ХIукуматла харжаначил сари шагьуртазирти юртанала ургарти азбурти далдирути, бикIули, нуни бакьибси саби. ГIягIниси даражаличил илди хIянчи дурадеркIахъес багьандан, «Шагьарла куц белгиси жураличи бушес» («Формирование комфортной городской среды») бикIуси хIукуматла программа хIясибли муниципалитетунас гIягIнити бюджетла арц чедиахъути сари.
Камси заманалис гьалаб нушала республикализи ва тах шагьарлизи тIабигIятла анцIбукьличибли бетаурси балагь чебакIибсири. Гьайгьайра, ил чебакIибси балагьли барибси зарал агарбарахъес, республикалис Москвализибадра кумек гIеббаахъиб бургар.
ХIера, нушала шагьарлизир, илди кIидехIелра арц харждарили, юртанала ургарти азбурти далдирес бехIбихьили саби. Хъуливад хIянчиличи аркьуси нуни 15 минутла духIнар хIябал мерличир илдигъунти хIянчи дехIдихьили чедаира.
Дебали гIяхIдизур наб жагадарили, къулайси даражаличи душибти биштIатала майдунти, някьишдарили вавни удатес хIядурдарибти мерани, бамсриихъес адамти кабирахъес кадихьибти дягIути скамейкаби ва дахъал цархIилти жагати секIал. Илди къаршидикибси мерличив ну мурталра тIашилзусира ва гIяхIцадхIи илдачи хIерикIули кавлусира.
«ХIулбала хIяйранирахъуси цIакь!» («Очей очарование!») викIусири А.С.Пушкин илгъуна тIабигIятла суратлис. Ну биалли, шагьарла кьакьалабси суратлис или викIулра. Нуни иличила цархIилван бурес хIейрус. Мурт чебаишара нуни ил «хIяйранирахъуси цIакь» ну хIерируси юртла мякьлаб?