ДР-ла Халкьла Собраниела депутат Узлипат ХIясанова бузерила архIяла дазурбазир Хайдакьла районнизи раиб. Мажалисла шилизибси Темирхановла уличилси школала чедирти классунала бучIантачил ил гьунираиб. «Битва за Кавказ» бикIуси тема хIясибли, лекцияла къиликъуначилси ихтилат илини дураберкIиб. БучIантани халаси иштяхIличил балбуцлизир бутIакьяндеш дариб. КIинайс биалли, школала жаняхIлизиб тIашбатурси хасси хьулчи–ислала мерличиб СВО-лизи дурхьес маскировочные сети думхес илди бехIбихьиб. Директорли гьанбушили кьяйда, бучIантани ва мугIяллимтани чедибдеш гъамбирахънилизи чули бирусигъуна пай кабирхьули саби.
Узлипат ХIясановани школалис жузи ва словарьти савгъатдариб. ГIур илини районна администрациялизиб адамти кьабулбирули, архIя даимбариб. Балбуцла дазурбазиб депутатли кьабулбарибти 10 адамлизибад кIел СВО-ла бутIакьянчи сабри. Дугьабизуртала хIябал масъала мерличир арзиб, цархIилти биалли — Узлипат ХIясановани сунела хIерудилиу касиб.
Хайдакьла районна администрацияла пресс-служба
