур­да­риб­ти бизиигули.

Муъминат Хаттаева