ГIярмиялизи дявила къуллукъличи жагьилти жибирниличил ва хIядурбирниличил бархбасунси хIяракат дебали жавабкарси ва мягIничебси саби. ГIярмиялизиб къуллукъбирнира жагьил адамтала гIямрулизиб ВатIайчи диги чедиахъуси цаибси ганзлизи халбарес вирар.
Жагьил адамти гIярмиялизи жибирнила, хIядурбирнила ва гьуниббалтнила хIяракат къелгIеббикули, дахъал дусмазив бамсри хIебалули узули сай лебтасалра тянишси, нушала газетала гьалмагъ, ДР-ла Дявила комиссариатла жагьилти дявила къуллукъличи жибирнила ва хIядурбирнила шайчибси отделла начальникла заместитель, офицер, полковник, СВО-ла бутIакьянчи Явнус Рабазанович Жамбалаев. Мурталраван, гьаннара гIярмиялизи жагьилти жибирнила хIяракатличила бурахъес Явнус Рабазановичличи дугьаризурра. Иш гьакIлизиб Я.Р.Жамбалаевли гIебшнилизиб жагьилти гIярмиялизи жибирнила хIяракат секьяйда бетурхулил, ишдуслизир сегъунти сагадешуни дакIудиублил, гIярмицуни чина бархьиутил ва цархIилти хасдешуначила нушази балахъули сай. Иличил бетаурси ихтилат хIушабра гьалабирхьулра.
— Явнус Рабазанович, селичибли декIарбулхъули гIебшнила манзиллизиб жагьилти дявила къуллукъличи гIярмиялизи жибирнила балбуц? Се заманаличи бикайчи бухъянбилтIана ил, ва хIушала план хIясибли, чумличи абиркули Дагъистайзибад бурхьути гIярмицунала кьадар?
Явнус Рабазанович Жамбалаев:
— ГIебшнила манзиллизиб жагьилти гIярмиялизи жибирнила хIяракат даимбиубли саби. Иш манзиллизиб нушани гIярмиялизи дявила къуллукъбарахъес аркути жагьилтала лугIи 3500-личибра имцIали абикахъес гIягIниси саби. Жагьилти гIярмиялизи арбикути мер-мусала географияра гIебшнила манзиллизиб декIарбулхъули саби: Камчаткаличибад бехIбихьили, Калининградличи бикайчи, Москваличибад – Крымличи, Дальний Востоклизи ва декIар-декIарти цархIилти регионтази. ЦархIилти субъектуназибадти гIярмиялизи жибарибти дурхIнира арбашути саби, нушала гIярмицунала дурабад. Ставропольлизибад, Калмыкиялизибад, Астраханьна областьлизибад, Чечнялизибад, Ингушетиялизибад арагIебли Северный Кавказлизибад, Южный Федеральный округлизи кадурхути регионтазибад гIярмиялизи жибарибти жагьилти Дагъистан Республикала «Уйташ» аэропортлизибад арбикути саби. Лебилра бекIбарес нуша бажардидиркулра. ГIебшнила манзилла призыв дусла ахирлличи бикайчи бухъянбилтIан.
ГIярмиялизи къуллукъбарахъес жибирнила хасдешуначила бурасли, бегI гьалаб нушани жибирулра гIямрула дусми хIясибли халати дурхIни, белчIуди касибти, дявиласи бяхIчибизла ДОСААФ-лизиб дявиласи бяркъ касили, хIядурбарибти, ва гьайгьайрагу, саби гIяхIъулали дугьабизуртира. Амма ишдигъунти анцIбукьунира къаршидиркули сари: жагьилтас гIярмиялизи букьес дигули саби, амма бегIтас илди бархьес дигули ахIен.
ГIярмиялизи живарес замана баибси жагьил адам, гIела витIхIейкIули, дявила комиссариатлизи дугьаизурли, сунечибси конституциялашалси чебла ахъалли, къулайли бирар. Иткъира гьалабра бурили кьяйда, гIярмиялизи жибирантала дусми 30 дусличи бикайчи ахъдарибти сари.
Ца гьатIи, сагаси хасдешлизи халбарес вирар, гьанна нушала призывникуни дазу балтахъантала (пограничникула) гIяскуртазибра къуллукъбирахъес декIарбирни. ЛугIи илцад-декIар халаси хIебиалра, 100-цад адам чеббиркIули саби. РФ-ла Президент В.В.Путинна ХIукму хIясибли, гIярмиялизиб къуллукъбируси заманала кьадар – 12 баз саби (дус). Дусла бухIнаб гIярмицлис дявиласи техника бяркъес, иличил ункъли тянишвиэс имканхIебикIули биалра, гIярмиялизиб къуллукъбирнила дусми имцIадирниличила гъай агара. Ил тяхIярли нушаб дигулра, гIярмиялизи жибирути дусмачи абикибти дурхIнала кьадар имцIали бухIнабуцес. Жагьил адамлис сегъуна-дигара замана ВатIан балтахъес хIядурли кайзес чебси саби. Дила дурхIнира бегI гьалаб ВатIан балтахъес, илала хъархIерагардеш мяхIкамли бихIяхъес бурсибирули вирус. БусягIятра илди офицерти бетаэс бучIули саби. Мисаллис, Лавашала районна бекIла уршира (цайли цаси) дявила къуллукъличи вархьиб, дусла бухIнаб илини сунела дявиласи чебла ахъили, хъули чарухъун.
ГIярмиялизи чула дурхIни бархьес хIейгути бегIтази аргъахъес чебиркур, вягIда хIясибли къуллукъбарес ибси хьул биалли ахIенси, гIярмиялизи живарибси жагьил адам чилилра гужли дявила къуллукъличи вархьес хIейрниличила.
ГIярмиялизи дявиласи къуллукъличи жибарибти дурхIнани сагали Россияличил дархдяхъибти регионтачилси дазуличиб къуллукъбирути анцIбукьунира къаршидиркур. Мисаллис, бара гьалабван, Дагъистайзибадти 12 дурхIяли Белгородла областьла дазуличиб гьавала десантунала гIяскарлизиб къуллукъбирули калун. Чихъти адаб-хIяяличил дусла бухIнаб улкала гьалабси чеблара ахъили, медальти, ордентира сархили, илди хъули чарбухъун.
— Сегъунти гIяскуртазиб къуллукъбирули имцIаливан нушала гIярмицунани?
— ГIядатлибиубливан, белчIудила вегIлис дахъал имканти гьаргдирули сари, илис бегIлара черикIлагъунти гIяскуртазиб къуллукъбарес имканбикIур. ИмцIаливан гIергъити гIяскуртазиб къуллукъбирули саби: хьурали башули бургъантала, гьавала дергъла, гьавала-десантла, дявила гамурбала гIяскуртазиб, миллатла гвардияла ва пограничникунала (дазу балтахъантала)гIяскуртазиб, спецназлизиб. Гьалар инженерияла шайчирти подразделениеби хIедирутири, гьанна илдира декIардарили сари.
— ХIушала гьаларти мурадуни сецадла кьадар детерхахъес имканбикIулив?
— АрагIебли Дагъистан Республикала 52 муниципалитетлизибад жагьилти жибирути саби гIярмиялизиб дявиласи къуллукъбарахъес багьандан. Нушала гьаларти лерилра сурсатуни пайдаладарили, бузерила мурадуни детерхахъес къайгъибирулра. ГIярмиялизи къуллукъбарахъес жибарибкъира, дявиласи комиссариатлизи хIебакIибти жагьилти нушани сагадан жибирули дирехIе, илдачил гIярмиялизи жибирнилашалти лерилра далдуцуни, медицинала ахтардлуми дарадеркIили, гIярмиялизи арбукес пайдалабирулил ахIенал ахтардибирулра.
Дагъиста районна муниципалитетуназибад гIярмицуни сборный пунктлизи бурхьути саби. Нушани илаб илди лерил хIяжатти секIайчил гIеббурцулра, палтар-кьяшличил, беркайчил, бугIярти мер-мусаличи аркутас кIидехI дабри (ванадикIути)дедлугулра ва илдас челукьути цархIилти масъулти ирзулра.
— ХIела шайзибад се бурес вируду, гIярмиялизи къуллукъбарес аркьути жагьил адамтази?
— «ГIярмиялизиб къуллукъбарес гIягIниси ахIен» или гIеббугьантачи лехIмайхъудая. Нуша лерилра Россия бикIуси ца халаси хъалибарглизир хIердирулра. Нуша пачалихъла гIяхIдешуначил, илини гIердиахъути кункдешуначилцун пайдаладикIес гIягIнити ахIенрану, улкала гьалабси конституциялашалси чеблара ихъес хIяжатси саби. Эгер жагьил адамли сегъунти-биалра сабабтачивли гIярмиялизиб къуллукъбарес хIейрули виалли, сай зягIипли, яра чулахъ виъни багьандан, нушани ил запаслизив валтуси сай. Илкьяйдали ил белчIудила заведениелизив учIуси виалли, гIярмиялизи живирни чараагарли гIелайзи арбихуси саби, цархIилти кумекчибира агарли, зягIипти бегIтачи, тухумтачи хIеруди бузахъули виалли, илдигъунтира нушани гIярмиялизи хIебукили балтулра, кIелра биштIати лебтира закон хIясибли, гIярмиялизи арбикути ахIен белгиси замана бикайчи. Амма сабабти агаркъира дявила комиссариатлизи хIебашутани бархьси бирули ахIен. Илди нушала гьала бакIес ва гьар секIайчила багьахъес чараагарси саби. 17 дус биубхIейчибад бехIбихьили, гIярмиялизи жибарес чебти жагьил адамти хIисаблизи кайсути саби. 18 дус биубхIели, илди дявила комиссариатлизи бакIили, нушази гьар секIайчила багьахъес чебиркур.
Бурес чебиркур, ноябрь базличибад бехIбихьили, жагьил адамтачи гIярмиялизи жибирнила хIекьлизибси кагъар (повестка) бархьес электронный тяхIярлира имканбикIули саби. Госуслуги порталличи бурхьуси саби илгъуна кагъар.
ГIярмиялизибси дявиласи къуллукъличи жибарес дусмачи абикибти жагьилтас насихIят:
— Сегъунти-биалра сабабтачибли, саби 30 дус биайчи гIярмиялизиб къуллукъхIебарили убкалунти мурул адамтачи ишкьяйдали дугьаизес вирар. Эгер хъали-цIара делши, биштIатира акIубхIели, ца бархIи чула халаваибси уршили илдази ишкьяйдали хьарбаалли: «Дудеш, хIу чинав, сегъунти гIяскуртазиб къуллукъбирули калунсири?» или. Сегъуна жаваб чарбарес дирудая хIушала уршбази? ГIярмиялизивад дигIяникира, яра сен-биалра дявиласи билет бикахъниличила буридаяв? «Нуни итаб, яра ишаб къуллукъбарира, хIунира илаб къуллукъбарес вируд эс гьамадли ахIену гьатIи? Дила уршилизира нуни ишкьяйдали бурира: «ХIела хала дудешра ургъули калун, дудеш ургъули калун (4-на), хIура ургъуд ва улкалис къуллукъбирид».
Иша бакIибти жагьил адамтазира илкьяйдали иргъахъулра. Илдачил халадеш агарли, адамдешличил гъайвикIес гIягIнибиркур. Адамдешличил гъайвикIалли, жагьилти дурхIнанира гьар секIал иргъули сари. Илди убяхIбирес, балтIес, чеуми дурес асубируси ахIен. Адам кьяйдали, илдачи тIама ахъхIебарили, ихтилатикIуси сай дявила къуллукъличи жибарибти дурхIначил. Нушала адаб-хIяяличи далдикибти тяхIурти пайдаладирули, бегI гьалав жагьил адамлизи сай адам виъниличила аргъахъес чебси саби. ГIе, ил ВатIан балтахъан сай, амма бегI гьалав ил адам сай.
Гьар секIал вегIла мисалличиб чебиахъуси саби жагьилтази. ХIятта вегI-алавси умудеш бихIяхъес, жярга-зекъ ванзаличи лайхIедикIахъес булан бурсибирес хIяжатбиркур жагьилти. Илкьяйдали мурул адам увяхIвирес асубируси ахIен. ГIярмиялизи живарибси жагьилси адам виалра, ил мурул адам сай. Дагъистанлантачил секьяйдали ихтилатикIусил, илдала хIерани сегъунти дирутил, диннашалти, адаб-хIяялашалти хасдешуни, адуцала, гIядатуни хIисаблизи касили, нуни хасси пособие белкIунра. ЦархIилти регионтазирти дявилати комиссариатуназиб бузути руководительтира нушани иличил тянишбирулра. Илдани нушала гIярмицуначил секьяйдали бархбасуни дузахъес гIягIнитил гьар секIал хIисаблизи кайсули сари. Школализиб дебали гIяхIси предмет бирусири «Основы безопасности, жизнедеятельности и защиты Родины» бикIуси. Илини учIан патриотизмалашалси бяркъличил вегIирусири, дявиласи хIядурдеш бедлугусири.
Школализиб дурхIнас дявила-патриотизмалашалси бяркъ бедлугес, ВатIайчи диги адилкьес гIягIнити сари. ИшхIелла манзиллизир адамдешла черяхIти лерилра кьиматуни дарскадиубли сари, цархIилтачи шурдухъи сари…
Ахирлизиб гIярмиялизи дявиласи къуллукъбарахъес жибарибти жагьил адамтази бурес дигулра, хIушачи повестка бакIибхIели, чедаахъая хIушала гъабзадеш, дявила комиссариатлизи дугьадилзеная. ВатIа гьалабси конституциялашалси хIушала чебла таманбиреная!
— Баркалла ихтилатлис, Явнус Рабазанович.
П.Сулайбанова
