Сергокъалала шилизибси Батирайла уличилси кьакьализиб хIербирути Муса БяхIяндов ва илала гIям­ру­ла рархкья Муслимат, дила пикрили, бахъли бала.
Мусас (монтёр Муса) или ирули бири. Ил гьанна нуша-ургав мицIирли агара. Ил, итхIели халаси хIурматла, сунезибра бахъал хIянчизарти бузуси почтализив монтёр вири. Муслимат дурхIнала цаибил анхълизир рузусири. Илдала 7 дурхIя акIубтири, ца биалли, виштIали левай вебкIибсири, 6 — абикьур. Илдани халаталара биштIаталара цаван хIурмат-кьимат дарес бала. Илгъуна гIяхIси бяркъ бедили, халабаахъибти саби илди чула бегIтани. Илди лебилра, рурси Аминат ахIенти, Ставропольла крайлизиб хIеркабирули ва чула яшавбирули бузули саби.
Ишаб наб бурес дигулра илдала МяхIяммад-ШапигI БяхIяндов бикIуси уршиличила, илала хIялалси баркьудиличила. Ил нуни бекIлил валуси ва чеибси ахIен. Илала арадешлизир нукьсандешуни лерли диалра, яшавбарес ва хъалибарг эркинни хIербарес ункъли бажардииркули сай. Илини гIеббуцибти саби узи-рузила дурхIнира бархли. ХIера, ил гъабза сецад дурхъаси, кирила баркьудилизи ахъилил. Илини гьар дуслизир итарад иша «Камаз» машина ва прицеп дицIили садухили, адамтас декьла гавлагуни дуртIу, гIе, гьарли-марли дуртIу. Декь дедлуга мижитлизи, яшавла шуртIри гIяштас, бухънабас, бахъал дурхIнала бегIтас, унра-хунралис, гъамтас, илхIелира — гьариллис чула хъули духили.
Гьар дус илини илгъуна кирила хIянчи бирухIели, наб гьанбиркусири илала ризкьили делгIути капарай авлахъуни дургар или. Илдира агара илала. ХIера, сунела арцлис асили, илдицад тоннаби декьла гавлагунала дуртIули сай дубурлан гъабзали. Пикридухъеная, гьари, сегъуна гьунарал илини дурабуркIуси. Нуни илгъуна секIал барибси, я бируси гьанналис гьалав цалра хIяким, депутат, давлачевси адам чеибси ахIен. Дунъяличиб гIур халаси садакьа биэсра хIебирар цархIил илини бирусигъуна. Илгъуна бирар кирилис бируси баркьуди, сунес баркалла ахIенси гIур цархIил сайсуси агарси. Дила пик­рили, азир баркаллаличи лайикьлира сай ил. «ЛерхIели сари илини илди дуртIути», — бикIутира ахъес асубирар. Бахъал леб ишбархIи нушачиб илгъуна барес ахъри лебти, амма хIебирути. Ил багьандан нура илис азирна баркалла рикIулра.
ГIямрулира велкъаб сай, далайлизиб буруливан, дусманира велсаб сай, кьаркьайзи сегъуналра изалара къячмабикаб. Илгъуна баркьуди даимбарахъес гьатIира арадеш, ахъри имцIадиаб сунела, Кьудратла ВегIлира гьарил секIайзив гIевуцаб! Амин!