ДР-ла Халкьла Соб­ра­ниела депутатли ветаэс кандидатура гьала­бихьибси Кьурбан ГIялиев ва Хай­дакьла районна депутатунала собраниела председатель МяхIяммад Мя­хIяммадов Хайдакьла районна Гъа­зияла шилизибси цахIнабси ба­гьудила школализи бякьун. ДуцIрум ил, «Багьуди» бикIуси мил­латла проект­ла дазурбазиб, лутIи-хьул­чи­ли­зи­бадал къу­лайбариб. Гьанна дурхI­ни са­га­ба­риб­си юртлизиб бучIули саби.
Илдани дурадеркIибти хIянчи ахтардидариб, белчIудила кабинетуни хIер­дариб, школала директорличил, му­гIял­лимтачил ва бучIантачил ихтилат­ба­риб.
Школа багьесагарли барсбиублири: сагати улкьайти ва унзурби даршиб, жа­няхIлизир плиткаби кадихьиб, бурхани ва чIябурти къулайдариб, хутIла гьимирти ва ванадешла гIягIниахълуми дарсдариб. Илкьяйдали школа-алавти мер-мусара къулайси агиличи дикахъес им­кан­бакIиб.
Сагадариб белчIудила кабинетунира, илди сагати гIягIниахълумачил жагадарили сари. Гьанна школа шаласили, ванасили ва багьудлуми касес къулайти шуртIри гIердуцибсили бетаур.
Кьурбан ГIялиевли цIакьбарили буриб: «Нуша белчIудила бетуц гьалабяхI башахъниличила гъайдикIухIели, ил гIядатлати анцIбукьуначибад ва секIултачибад бехIбирхь­ни­л­ичила багьес мягIничебси саби: дурхIя урехиагарси, ванаси ва ишхIелла тIалабуначи балбикибси школализи вашес гIягIниси сай. ИлхIели илис мурхьти багьудлумира касес имканбикIур. Ил шайчиб дебали халаси кумек алкIахъули саби миллатла проектунани. Илдала хьулчиличир школаби сагадирули, хIяжатти гIягIниахълуми исули, къулайти шуртIри алкIахъули сари».
Дарибти хIянчи хIердирухIели, школала вакилтани илдала черкадти чула пикруми дуриб. МугIяллимтани районна, регионна хIукуматлис баркалла багьахъур икьалабарнилис ва проект гIямрулизиб дураберкIнилис.
Школала директор Халимиздаг МяхIмудовани цIакьбарили буриб школа лутIи-хьулчилизибадал сагабарни Гъазияла лебилра шантас мягIничебси анцIбукьли бетаур или.