Дунъяла мас бучес къайгъилизиб бирар бахъал адамти, амма бегIлара халаси давла арадеш биъниличила илди кьанницун саби шакбиркути.
Сецад зягIипти леба ишбархIира, миллионти харждаралра арадеш асес ахъри агарти? Амма, зягIипикибси замана багьудичевси, малхIямси тухтурла хIерудилиу викалли, изала хIярхIбиубсиван билзан, арадеш хъярхъли къулайбирниличи умут имцIабирар. Иш белкIлизиб илдигъунти багьудичебти, малхIямти тухтуртазирад цаличила бурес дигулра.
ГIялиева ПатIимат БяхIяммадовна акIубси сари 1937 ибил дуслизир ХIурхъила шилизир (ГIялзи къотIлизир), хIялалси бузериличил яшавбируси, гIядатла хъалибарглизир. Илала дудеш ГIяли Граждан дургъбала ветеран вирусири. Илди дудешлизибад жявли мяхIрумбиубтири, неш Ханичани кIелра рурси Аймеседура ПатIиматра абикьуртири. Дудеш агарли халабаибти биалра, кIелра рурсили гIяхIти багьудлуми касиб. Сергокъалала педучилище белчIи, Аймеседу мугIяллимли рузули калун. ЦIудхъурла округла АметеркIмахьилизи мугIяллимли рузахъес рархьибси Аймеседучил рарх, ХIурхъила школализир авал класс таманаибси ПатIиматра, белчIуди даимбарес аррякьунсири. ГIур кIелра рузи чула шилизи чарбухъун. ХIурхъила шилизиб школа белчIи гIергъи, ПатIиматли медсестрала санигIят чеббикIиб ва 1959 ибил дуслизир Буйнакъскла медучилищелизи карерхур. ХIябал дус ручIули ПатIимат ГIялиевани фельдшерла диплом касиб. 1962 ибил дуслизир ил Сергокъалала районна Миглакьасимахьилизир рузес рехIрихьиб. 8 баз хIянчи барили гIергъи, ПатIимат ГIялиевани Сергокъалализивси ХIяжи ГIямаровличил кьисмат цабариб.
Сегъунти хIянчи лерли диалра, хьунул адамлис хъалибаргличиб гьалабси селра лебси ахIен. ХIяжилара ПатIиматлара хъалибарглизиб 3 урши ва 2 рурси леб. БегIтани дурхIнас гIяхIси бяркъра бедили, гIямрула бягIуси гьунчи дураиб. КIелра халатигъунти урши Зубайру ва ГIяли дудешла санигIят чеббикIили электросетьлизиб бузули саби, виштIасигъуна урши ГIябдусалам хъулразир дирути хIянчила уста сай. Рурси Раисат, нешла санигIят чеббикIили, тухтурли рузули сари, кIиэсил рурси Зугьра – корреспондент сари.
Гьанна 3 дурхIяла бегIтасра бахъал дурхIначилси хъалибарг или ирули саби. ИтхIели сарерхурси ПатIимат БяхIяммадовнани шел дурхIяличилси хъалибаргра тухтурла жавабкарси хIянчира чедетаахъили бекIдирутири. ПатIимат ГIялиевани фельдшерла биалра белчIунси, багьудичебти тухтурти камли биъни багьандан, илис хирургиялизир, биштIатала отделениелизир ва дурхIни алкIахъуси отделениелизир рузес чевкъулри. Жавабкардешличил рузуси, малхIямси ПатIимат БяхIяммадовнас излумазибад арабарибти баркалла бикIутири. 45 дус хIянчи барили гIергъира, ПатIиматла уркIи зягIиптачила пикрумазиб сабри, илдас багалариэс къайгъилизир. Илкьяйдали, физкабинетлизир фельдшерли рузули, илала бузерила стаж 50 дусличи абаиб.
Арадеш бихIнила Министерстволи асилси бузери багьандан баркалла балахъули, ПатIимат ГIялиевас шабагъат бедиб. Ил бузерила ветеранра сари. Мурталра зягIиптачил малхIямси, санигIятлашалти устадеш лерси ПатIиматлис, сунени арабарибти адамти гьаннара разили гьунибиур ва баркалла бикIар. Ил ахIену, гьатIи, гьарли-марси тухтурла уркIила мурад?
ХIяжи ГIямаровли ва ПатIимат ГIялиевани чула балгунси хъалибаргличил 51 дус дарх деркIиб. ДурхIнала ва дурхIнала дурхIнала дигили алавруцибси ПатIимат ишбархIира сунела хъалибарглис берхIиван ухули сари. Уршби-рурсбани чула ахIерси неш гьар секIайзирад гIеррурцули сари. Ил ахIену дунъяла инса халаси талихI?
Халкьлис кумекрикIули 50 дус хIянчи барибси ПатIимат ГIялиевас халаси баркалла биаб! ЧевяхIси Аллагьли илис уркIи шадти, чарх арати духъяна гIямру кьадардараб!
Басират ХIяжимурадова
