Сентябрьла 1-личиб лебил Дагъистайзиб кьяйдали, Ахъу­шала районна багьудила лерил­ра учреждениебазиб цаибти зянкъла байрам­ла БархIи ахъси даражаличиб дураберкIиб.
Илкьяйдали Ахъушала урга даражала хIябъибил школализибра цаибти зянкъла бархIи че­бяхIси даражаличиб бетерхур. Шадлихълизир школала мугIяллимтани, бу­чIантани, дурхIнала бегIтани ва гIяхIлани бутIакьяндеш дариб.
Шадлихъ РФ-ла гимн зай­бу­хъахъ­ни­личил бехIбихьиб. ГIур иш­дус­лизиб бегI гьалаб бехIбихьудла класс­лизи аркьути бучIанти вавнала халубира сабира цаибси учительницачил барх линейкаличи дура­бухъун. Шадлихъ бузахъу­ти рурсбани цалабикибти бучIанти ва мугIял­лимти багьудлумала БархIиличил мубаракбариб ва лебтасалра гьарбизуни далгун. БучIантала гьалар школала директор Ма­рина МяхIяммадовна ИмангIя­лие­вара гъай­­рухъун.
— Лерилра хIуша багьудлумала бай­рамла БархIиличил мубаракдирулрая, лебтасалра арадеш, бузерилизир сар­хибдешуни диаб, хIушала белчIу­ди­лизир ва гIямрулизир гьарбизуни имцIадикIаб! Бу­чIан­тани багьудиличи диги им­цIабикIахъес къайгъибарая, учительтала ва бегIтала хIур­мат­бирули, гIяхIти кьиматуни кайсули дучIеная! Ишдуслизиб бехIбихьудла класслизи аркьути дурхI­насра белчIудилизир сархибде­шуни им­цIадикIаб! – рикIи Марина Мя­хIям­ма­довна.
«ДР-ла ГI.Тахо-Годила уличилси Миллатла музей» ГБУ-ла Ахъушала З.М.Мя­хIям­мадовала уличилси та­рих­­ла-край руркънилашалси музей-филиалла директор Мирзаева Зубалжат ХIу­сей­новнанира шадлихъличи цалабикибти му­баракбариб ва лебтасалра гIям­рулизир, бел­чIудилизир сар­хибдешуни далгун, дурхIни ункъли бучIахъес жибариб.
Ишдус бехIбихьудла класс­ла руководитель сари пагьму­черси, малхIямси, гIяхIти хIял-тIа­бигIятличилси, къугъати куц-кабизла регI, дурхIнас ва ил­дала бегIтас дигуси, школализиб дахъал дусмазиб хIянчи барибси жагьилси учительница Мусаева Раисат Камалутдиновна.
ДурхIнани мугIяллимтас ва школалис хасдарибти назмурти делчIун, делхъ дариб, вавнала халуби дедиб. Разити аги-хIяйзиб багьудлумала БархIилис хасбарибси шадлихъ ахирличи бикиб.
Гьар мурталра кьяйдали, духIнарти къуллукъунала отделла хIянчизартани шадлихъла бутIакьянчиби мяхI­кам­деш­личил гIеббурцул­ри.
БелчIудила сагаси дуслис школала юрт жагали бал­кьаахъурли, классуни, ка­би­нетуни, жаняхIуни ва алав­чар­ти мер-муса къулайдарили сари. Ил школализиб бу­зутас ва бучIантас гIяхIти шуртIрира гIердуцили сари. Школала лерилра классуназир ва жаняхIуназир жагати, жура-журала вавни лер. Баягъи школализиб бузули уржибси, дигичебси, шила халкь-ургаб халаси хIурмат сархибти, чула касибси санигIятлис марти, мугIяллимтала коллектив леб. Ахирличиб лебилра бучIантас ва школала мугIяллимтас гIямрулизир разити бурхIни, сархибдешуни дулгулра. Гьарбизуни имцIадикIахъули, даршуси челябкьлализиб хIербиэс кьадарбиаб лебтасалра!