БелчIудила сагаси дус бехIбирхьухIейс газетализи чучила белкIести районна бухIнабти педагогуначила хьарбаибхIели, Ахъушала районна багьудила управ­лениела методкабинетла заве­дующая ХIусенова Наида Мух­таров­нани гьанбушибтала лугIи­лизиб лебри ГIябдуллаев МяхIяммад БяхIму­довичла ура. Нуни М.ГIябдуллаевличи зянкъдяхъира ва районна газетала редакциялизи вакIес вирарал хьарбаира.
— ХIябилра жагали вирус! — разили жаваб гиб, гьар мурталра кьяйдали уркIи-хIяйзив валикибси МяхIяммадли, — лерхис чедаахъес дила шабагъатунира наб багъишладарили делкIунтира.
ГIергъила бархIи савли МяхIям­мад БяхIмудович ва илала гIямрула марси юлдаш Хадижат редак­циялизи бухI­набухъунхIели, бахъхIи чехIе­баиб­ти адамтачи уркIи-уркIиларад ра­зириубра.
— Сен саррая! Арадеш сена? Думсахъулраяв? —хьархъаррикIуси набзи жаваб гиб Хадижатли:
— Дамсес гIямал агара — ишинира гьачамлис хIянчи дархьдалтули ахIен, сунела хIянчи детерхахъес нура тIашкаризурлира, — малхIямли пишряхъиб духуси хьунул адам. Мурул хIянчилизив гIевурцуси, кумекрикIуси, ил уркIичеввируси хьунуйс урус мезли «муза» или ирули бирар. Дарган мезли ил девла мягIнурби дахъал лер: «марси юлдаш», «кумекчи», «разидеш бихуси», «къиян буртIуси», «гIевурцуси».
Тяп илгъуна сари Хадижатра. Районна администрацияла, багьудила управлениела хIянчизартачил рарх ну чуйнара рякьунсири МяхIяммад БяхIмудович директорли узути школабази ва гьархIели дяхI шаласи, гIямрула вархкьяла хIянчилизир чекаризурли кумекрикIуси Хадижат чераэс тIягIямли бири.
— ХIера, ишди наб гибти грамотабира, Баркаллала кагъуртира, дипломтира, наб багъишладарибти белкIанира, — ранг-рангла кагъурти стол­личи кадирхьули, МяхIям­мадли имцIабирули сай:
— Лерилра илдазиб ишалара пай лебси саби, ил сабабли саригу уктемсира!
КIелра барх гIяк-гIякбикIути илдачи хIеррикIухIели, «Арали датабая, ишбархIиван разили дихIябая Аллагьли гьаннала гIергъира!» — рикIес сабри наб кавлуси.
…ГIябдуллаев МяхIяммад БяхI­мудович акIубси сай МухIела шилизив. 1975 ибил дуслизиб Дагъиста пачалихъла университет таманбариб ва Ахъушала районна КургIимахьила школализиб бузерила гьуни бехIбихьиб. ГIур шурватур АметеркIмахьила урга даражала школала директорла къуллукъличи. Илав узули калун верхIел дус, шила халкьла, коллективла хIурмат сархили, багьудила ва бяркъла шайчиб гIелакабулхъусилизи халбируси школа гьаларти мераначи дурабухъахъун. 90 ибти дусмазир гIямрула тяхIяр-кьяйда дарсдиубхIели, МяхIяммад БяхI­мудович сунела узби, гъамти хIер­бируси Ростовла областьлизи гечиуб ва ишав учительли узес ве­хIихьиб.
М.ГIябдуллаев арякьи гIергъи 6 адам директорла къуллукъличиб барс­биубли, школала агира вайтIабикалли ахIенси, гIяхIбируси агархIели, дурхI­нала бегIтани, МяхIяммад БяхI­му­дович левси мер багьур ва гIергъи бакIили, тиладибикIухIели сагали Аме­теркIмахьила школализи директорли узахъес киб.
— Халкьла пикри гIеббуцибсири ит замана районна бекIла къуллукъличир рузуси Хамис ШяхIбановани, ва илала заместитель багьудила шайчивси куратор ХIясбулла Ибахъовли, —гьанбиркахъули сай М.ГIябдуллаевли. — ХIяжатти секIайчил АметеркIмахьила школа гIеббуцес, школала юрт ва алавчарти мер-муса къулайдарес имканбакIиб. КIел дусла бухIнаб гIелакабулхъуси школа цаибтала къяйлизи дурабухъунсири.
2013 ибил дуслизив МяхIяммад БяхIмудович Урхьучимахьила урга даражала школала директорли узахъес шурватур. Директорла къайгъиличил ишар кадизахъурти тяхIяр-кьяйда чедаибтири 2019 ибил дуслизиб ишаб дураберкIибси районна кьадрила балбуцличи багьудила управлениела ва районна администрацияла хIянчизартачил рарх ракIибхIели. Ил балбуцличи бакIибти-ургар лерсири районна бекIла заместитель Эльвира ХIясанхIусейнова, суненира директорла ва коллективла къайгънас гIяхIси кьимат бедибси.
М.ГIябдуллаев гIергъити дусмазив, сагали чарухъи АметеркIмахьила школализив директорли узули сай, иш гьакIлисра шантала ва школала педагогический коллективла тилади хIясибли, — сецад адамдешла вегI виэс гIягIнилив илгъуна адам! Халадеш агни, адамтачил валги уэс бални, дурхIнала челябкьлаличи уркIи изахъни, барх бузутачи гIяхIси хIеруди гIеббурцни — бахълизир-декIар къаршихIедиркути къиликъуни лернили МяхIяммадлис имкан лугули саби сай валути-ургав даим хIурматличил хIервирахъес.
— Нушаб, узи-рузис, гIямрулизир кьибламали детаурли сари бегIтала гIякьлуми, — викIули сай М.ГIябдуллаев. — БегIти бикIутири: «Бархьдешличил хIердиирая, цархIиллис вайси мабиридая, хIушаб вайси барибсиличирадра черкадерхурли, сунес гIяхIси барес кьасбиреная!» ГIямрула гьунчив адам сегъунти—дигара анцIбукьуначи вяхIягес асубирар, неш-дудешли гIеббурибси хъумхIертурхIели, ну цайналра пашманхIейубра.
Ил багьандан ургар МяхIяммад БяхIмудович 50 дусла бухIнаб сай узуси мерличибра арагIебли Ахъушала районнизибра халаси хIурмат бихIес бажардииркуси, адамтас мурталра дяхI шалали, разити уркIи-хIяйчил гьунивиуси, хIялалси бузерилис хIурматла уми касибси: «ДР-ла урибси учитель», «Дусла директор», «Халкьла педагог», «Творческая педагогикала Академияла академик», «Россияла Федерацияла багьудила хIурматла хIянчизар». ХIурматла Грамотаби ва Баркаллала кагъурти лер 100-личи адиркули. Илди-ургар лер спортлизирти сархибдешуни багьандан касибтира. М.ГIябдуллаев хабардерхурси волейболист сайри. Сунела узби ва гъамти каберхахъурли МяхIяммадли цалабяхъибси команда Москвализира абзаначи букибсири.
— Ил сабри 1989 ибил дуслизиб дураберкIибси халаси балбуц, халкьани-ургабси спортакиада, сунезирра 23 республикализибадти 500-цад спортсменни бутIакьяндеш дарибси. Дубурла районтазибад ца нушалацун команда сабри лебси, —гьанбиркахъули сай илини.
— Спорт дила гIямрула ца бутIа саби — къайгъибирулра бучIантазирра спортличи диги адикьес.
МяхIяммадлис багъишладарили делкIунти назмуртира лер: «Адам жагавирути багьудира гIякьлура», «Сагали абердибси гIиниз», «Разидешла нурли ухуси», «Адамтас гIяхIдеш бихан», «Дагьри гьаладяхI дикан», «Ахъ­дешличибяхI гьуни» ва цар­хIил­тира.
— Бурес дигулра районна бекI­деш­­личи ГIябдулкаримов МяхIяч Кьадиевич вакIили гIергъи, багьудила масъултачи пикри бяхIчиаъни дебали гIяхIбиуб или. Багьудила учреждениебазир шуртIри къулайдиуб, имканти имцIадиуб, чебетаили бузути учительтачи, гIяхIил бучIути дурхIначи хIеруди гIеббуцили, уркIичеббирули чебиухIели, разидеш саби учительтас, дурхIнас, бегIтас, — викIи ихтилатла ахирлизив МяхIяммад БяхIмудович.
…ШуцIанну цараэсил бузерила дус бехIбирхьули сай пагьмучевси педагог, чеветаибси директор, гIяхIси организатор, жамигIятла вакил, дурашантанира шан варибси МяхIяммад БяхIмудовичли. Селичивалра гьалав — ил сай хIялалси, вархьси, сунесгъуна гIяхIдеш цархIиллисра биубли дигуси, чеабиуси наслу хатIахIебикесли, бархьси гьунчи дураэс гъазализивси гьарли-марси дубурлан. Арали ватаб сайра, сунела марси кумекчи Хадижатра, дурхIнира, лебилра насаб-тухумра! Сай акIубси МухIела шилизира, сунес ахIертили детаурти, дура шимазира, Россияла лерилра шими-махьурбазира гIяхIтицун хабурти дашаб!